Ni Gi 34 - A Nitana Vure

A Nagi na Malala e Kenan

¹ E BAKOVI DAGI i takia e Moses,

² ge vakuku e huriki a Israel ge ta maea, “Na tahuna mu dili na malala e Kenan, a malala ni gi habi ne mua, bara ni nagi maea:

³ “A nagi i tubu tano liu na malala golea ne Sin i ramai a nagi ne Idom. Na nirikena haro, a nagi i tubu tano na ruperena Dari Mate.

⁴ Muri i polo tano na bala na lolo e Akrabim, i padi kudua a kurukuruna tabeke ne Sin i vano i harena na tabeke mule puru ne Kades-Barnea. A nagi i kaogo lakea na tanga e Hasar-Adar i harena na tanga e Asmon.

⁵ A nagi i kaogo vonga i ramaia a naru mara e Vadi o Egipto, i vano i lobo na Dari na Kurukuruna Malala.

⁶ “A lavu na Dari na Kurukuruna Malala, i tabuli manga a nagi ne mua na tabeke na nirolona haro.

⁷ “A nagi na tabeke mule sike i pe mulea a Dari na Kurukuruna Malala, i lakea maia a lolo e Hor.

⁸ Muri i pe mulea e Hor i lakea ne Lebo-Hamat. A nagi i vano i polo lakea na tanga e Sedad,

⁹ e Sipron i harena na tanga e Hasar-Enan. A nagi iea, a nagi ne mua na tabeke mule sike.

¹⁰ “A nagi na nirikena haro i tubu o Hasar-Enan i lakea maia a tanga e Sepam.

¹¹ A nagi i pe mulea e Sepam i puru lakea na tanga e Ripla, na tabeke na nirikena haro na tanga e Ain, i puru lakea na maka kupona na dahana darilomu e Kineret na tabeke na nirikena haro.

¹² A nagi i puru i ramaia a naru e Iordan, i harena na Dari Mate. Ra nagi nga, a maka nagina harena malala ne mua, na tabeke lobo.”

¹³ Lakea e Moses i vakuku e huriki Israel i ta maea, “E BAKOVI DAGI i ru a nagi na malala ne mua a kabu i polova turana a kalavana kabu ne Manase. Mu rehi na rihiva na satu mu vulaki a tabekena malala ne mua.

¹⁴ A kabu ne Reuben, a kabu ne Gad, a kalavana kabu ne Manase to bole pali a malala ne tou.

¹⁵ To bole pali a malala na tabeke na nirikena haro, na gagana e Iordan, tabukoi o Ieriko.”

E Huriki a Nupesi Ri Gi Veru a Malala

¹⁶ E BAKOVI DAGI i takia e Moses i ta maea,

¹⁷ “E Eleasar a prister, e Iosua e tune Nun, ru gu verua a malala ne huriki.

¹⁸ O bole tala takutaku na maka kabu a bakovi ge tuhori rua.

¹⁹ A rane huriki a bakovi ra nga: Na kabu ne Iuda, e Keleb, e tune Iepune.

²⁰ Na kabu ne Simion, e Selumuel, e tune Amihud.

²¹ Na kabu ne Bensamin, e Elidat, e tune Kilson.

²² Na kabu ne Dan, a nupesi e Buki, e tune Iokli.

²³ Na kabu ne Manase a hamone Iosep, a nupesi e Haniel, e tune Epod.

²⁴ Na kabu ne Epraim, a nupesi e Kemuel, e tune Siptan.

²⁵ Na kabu ne Sebulun, a nupesi e Elisapan, e tune Parnak.

²⁶ Na kabu ne Isikar, a nupesi e Paltiel, e tune Asan.

²⁷ Na kabu ne Aser, a nupesi e Ahihud, e tune Selomi.

²⁸ Na kabu ne Naptali, a nupesi e Pedahel e tune Amihud.”

²⁹ E huriki a nupesi nga, e BAKOVI DAGI i vakuku ria ri gi veru a malala ne Kenan ne huriki a Israel.