Vinara 33 - A Nitana Vure

E Moses i Gamai a Maka Kabu ne Israel

¹ E Moses ra bakovi i vakalongo a nitana Vure, a parava vona ni mate i valai tabukoi, lakea i gamai e huriki a Israel,

² i taki ria i ta maea, “E BAKOVI DAGI i made na lolo e Sinai, i valai i bele manga a haro na robo e Idom. A parana na lolo e Paran i parai e huriki a tara vona. A agelo i ravulu e rangale (1,000) ri made turana. A kanono dagi i hube na limana a kanena.

³ A Vure i ngaru hateka e huriki a tara vona, re huriki ri malamala i matakari ria. Ri turume ri lolu puru na matana, ri ramai a maka vinara vona.

⁴ Iau e Moses a habi ne mua a maka vinara nga mu gu ramai. Ra vinara nga a nita muholi hateka ne hita e huriki a hamone Iakop.

⁵ E BAKOVI DAGI ia a hariki ne Iesurun. Na tahuna a maka kabu ne Israel turane huriki a gare ne ria ri vapopo, i matakari ria.”

⁶ E Moses i gamai a kabu ne Reuben i ta maea, “A kabu ne Reuben i kiroko, pali ra kabu iea i uka ma ge lobo.”

⁷ I taki a kabu ne Iuda i ta maea, “O BAKOVI DAGI o luhoi e huriki a Iuda ri nana ioe go tuhori ria. O bole valai ria ri gi dili turane huriki a tara ranga. O tuhori ria, ri vaubi ne huriki a pile.”

⁸ I taki a kabu ne Levi i ta maea, “BAKOVI DAGI, o habi na kabu ne Levi, re huriki a vora kamumu vomu, a kedo e Tumim e Urim, ra kedo nga ru vakasiri a ningaru vomu ne ria. O toni ria na tanga e Masa, na naru e Meriba.

⁹ Ri tora hateka ni ramai a nitamu a ngava dagi vomu. I uka ma ri ramai a ningaru ne tamane ria, ne turane ria, ne tune ria. Ri ramai kunana a ningaru vomu.

¹⁰ Ri gi tovo e huriki a Israel ri gi ramai a vinara vomu. Ri gi rungani a havu mangisipa na matamu, ri gi rata a nihabi gutu-vuro na dede vomu.

¹¹ BAKOVI DAGI, o kori e huriki na kabu ne Levi ri gi pesi tora, bara o vivi vona a leho ri rata. O pahadanu e huriki a pile ne ria i uka ma ri gi pesi rike tabu.”

¹² I taki a kabu ne Bensamin i ta maea, “BAKOVI DAGI o gamai e huriki na kabu ne Bensamin o made tabukoi ne ria, o matakari kamumu ria na parava vakaroro.”

¹³ I taki a kabu ne Iosep i ta maea, “BAKOVI DAGI, o habi a simuru na hunu, a naru na malala na kabu ne Iosep, ge vakabele a naru ge kupo na tabeke vona.

¹⁴ Ge ratea a haro i para langa na hania ne ria, ge rata a maka uve ri gi koru kamumu na maka keva lobo.

¹⁵ A maka lolo hosi ge kamumu a malala ne ria ni gi rata vonga a maka hania, ge koru kamumu vona a maka uve.

¹⁶ A maki ni kani kamumu ge vonu vona a malala ne Iosep. E BAKOVI DAGI i made pololilo na kai kiroko i nono, i taki iau ge rata kamumu hatekea a kabu iea, a vuhuna e Iosep i tahoka a rana ne huriki e turana.

¹⁷ A hamone Iosep ri gao hateka manga a tabua na bulmakau a toga i tahoka a pelengana. A kabu ne Manase ri ala kupo i manga a pelengana tara, a kabu ne Epraim ri ala kupo hateka i manga a pelengana tara. Na pelengana nga i rua i padi a kabu tebi, i kope lae ria ri laho viliha ri harena na nilobona malala.”

¹⁸ I taki a kabu ne Sebulun i ta maea, “Mua a kabu ne Sebulun ra leho ni vakuloi a maki turana a robo basi ge nunu kamumu. A leho na kabu ne Isikar ni vakuloi a maki ne huriki a tahotanga, ia tara ge nunu kamumu.

¹⁹ Ra kabu nga ru gu gale ranga kabu ri gi valai na lolo ne rua, ri gi rata a nihabi malamala. Ru gu rata a leho ni vakuloi a maki na mahala ru bole na dari na lavu. Bara ru bole hateka a moni vona a maka leho nga.”

²⁰ I taki a kabu ne Gad i ta maea, “A Vure i ratea a malala na kabu ne Gad i bele dagi, i mavonga mua lobo mu kavurikea a rana. A kabu ne Gad i manga a laion i dava i po a kanimatana ge rabalaki a kania vona, ge kinirape tala a vahana a kulina gina.

²¹ Na tahuna e huriki a matakari ne Isarel ri vapopo ni verua a malala, a kabu ne Gad ri vulakia tara tabekena malala i bolea. Ra tabekena malala a kabu ne Gad i bolea i kamumu hateka, i kara e huriki a matakari kunana ri gi bolea. A kabu ne Gad i ramai malamala a nita na vinara ne BAKOVI DAGI.”

²² I taki a kabu ne Dan i ta maea, “A kabu ne Dan i manga a tuna laion, i pe a robo e Basan i page page valai.”

²³ I taki a kabu ne Naptali i ta maea, “BAKOVI DAGI, o habi a maki kamumu ne huriki a Naptali. A Darilomu e Galili i tabuli na malala ne ria, a harena malala i polotaroa a naru i puru lokovonga popote.”

²⁴ I taki a kabu ne Aser i ta maea, “BAKOVI DAGI, o rata kamumua a kabu ne Aser. A maka kabu lobo ne Israel ri ngarua. A maka kai a oliv ge kupo na malala vona ge bole a naruna ge kupo.

²⁵ A nure na tanga ne ria ge tahoka a logo dagi ni gi rata na aen. Ri gi made kamumu vakaroro, i uka ma ri gi mangenge.

²⁶ “Mua o huriki a Israel i uka tara vure ge manga a Vure ne Iesurun. I tahoka a nitora dagi i made pololilo na nipara dagi, i laho puru rike na bubu ge tuhori hita.

²⁷ A Vure i made vakaroro, i nugutata hita vakaroro na limana i uka ma i pe hita. Na tahuna mu vano mu bolea a malala ne mua, bara i lili tala e huriki a pile ne mua, i taki mua bara mu rabalaki lobo ria.

²⁸ Muri a kabu ne Iakop ge made kamumu, e huriki a pile i uka ma ri gi valai ri gi vaubi turane ria. Ra tabeke iea a simuru i boru i vakamea a malala i koru kamumu vona a maka vit a vain.

²⁹ Mua o huriki a Israel, mu vivi hateka, e BAKOVI DAGI i uka ma i tuhoria tara kabu, ge manga a hini i tuhori mua. E BAKOVI DAGI i manga a galeu ne mua i manga a bainat ne mua. I tagari mua na tahuna na vabinga, i rata mua mu rangi ria. E huriki a pile ne mua bara ri tangi valai ne mua ri taki mu gu dodo ria. Pali mua bara mu pahadanu ria mu ratapile ria.”