Ni Gi 30 - A Nitana Vure

A Vinara na Nikaba

¹ E Moses i taki e huriki a nupesi na kabu takutaku ne Israel, i ta maea, “E BAKOVI DAGI i vakuku hita:

² Na tahuna a bakovi tara i rata a nita muholi ge habia ne BAKOVI DAGI tara maki, o i ta muholi vona tara maki i uka ma ge ratea, ge ramai a nita muholi i ratea.

³ “Na tahuna a sirula i tabana na ruma e tamana, lakea i ta muholi ne BAKOVI DAGI ge ratea tara maki, o i ta muholi ge pilea tara maki,

⁴ pali e tamana i longo vona a ngava iea, lakea i uka ma i ta, a nita muholi na sirula iea bara i tabana.

⁵ Pali e tamana ge longo vona a nita muholi ne tuna a sirula, lakea i ta pupukari vona, a nita muholi lobo vona i uka ma ge tabuli. E BAKOVI DAGI bara i puga vuroki a nita muholi vona a vuhuna e tamana i ta pupukari vona.

⁶ “Na tahuna a sirula i ta muholi vona tara maki ge ratea, o i kaba tavula na maki tara, muri i parangi,

⁷ lakea e girihina i longo vona a nita muholi vona, pali na parava iea i uka ma i ta, a nita muholi na ngatavine iea bara i tabana.

⁸ Pali e girihina ge longo vona a nita muholi i rata hosi a ngatavine iea, lakea na parava iea i ta pupukari ia vona, ngane a nita muholi, o a nikaba tavula vona bara i uka nitora. E BAKOVI DAGI bara i puga vuroki a nita muholi vona a ngatavine iea.

⁹ “Na tahuna a havuri, o a ngatavine i pilea e girihina, i kaba ge ratea tara maki o i ta kari mule vona nahea ge ratea tara maki, ge ramai kunana a nita muholi vona.

¹⁰ “Na tahuna a ngatavine i parangi i kaba ni ratea tara maki,

¹¹ lakea e girihina i longoa a nita muholi vona, i uka ma i ta pupukari vona, a nita muholi lobo vona ge tabuli.

¹² Pali na tahuna e girihina i longo vona a nita muholi vona, lakea na parava iea i ta pupukari vona, a nita muholi lobo na ngatavine i uka ma ge tabuli, e BAKOVI DAGI i puga vuroki a nita muholi vona, a vuhuna e girihina i ta pupukari vona.

¹³ E girihina ngatavine iea i kara ge longo maia a nita muholi na ngatavine o ge ta pupukari vona a nikaba na ngatavine.

¹⁴ Pali na tahuna a bakovi i uka ma i rata malaviriria tara ngava ge lakea na ngatavine na tahuna i longoa a nita muholi vona, a ngatavine ge ratea a maki i ta muholi vona ge ratea. E girihina ngatavine i vakatorea, a vuhuna i uka ma i ta pupukari na parava i longo vona a nita muholi na ngatavine.

¹⁵ Pali a bakovi ge ta pupukari vona muri na parava ranga, ia kunana i tahoka a ngava na naro hale na hini i putu puru a nita muholi.

¹⁶ Ra vinara nga e BAKOVI DAGI i habi ne Moses, i taki virihi a bakovi rua e girihina, a bakovi rua e tuna ngatavine, ra i tababana ni made na ruma vona.