Ni Gi 5 - A Nitana Vure

E Huriki Ri Muto

¹ E BAKOVI DAGI i takia e Moses i ta maea,

² “O vakuku e huriki a Israel ri gi tono tala e huriki ri tahoka a gilanga na patala, ri tahoka a kume i rali tala na ngarava, a kakaine ria i rali tala vona a naru o a dara, e huriki ri padoi a viri i mate. Re huriki nga, i uka ma ri matapado na matagu, ri gi made polovavo na mada.

³ Mu tono tala e huriki a bakovi a ngatavine ri muto, ma ri gi ratea a mada na hini a made vona ge muto.”

⁴ Lakea e huriki a Israel ri muri mai a ngava e BAKOVI DAGI i taki e Moses vona, ri tono tala e huriki ri tahoka a maka gilanga maea.

A Vinara na Nivalemu

⁵ E BAKOVI DAGI i takia e Moses i ta maea,

⁶ ge taki e huriki a Israel, ge ta maea, “A viri i ngalahere nau, i rata a naro hale na viri tara, lakea i matakilaka vona a naro hale vona, a bakovi iea i tahoka a ngava.

⁷ Ge taki tala a naro hale vona, ge konea a naro hale i ratea. Ge habi a moni ge karea a naro hale i ratea. Ge ru langa tabu ge popote ( ), ge habi lakea na viri i rata a naro hale vona.

⁸ Pali na tahuna a viri i bole a moni i mate pali, i uka viri vona ge bole a mapa, a bakovi i habi a moni ge habi ne BAKOVI DAGI, ge bole e huriki a prister. Ge habi tabua a sipsip a toga, ge a nihabi ne vona ni kavitagu a naro hale vona.

⁹ Na tahuna e huriki a Israel ri taparaki valai a maki ni gamai ri gi habi nau, ra maki nga ne vone huriki a prister ra ri bole na limane ria.

¹⁰ A prister takutaku ge bole a nihabi nga ge ne vona.”

A Vinara na Bakovi i Bage ne Girihina

¹¹ E BAKOVI DAGI i takia e Moses ge taki e huriki a Israel, ge ta maea,

¹² “A ngatavine tara ge ruru ge rata a naro na molenga,

¹³ lakea i mahita kapiloho turana a bakovi tara, e girihina i uka ma i masia, i katoki, i muto ngane. Ge uka tara viri ge matai rua,

¹⁴ lakea e girihina i bage vona a ngatavine iea ra i vakamuto mule ia, o ge bage tavula vona e girihina, pali e girihina i uka ma i vakamuto mule ia,

¹⁵ ge tuli lakea na prister a ngatavine. A bakovi ge bole a kilo ge taku na plaoa ni rata na barli, ge a nihabi. Pali nahea ge guru langa a namona oliv vona a nihabi iea, o ge ru a havu mangisipa, a vuhuna ra nihabi iea ne vona a bakovi i bage ne girihina, i ratea a nihabi ni gi matakilaka vona e girihina i rata a naro hale, o i uka.

¹⁶ “A prister ge tuli vilia a ngatavine ge pesi na matagu tabukoi na dede.

¹⁷ A prister ge guru dili na ulo kiroko a naru ni gamai. Ge dili na kape ge bole ranga malala, ge ru na naru bara i nami hurari a naru.

¹⁸ Na tahuna a ngatavine i tabana ni pesi na matagu, a prister ge vuka a vuna ngatavine ni viri, ge tabuli tavula a vuna. A prister ge bole a plaoa na nihabi na bakovi i bage ne girihina, ge ru na limana ngatavine. A prister ge nugua a ulo na naru vagole. Ra naru iea ne vona ni ruduraha.

¹⁹ A prister ge ratea a ngatavine ge kaba ge ta maea, ‘Ioe i uka ma o mahita turana tara bakovi, i uka ma o vakamuto mule ioe na tahuna o made na tarune kakaimu, a naru ni ruduraha i uka ma ge ratapile ioe.

²⁰ Pali ioe bara o ruru o rata a naro na molenga na tahuna o made na tarune girihimu, o vakamuto mule ioe, o mahita turana a bakovi tara i uka ma e girihimu.’

²¹ Ngane a prister ge hudotala a ngava tabu, ge ta maea, ‘Ioe bara o ratea a naro iea, e BAKOVI DAGI i kara ni rata ioe a maki tavula liu na matane huriki, bara i dili na kavutumu i ratea a palomu i repo, ge veo a tagamu.

²² Ra naru iea ge rata ioe, bara i dili na kavutumu i ratea a tamudimu i repo, bara i veu a tagamu.’ “A ngatavine ge koli ge ta maea, ‘I muholi. E BAKOVI DAGI ge rata mavonga.’

²³ “A prister ge herea ra ngava hateka iea na raukea, ge vahiloloa a nihere na ulo i tahoka a naru vagole vona.

²⁴ Muri a prister ge habia na ngatavine a naru iea, ge nua, ge vakahalea a kavutuna.

²⁵ Pali muga, a prister ge bolea a plaoa na nihabi na limana ngatavine, ge tabari iau vona. Muri ge bole lakea na dede.

²⁶ Ge bole a plaoa popote ge ratea e BAKOVI DAGI ge luhoia, ge gutu na dede ge a nihabi. Muri ge habia na ngatavine a naru vagole iea ge nua.

²⁷ Bara a ngatavine iea i mahita muga turana tara bakovi, a naru iea bara i rata ia i bole a nimadihi dagi, bara i repo a kavutuna, i veo a tagana. Na tahuna e huriki a viri vona ri ngaru ni harogi a viri tara bara ri ta maea, “A Vure ge rata hale ioe, i manga a hini i rata halea a ngatavine iea.

²⁸ Pali bara ngatavine iea i uka ma i ratea tara naro hale, ra ngatavine iea i matapado na matagu, bara i uka ngava na matane BAKOVI DAGI, bara i kara ni singou, ni poda a koma.

²⁹ “Na tahuna a ngatavine i mahita turana tara bakovi, e girihina i bage vona, mu ramai kunanea a vinara iea.

³⁰ Mu ramai tabua a vinara iea na tahuna a bakovi i tahoka a niluhoi hale i bage ne girihina ta i mahita turana a bakovi tara. A bakovi ge luhoi maea, ge tulia a ngatavine ge pesi na matagu tabukoi na dede, ge rata a prister a maki nga.

³¹ E girihina ngatavine bara i uka ngava, pali na tahuna a ngatavine i tahoka a ngava, bara i bole a mapana na naro hale i ratea.”