Ni Gi 13 - A Nitana Vure

E Huriki a Kasisi Ri Lakea o Kenan

¹ E BAKOVI DAGI i takia e Moses,

² “Ioe o lohoka vona ra robo e Kenan ga habia ne mua e huriki a Israel. I mavonga o vulaki tala a ubu na tara takutaku na kabu i ravulu a polona i rua, o rudu ria ri gi vano ri gi kasisia a robo e Kenan.”

³ Na tahuna ri made na tabeke i ngeki ne Paran, i longototoa a ngava ne BAKOVI DAGI i rudu a ubu na tara ne huriki a Israel, ri vano.

⁴ A rane ria ra nga: e Samua e tune Sakur, ni bole tala na kabu ne Reuben.

⁵ E Sapat e tune Hori, ni bole tala na kabu ne Simion.

⁶ E Keleb e tune Iepune, ni bole tala na kabu ne Iuda.

⁷ E Igal e tune Iosep, ni bole tala na kabu ne Isikar.

⁸ E Hosea e tune Nun, ni bole tala na kabu ne Epraim.

⁹ E Palti e tune Rapu, ni bole tala na kabu ne Bensamin.

¹⁰ E Gadiel e tune Sodi, ni bole tala na kabu ne Sebulun.

¹¹ E Gadi e tune Susi, ni bole tala na kabu ne Iosep, ra kabu ne Manase.

¹² E Amiel e tune Gemali, ni bole tala na kabu ne Dan.

¹³ E Setur e tune Mikael, ni bole tala na kabu ne Aser.

¹⁴ E Nabi e tune Vopsi, ni bole tala na kabu ne Naptali.

¹⁵ E Guel e tune Maki, ni bole tala na kabu ne Gad.

¹⁶ E Moses i rudu e huriki a bakovi nga, ri vano ri gi kasisi a maka tabeke lobo ne Kenan. E Moses i vunu herea e Hosea e tune Nun, i galea e Iosua.

¹⁷ Na tahuna e Moses i rudu ria ri gi kasisi a robo e Kenan, i taki ria i ta maea, “Mu sike lakea na tabeke ne Negev, mu polo sike na lolo.

¹⁸ Mu matai kamumua ra tanga iea, mu matakilaka vona ra tanga iea i navai. Mu matai kamumu e huriki a bakovi vonga ri gao o i uka, ri ala kupo o i uka.

¹⁹ Mu matai kamumua a malala na robo iea, i kamumu o i hale. Mu matai kamumu a maka tanga ne ria ni tura halui o i uka.

²⁰ Mu matai kamumua a malala i kamumu ni varo a maki vona o i uka, i vona kai o i uka. Mu toni a pakianga ne mua, mu bole mule ranga kanena kai na robo iea.” Na tahuna iea, i tubu ni rara a maka vain.

²¹ Lakea e huriki a bakovi nga ri vano ri matai a maka tabekena malala lobo, i vakatubu na tabeke i ngeki ne Sin na tabeke mule puru, i lakea i harena na tanga e Rehob, tabukoi na ngutuna dala, i lakea na tanga e Lebo-Hamat na tabeke mule sike.

²² Muga ri lakea na tabeke ne Negev, ri vano ri bele na tanga e Hebron. E huriki a tara ne Ahiman, ne Sesai, ne Talmai ri made o Hebron. Re huriki nga, ria a hamona bakovi hateka tara, a rana e Anak. Ra tanga e Hebron ni rata muga, muri na pida i polorua e huriki a Egipto ri ratea a tanga e Soan.

²³ Lakea e huriki a kasisi ri vano ri bele na maloku ne Eskol, ri valikudua a rahana kai a vain i parukaruka vona a kanena. Ra rahana iea i mava hateka, a bakovi i taku i uka ma i kara ge kaloho kiria. Lakea a bakovi ala rua ru koloa na binole ru kalohoa. Ri pasi tabu a maka kanena kai a pik, a maka kanena kai a pomigranet.

²⁴ Muri e huriki a Israel ri vunua ra maloku iea e Eskol, a vuhuna e huriki a kasisi ri valikudu a rahana kai a vain vonga.

E Huriki a Kasisi Ri Hamule

²⁵ I lobo a parava i ravulu va, e huriki a bakovi ri hamule ni kasisi a robo.

²⁶ Muri ri hamule valai ne Moses, e Aron, ne huriki a Israel, ri made na tanga e Kades na tabeke i ngeki ne Paran, ri vakalongo ria na maka maki ri matai, ri vakasiri a maka kanena kai ri bole.

²⁷ Lakea ri takia e Moses ri ta maea, “Ra robo o rudu lakea mia vona ta ga mi gi masia, mi masia pali. A malala vona i kamumu hateka, i kamumu ni varo a maki ni kani. O matai a maka kanena kai mi bole vonga.

²⁸ Pali e huriki na robo iea ri gao hateka. A maka tanga ne ria ni tura halui na nure ri tora hateka. Mi matai vonga e huriki a hamone Anak.

²⁹ E huriki a Amalek ri made mule puru na tabeke ne Negev. E huriki a Hiti, a Iebus, a Amor ri made na lolo. E huriki a Kenan ri made tabukoi na dari na Kurukuruna Malala, pali i ranga ri made na gagane Iordan.”

³⁰ E huriki a Israel ri longo a maka nitane huriki a matakari ri mangenge, ri rata viliha a ngava. Lakea e Keleb i tahate ria na matane Moses i ta maea, “I navai mu ta hateka? Ngane si gi lokovonga, si gi vaubi turane ria, si gi bolea a malala ne ria, a vuhuna si tahoka a nitora, si kara ni rangi ria, si gi bolea a malala iea.”

³¹ Pali i ranga kasisi ri vano turane Keleb ri masia a robo iea ri ta maea, “E huriki na tanga iea ri gao hateka. I uka ma si kara ni vaubi turane ria.

³² Re huriki nga ri marapusi, ri tami e huriki a Israel vona a robo ri masia. Ri ta maea, A malala na robo iea i hale liu. I uka ma i koru kamumu vona a maka maki. E huriki a bakovi mi matai vonga ri koru dagi ri ola hateka.

³³ Re huriki a bakovi nga, e huriki a Nepilim, a hamone Anak. Mi matai ria, mi luhoi mule mia, mia a maki tavula liu, mi manga a koa. Ria ranga ri matai mia, mi manga a koa.”