Vinara 6 - A Nitana Vure

Mu Ngarua e BAKOVI DAGI a Vure ne Mua

¹ E Moses i ta tabu i ta maea, “Ra vinara nga, e BAKOVI DAGI a Vure ne hita, i taki iau ga tovo mua vona. Na tahuna mu bele vona a robo iea, ra ta mu gu bolea mu gu made vona, mu ramai lobo a vinara nga.

² Na tahuna vakaroro mu made na malala iea, mua turane huriki a hamone mua, mu togoa e BAKOVI DAGI a Vure ne hita. Mu ramai lobo a vinara vona i habi mua ngane, bara mu mahuri malaku.

³ Mua o huriki a Israel mu longo kamumu a vinara nga, mu ramai. Muri a maki lobo mu rata, bara ri bele kamumu kunana, mu bele kupo, mu made vona a malala i vona a maki ni kani. E BAKOVI DAGI a Vure ne huriki a gare ne hita i ta muholi vona a ngava iea.

⁴ “Mua o huriki a Israel mu longo kamumu. E BAKOVI DAGI ia kunana a Vure ne hita.

⁵ Mu ngaru hatekea e BAKOVI DAGI a Vure ne mua. Mu ngarua na hatene mua lobo, na niluhoi ne mua lobo, na nitora ne mua lobo.

⁶ Na parava vakaroro mu luhoi a maka vinara a habi ne mua pali.

⁷ Mu tovo e huriki e tune mua vona a vinara nga. Mu vakalongo ria vona na tahuna mu made na tanga, na tahuna mu laho, na tahuna mu malo, na tahuna mu hadongo.

⁸ Mu kolotata puru na limane mua, mu kolo na dumene mua, ge manga a kilakila i uka ma mu gu longokaburungi.

⁹ Mu here a vinara nga na dahana logo na ruma ne mua, na poridala ne mua.

E Huriki a Israel Ri Gi Ramai a Vinara Lobo

¹⁰ “E BAKOVI DAGI a Vure ne hita, i kaba i ta muholi ne huriki a gare ne hita e Abraham, e Isak, e Iakop ge habia ne mua tara robo i tahoka a maka tanga dagi ri vonu na mahala, i uka ma mu ratea.

¹¹ A maka maki ri kamumu hateka bara ri vonu na ruma ne mua, ra maki i uka ma mu ru dili. Bara i tahoka ranga lomu ri tabuli vonga, i uka ma mu keli. Bara i tahoka a maka hania na vain a oliv, i uka ma mu leho vona. E BAKOVI DAGI ge taparaki lakea ne mua vona a robo iea, ge habi ne mua a maki nga. Na tahuna mu kani bara mu maru.

¹² Mu matadoko, naha ni lohopilea e BAKOVI DAGI. Ia kunana i bole tala mua o Egipto na tahuna ni vakavora mua vonga, i taparaki valai mua koea.

¹³ “Mu togoa e BAKOVI DAGI a Vure ne hita. Mu kavurike ia kunana, mu rata a nita muholi ne mua na rana kunana.

¹⁴ Naha ni ramai a vure ne huriki a tara ri made tabukoi ne mua.

¹⁵ Mua bara mu kavurike a vure nga, e BAKOVI DAGI bara i madihi hateka a hatena ne mua, bara i vakalobo mua manga a kanono i gutu vuro a maki. A vuhuna e BAKOVI DAGI a Vure ne hita i made turane hita, i bage ne hita nahea si gi kavurike a vure ranga.

¹⁶ “Naha ni toni a nitora ne BAKOVI DAGI a Vure ne hita, i manga a hini mu rata na tanga e Masa.

¹⁷ A tuhane mua nahea ge malulu, mu ramai muholi a maka vinara i habi ne mua turana a ngava lobo i habi.

¹⁸ Mu rata lobo a maka maki e BAKOVI DAGI i taki ri kamumu ri malamala. Muri a maki lobo mu ngaru ni rata bara ri bele kamumu. Bara mu bolea, ra malala kamumu e BAKOVI DAGI i kaba, i ta muholi vona ne huriki a gare ne mua, ge habia ne mua.

¹⁹ Bara mu lili vuroki e huriki a pile ne mua, i manga a nita i ta muholi vona ge rata.

²⁰ “Muri ma, na tahuna e huriki e tune mua bara ri nana maea mua, ‘I navai e BAKOVI DAGI, a Vure ne hita i ngaru si gi ramai a vinara nga?’

²¹ Mu koli ria mu ta maea, ‘Mi leho manga a vorakato na hariki o Egipto, lakea e BAKOVI DAGI i bole mule mia na nitora vona.

²² Muholi hateka, na matane mia, mi matai a maka nivakasiri legelege, a maka maki hale hateka i rata virihi e huriki a Egipto, i rata virihi a hariki ne ria, i rata virihi e huriki a bolekori vona.

²³ I bole tala mia na robo e Egipto, i taparaki valai mia koea, ge habia ne mia a malala iea, i ramaia a nita i ta muholi vona ne huriki a gare ne hita.

²⁴ Muri e BAKOVI DAGI a Vure ne hita, i taki hita si gi ramai lobo a vinara nga, si gi togoa. Hita bara si rata mavonga, bara i matakari kamumu hita vakaroro, bara si mahuri, i manga ngane.

²⁵ Hita bara si ramai kamumu a maka vinara lobo, e BAKOVI DAGI a Vure ne hita bara i vivi, bara i gale hita, ge hita a bakovi a ngatavine malamala.’”