1 Kɔrɛ̃tɩ Sɛbɛ 1 - A NAAŊMƖN PƲLƖ̃-TA-PAALAA

A POL ƳƐRƖ̃ NYƆWFƲ

¹ A maa Pol nɩ a sɩ yɛbɛ Sɔsɩten ɩ̃ lãa tɩɩrɛ a sɛbɛ na. A Naaŋmɩn vɛl ma na ir, ɩ̃ bʋɔl ma ɩ̃ ɩ a *Jeeju-Kirisi *nɩ-tʋnaa.

² Sɩ tɩɩrɛ na a sɛbɛ na kʋrɔ a nyɩmɩ Naaŋmɩn *duo-puorbo na be a Kɔrɛ̃tɩ-tẽw, a nyɩmɩ a Naaŋmɩn na ow a kpee a Jeeju-Kirisi pʋɔ a nyɩ ɩ a ʋ nɩbɛ, ɓã taa nɩ a bala ba jaa na be a jiir a jaa na bʋɔlɔ a sɩ Nɩ-kpɛ̃ɛ Jeeju-Kirisi yuor, na ɩ a ba Nɩ-kpɛ̃ɛ nɩ a sɩ ben.

³ A sũofʋ nɩ a pɩɛnfʋ na yi a sɩ Sãa Naaŋmɩn nɩ a Nɩ-kpɛ̃ɛ Jeeju-Kirisi sɛ̃ á be a nyɩ jie.

A MAAL-VƖLAA ALA SƖ NA PƆW A JEEJU-KIRISI PƲƆ

⁴ Ɩ̃ pɛwrɛ na a Naaŋmɩn a daar a jaa a nyɩ ɩnɛ a mɩnɛ ʋ na kʋ nyɩ a ʋ sũofʋ a *Jeeju-Kirisi pʋɔ,

⁵ a-na-ɩ a ʋlɔ pʋɔ nyɩ le a yele a jaa ɩnɛ, a ƴɛrɩ̃sɩ ƴɛrfʋ nɩ a bɔ̃wfʋ pʋɔ a jaa.

⁶ A mɩnɛ nyɩ na sɩrɩ̃ nyɔw a *Kirisi yel-mɩ̃ɛ ƴɛrɩ̃ a cĩcĩ ɩraa nɩ,

⁷ a Naaŋmɩn sũofʋ bom kãw ma bɔrɔ nyɩ wa, a nyɩmɩ na jɛ cɛlɛ a daar ʋlɔ a sɩ Nɩ-kpɛ̃ɛ Jeeju-Kirisi nɔɔ nyɩrɛ.

⁸ A ʋlɔ mɩ̃ɛ na tɛrɛ nyɩ na ɩraa nɩ cĩcĩ wa ta nɩ a baarfʋ daar, a mɩnɛ a sɩ Nɩ-kpɛ̃ɛ Jeeju-Kirisi waa dayen, a ba kɔ̃ tʋɔ nyɛ cɛfʋ jie a nyɩ jie wa.

⁹ A Naaŋmɩn ɩ na dẽdẽ, a ʋlɔ na bʋɔl nyɩ a nyɩ lãw taa nɩ a ʋ Bie Jeeju-Kirisi na ɩ a sɩ Nɩ-kpɛ̃ɛ.

A DUO-PUORBO ŊMAFƲ

¹⁰ Yɛɛr, ɩ̃ sʋɔr nyɩ na nɩ a sɩ Nɩ-kpɛ̃ɛ *Jeeju-Kirisi yuor, a nyɩ na mana taa nyɩ jaa. Nyɩ taa ŋmara kpee kpee wa, ɩ̃-cɛ nyɩ́ bɔ̃w nyɔw taa tɛrɛ nɩ tɩɛrɩ̃-bõ-ƴen nɩ nɔ-bõ-ƴen.

¹¹ A-na-ɩ yɛɛr, a Kilowe yir deme man ma na á faa-taa be na a nyɩ sɔ̃w.

¹² A lɛ yelʼã a nyɩ jaa ma ƴɛrɛ na kpee kpee. A bõ-ƴen ma yelʼã: “Maa ɩ na a Pol nɩrɛ.” A kãw yel, á Apolosi nɩrɛ ʋ ɩ, a kãw go, á Pɩɛr nɩrɛ ʋ ɩ, ɩ̃ a ƴen sʋbɔ ma yel á *Kirisi ben ʋ ɩ.

¹³ Nyɩ tɩɛr beeka ba dãa na ŋma a Kirisi kpee kpee po mɩɩ? A Pol ba dãa kpa a nɩ-kʋ-daa juu a nyɩ ɩnɛ mɩɩ? Mɩɩ a Pol yuor ba dãa de mʋrʼɩ̃ nyɩ a kʋ̃ɔ mɩɩ?

¹⁴ Ɩ̃ puoro na a Naaŋmɩn a mɩnɛ ɩ̃ na ma dãa mʋr nɩrɛ kãw a kʋ̃ɔ, ɩ̃-cɛ a ala ma ɩ a Kirisipi nɩ a Gayisi tɛw ʋ wa.

¹⁵ Ala-ɩ̃-sɔ, nɩrɛ kãw ma tʋɔrɔ yele a ɩ̃ yuor ɩ̃ de mʋrʼɩ̃ nyɩ a kʋ̃ɔ wa.

¹⁶ (Ɔɔ, yel-mɩ̃ɛ ʋ! Ɩ̃ mɩ dãa na sɩrɩ̃ mʋr a Sitefana yir deme a kʋ̃ɔ. A ala ɩ̃ baar, maa lɛ bɔ̃w ka ɩ̃ mʋrʼã nɩrɛ kʋ̃ɔ go wa.)

¹⁷ A-na-ɩ a Kirisi ma tʋ̃ ma ɩ̃ wa kʋ̃ɔ mʋrfʋ ɩnɛ wa, ɩ̃-cɛ ʋ tʋ̃ ma na ɩ̃ wa ƴɛrɛ a ʋ ƴɛr-son. Aa ɩ a tẽw na pʋɔ kpaarfʋ ɩ̃ de ƴɛrɛ nɩ wa, a mɩnɛ a Kirisi kũu ʋ na kpi a nɩ-kʋ-daa juu kɔ̃ wa lɩɛb ɩ pɔrɔ wa.

A KIRISI NA Ɩ A NAAŊMƖN KPƐ̃W NƖ A Ʋ KPAARFƲ

¹⁸ A-na-ɩ a ƴɛrɩ̃ ʋlɔ na ɩ a *Kirisi kũu a nɩ-kʋ-daa juu ɩ na dãbol ƴɛrɩ̃ a bala na wɛrɛ jie, ɩ̃-cɛ ʋ ɩ na a Naaŋmɩn kpɛ̃w a sɩmɩ jie na be a faafʋ sɔr pʋɔ.

¹⁹ A mɩnɛ a Naaŋmɩn Sɛbɛ na yel: “Ɩ̃ na sãw na a nɩ-kpaarsɩ kpaarfʋ bar, ɩ̃ mɩ ir a yɛ̃-tɛrbɛ yɛ̃ bar.”

²⁰ A ala be a lɛ, bõ a ʋlɔ na kpaar na lɛ yel go? Mɩɩ a *ƴɛr-kpɛn-bɔ̃wnɔ, bõ ʋ na mɩ yel? A tẽw na cɩcɩɩrɛ, bõ ʋ na mɩ yel? A Naaŋmɩn ma lɩɛb a tẽw na kpaarfʋ ʋ ɩ dãbol yɛ̃ wa mɩɩ?

²¹ A-na-ɩ a mɩnɛ a Naaŋmɩn kpaarfʋ na maal a tẽw nɩbɛ a ba kɔ̃ tʋɔ bɔ̃w a Naaŋmɩn nɩ a ba kpaarfʋ wa, ala-ɩ̃-sɔ a nʋmɔ ʋ ʋ na de a dãbol ƴɛrɩ̃ ʋlɔ sɩ na ƴɛrɛ, faara nɩ a bala na ƴɔ̃w ʋ a nyãa.

²² A Jufisɩ bʋɔrɔ na ba nyɛ a Naaŋmɩn tʋ̃-miilsɩ, ɩ̃ a Gɩrɛkɩ nɩbɛ bʋɔrɔ a kpaarfʋ.

²³ Ɩ̃-cɛ a sɩmɩ ʋlɔ, sɩ hiere na a Kirisi ʋlɔ, ba na dãa kpa a nɩ-kʋ-daa juu ƴɛrɩ̃, na cɛ a Jufisɩ, ɩ̃ ɩ dãbol ƴɛrɩ̃ a nɩ-bʋlsɩ jie.

²⁴ Ɩ̃ a ala ɩ a bala a Naaŋmɩn na bʋɔl ʋ, a Jufisɩ mɩɩ a Gɩrɛkɩ nɩbɛ, a Kirisi ɩ na a Naaŋmɩn kpɛ̃w nɩ a Naaŋmɩn kpaarfʋ a ba jie.

²⁵ A-na-ɩ a ala a nɩbɛ na nyɛ a ɩ a dãbol ƴɛrɩ̃ a Naaŋmɩn jie, tɛrɛ na kpaarfʋ gãw a nɩbɛ ben, ɩ̃ a ala ba na nyɛ a bal a Naaŋmɩn jie tɛrɛ na kpɛ̃w gãw a ba ben.

²⁶ Ɩ̃ yɛɛr, nyɩ́ ꞌwuor nyɛ a nyɩmɩ a Naaŋmɩn na bʋɔl. A tẽw na nɩ-kpaarsɩ ma waa a nyɩ sɔ̃w wa, a fãgã deme nɩ a naabsɩ bibiir ma mɩ waa wa.

²⁷ Ɩ̃-Cɛ a bala a tẽw na nɩbɛ na ma nyɛ a baa ɩ bom wa, bala a Naaŋmɩn ma de tʋ nɩ, a vĩ kpɛ a nɩ-kpaarsɩ. Ɩ̃ a bala a tẽw na nɩbɛ na ma nyɛ a ba bal, bala a Naaŋmɩn ma de tʋ̃ nɩ, a vĩ kpɛ a nɩ-kpɛn.

²⁸ A bala a tẽw na nɩbɛ na ma nyɛ a ba ɩ a nɩ-kpansɩ ma ɩ bom wa, a ba mɛbɛ, bala a Naaŋmɩn ma vɛl ir wɛlɛ nɩ a ala a nɩbɛ na ma kpiire,

²⁹ a mɩnɛ a nɩrɛ lɛ kɔ̃ tʋɔ bɔ yuor a ʋ nii-sɔw wa.

³⁰ Ɩ̃-cɛ a Naaŋmɩn ɩnɛ nyɩ ɓã taa nɩ a *Jeeju-Kirisi, ɩ̃ ʋ ƴɔ̃w ʋ ʋ lɩɛb ɩ a sɩ kpaarfʋ. A Kirisi ɩnɛ sɩ tor a Naaŋmɩn nii-sɔw, ʋ mɩ ow sɩ kpee a sɩ ɩ a ʋ ben, ʋ faa sɩ yi nɩ a maal-fãa pʋɔ.

³¹ A mɩnɛ a Naaŋmɩn Sɛbɛ na yel: “A ʋlɔ na bʋɔrɔ a yuor, ú bʋɔrɔ a yuor a ala a Nɩ-kpɛ̃ɛ na maal ɩnɛ.”