Ni Gi 33 - A Nitana Vure

A Nilaho ne Huriki a Israel

¹ Iea ngane a nilaho ne huriki a Israel ri pe e Egipto. Ri laho na tara takutaku, i matakari ria e Moses e Aron.

² E Moses i here puru a nilaho ne ria, a vuhuna e BAKOVI DAGI i vakukua ge rata mavonga. Iea ngane a nilaho ne ria, i ramai a hini ri rata a mada vona.

³ E huriki a Israel ri pea a tanga e Remeses na ravulu i pololimana parava na mugana keva, na parava muri na Habu na Nipagepolo. Ri laho tala vaganagana na matane huriki a Egipto lobo.

⁴ Na tahuna iea e huriki a Egipto ri tanu e huriki e tune ria a tabua, ra i rabalaki e BAKOVI DAGI. I ratapile tabu a maka vure ne ria, ge vakasiri a nitora vona.

⁵ E huriki a Israel ri pea e Remeses, ri rata a mada o Sukot.

⁶ Ri pea e Sukot, ri rata a mada o Etam na harena tabeke i ngeki.

⁷ Ri pea e Etam, ri hamule mae e Pihahirot na tabeke na nirikena haro na tanga e Balsepon, ri rata a mada o Migdol.

⁸ Ri pea e Pihahirot ri polo kudua a Dari Vururu, ri vano ri bele na tabeke i ngeki. Ri laho na parava i tolu na tabeke i ngeki ne Etam, ri rata a mada o Mara.

⁹ Ri pea e Mara, ri rata a mada o Elim. Ra tanga iea i tahoka a naru bele i ravulu a polona i rua, a maka kai a det ri ravulu polorua.

¹⁰ Ri pea e Elim, ri rata a mada tabukoi na Dari Vururu.

¹¹ Ri pea a Dari Vururu, ri rata a mada na tabeke i ngeki ne Sin.

¹² Ri pea a tabeke i ngeki ne Sin, ri rata a mada o Dopka.

¹³ Ri pea e Dopka, ri rata a mada o Alus.

¹⁴ Ri pea e Alus, ri rata a mada o Repidim. Ra tanga iea i uka naru ge ninu e huriki.

¹⁵ Ri pea e Repidim, ri rata a mada na tabeke i ngeki ne Sinai.

¹⁶ Ri pea a tabeke i ngeki ne Sinai, ri rata a mada o Kibrot-Hatava.

¹⁷ Ri pea e Kibrot-Hatava, ri rata a mada o Haserot.

¹⁸ Ri pea e Haserot, ri rata a mada o Ritma.

¹⁹ Ri pea e Ritma, ri rata a mada o Rimon-Peres.

²⁰ Ri pea e Rimon-Peres, ri rata a mada o Libna.

²¹ Ri pea e Libna, ri rata a mada o Risa.

²² Ri pea e Risa, ri rata a mada o Kehelata.

²³ Ri pea e Kehelata, ri rata a mada na lolo e Seper.

²⁴ Ri pea a lolo e Seper, ri rata a mada o Harada.

²⁵ Ri pea e Harada, ri rata a mada o Makelot.

²⁶ Ri pea e Makelot, ri rata a mada o Tahat.

²⁷ Ri pea e Tahat, ri rata a mada o Tera.

²⁸ Ri pea e Tera, ri rata a mada o Mitka.

²⁹ Ri pea e Mitka, ri rata a mada o Hasmona.

³⁰ Ri pea e Hasmona, ri rata a mada o Moserot.

³¹ Ri pea e Moserot, ri rata a mada o Bene-Iakan.

³² Ri pea e Bene-Iakan, ri rata a mada o Hor-Hagidigad.

³³ Ri pea e Hor-Hagidigad, ri rata a mada o Iotbata.

³⁴ Ri pea e Iotbata, ri rata a mada o Abrona.

³⁵ Ri pea e Abrona, ri rata a mada o Esion-Geber.

³⁶ Ri pea e Esion-Geber, ri rata a mada o Kades na tabeke i ngeki ne Sin.

³⁷ Ri pea e Kades ri rata a mada na lolo e Hor, na nagi na malala ne huriki a Idom.

³⁸ Ri made na hini nga. Na mugana parava na limana keva, na pida i ravulu va muri ne ria ri pe e Egipto, e Aron a prister i longototo a nitane BAKOVI DAGI, i sike na lolo e Hor. Muri i mate vonga.

³⁹ A pida vona i 123, na tahuna i mate na lolo e Hor.

⁴⁰ A hariki na robo e Arad na tabeke mule puru ne Kenan i longo a velengane huriki a Israel ri valai.

⁴¹ E huriki a Israel ri pea a lolo e Hor, ri rata a mada o Salmona.

⁴² Ri pea e Salmona, ri rata a mada o Punon.

⁴³ Ri pea e Punon, ri rata a mada o Obot.

⁴⁴ Ri pea e Obot, ri rata a mada o Ie-Abarim na malala ne huriki a Moab.

⁴⁵ Ri pea e Ie-Abarim, ri rata a mada o Dibon-Gad.

⁴⁶ Ri pea e Dibon-Gad, ri rata a mada o Almon-Diplataim.

⁴⁷ Ri pea e Almon-Diplataim, ri rata a mada na lolo e Abarim, tabukoi o Nebo.

⁴⁸ Ri pea a lolo e Abarim, ri rata a mada na bilane Moab, tabukoi o Ieriko na gagane Iordan.

⁴⁹ Ri rata a mada na gagana naru e Iordan, tabukoi o Bet-Iesimot i vano i harena o Abel-Sitim.

E Huriki a Tahotanga Ni Gi Lili Tala

⁵⁰ Ri made na bilane Moab tabukoi o Ieriko na dahana naru e Iordan, lakea e BAKOVI DAGI i vakukua e Moses,

⁵¹ ge taki maea e huriki a Israel, “Na tahuna mu tulu poloa a naru e Iordan, mu dili na robo e Kenan,

⁵² mu lili tala e huriki a tahotanga. Mu ratapile a maka hanuna vure ne ria, a murina ni vasileki ne ria.

⁵³ Muri mu bolea a malala mu made vona, a vuhuna e BAKOVI DAGI i habia mua a malala iea.

⁵⁴ Mu rehi na rihiva na satu, mu vaveru vona a malala na kabu takutaku ne mua. A kabu ge kupo e huriki a bakovi a ngatavine vona, mu habi a malala dagi. A kabu kiroko, mu habi a malala ge namimule. A ra malala ri gi bolea, nahea ri gi vagege lae vona. Mu veru tala a malala, ge ramai a rana vuhuna kabu takutaku ne mua.

⁵⁵ “Pali mua i uka ma mu gu lili tala e huriki a tahotanga, bara ri habi a maregoa ne mua manga a barakau i kau a matane mua, a kamagane mua. Bara ri vaubi ne mua vona a robo iea mu made vona.

⁵⁶ I mavonga, a maki ta ga ratea ne ria, bara ratea ne mua.”