Vinara 8 - A Nitana Vure

Mu Luhoia e BAKOVI DAGI a Vure ne Mua

¹ E Moses i ta tabu i ta maea, “Mu ramai kamumu a maka vinara a habi ne mua ngane. Muri bara mu made kamumu mu bele kupo. Bara mu kara ni bolena a malala i ta muholi vona ge habia ne huriki a gare ne mua.

² Mu luhoi kamumua e BAKOVI DAGI a Vure ne hita, i muga mua, i tuhori mua vona a nilaho dagi mu ratea. Mu laho viliha na malala golea na pida i ravulu va. Lakea i rudu valai ranga maregoa ge toni mua, ge lohoka vona, mu gu ramai lobo a vinara vona o ge uka.

³ I vakamatasia mua, i rata mua mu vitolo, muri i habi a mana ne mua mu kani. Ra maki ni kani iea, mua turane huriki e tubune mua i uka ma ri kania hosi. I rata mavonga mu gu lohoka vona hita e huriki a bakovi, i uka ma si gi bole a nimahuri na maki ni kani kunana. Si bole a nimahuri na nita lobo ne BAKOVI DAGI.

⁴ Na pida nga, a varakia ne mua i uka ma i marape. A vahane mua ranga i uka ma i vaki, i kamumu kunana.

⁵ Mu lohoka vona e BAKOVI DAGI a Vure ne hita, i vara hita, i manga a tamana koma i varea e tuna.

⁶ “I mavonga kunana, mu rata a maka maki e BAKOVI DAGI a Vure ne mua i taki mua vona. Mu ramai a maka vinara vona, mu togoa.

⁷ A vuhuna i taparaki mua lakea na robo kamumu hateka. Ra robo iea i tahoka a maka naru dagi, a maka lomu. I ranga naru ri tua polotano na malala, ri tua tala na maloku, na dahana lolo.

⁸ Ra robo iea i vakabele a maka vit, a maka barli, i vakabele a maka kanena kai a vain, a kanena kai a pik, a kanena kai a pomigranet, a kanena kai a oliv, a ame.

⁹ Na tahuna mu made vona a malala iea i uka ma mu gu vitolo, i uka ma mu gu bala vona tara maki. A maka kedo na robo iea i vona maka aen, a maka kapa bara mu matavisi na maka lolo.

¹⁰ Bara mu kani marumaru. Muri bara mu kavurikea e BAKOVI DAGI a Vure ne hita, na robo kamumu i habia ne mua.

E Huriki a Israel Nahea Ri Gi Lohopile ne BAKOVI DAGI

¹¹ “Mu matadoko, naha ni lohopile ne BAKOVI DAGI a Vure ne mua, ma mu gu longotaro a maka vinara na Vure a habi ne mua ngane.

¹² Na tahuna mu tahoka pali a maki ni kani, mu rata pali a maka ruma kamumu,

¹³ na tahuna a maka bulmakau, a sipsip, a gol, a silva, a maka mahala ne mua ri bele kupo,

¹⁴ naha ni bibi rike mule a rane mua, mu gu lohopile vona e BAKOVI DAGI a Vure ne hita. Ia kunana i bole mule mua o Egipto na tahuna mu leho manga a vorakato vonga.

¹⁵ Ia kunana i muga mua na malala golea e huriki ri mangenge vona, i tahoka a maka mata hale, a kira. Na tabeke iea i kere hateka, i ratea a naru i tua tala na kedo dagi, mu nua.

¹⁶ Na malala golea i habi a mana ne mua mu kani. Ra maki ni kani iea e huriki a gare ne mua hosi i uka ma ri kania. I rudu tabu ranga maregoa ge toni mua. Muri bara i rata a maki kamumu ri bele ne mua.

¹⁷ Na tahuna mu tahoka a mahala i kupo, naha ni luhoi ra maka mahala nga, mu vakabele na nitora ne mua.

¹⁸ E BAKOVI DAGI a Vure ne hita, ia kunana i habi a nitora ne hita si gi bole a maka mahala. Naha ni lohopile vona a ngava nga. I rata mavonga, a vuhuna i tababana ni ramai a ngava dagi i taki e huriki a gare ne mua vona hosi.

¹⁹ “A taki tora mua, mua bara mu lohopile ne BAKOVI DAGI mu ramai mu kavurike a vure ranga, muholi hateka bara mu mate.

²⁰ I manga e huriki na maka tanga ranga i ratapile na matane mua na tahuna mu vaubi ne ria. Pali mua i uka ma mu gu ramaia a nitane BAKOVI DAGI a Vure ne mua, mua ranga bara mu mate manga ria.