Mateo 28 - A Nitana Vure

E Isu i Mahuri Mule

¹ A Parava Nimalo i lobo. Na hate­langa pokopoko na mugana parava na vik, e Maria Magdala rua e Maria tara ru vano ru gu gosia a babe.

² I pori vakaturutu a vuruke, a vuhuna a agelo ne Bakovi Dagi i puru valai na hunu, i kule vurokia a kedo dagi ni tukari a matana babe vona. Muri i made langa vona.

³ A agelo i parahidi manga a vila. A varakia vona i kea manga a havu.

⁴ E huriki a tagari ri mangenge hateka, i vakulu a tagane ria, i vurea a matane ria, ri mate.

⁵ Pali a agelo i taki rua, i ta maea, “Naha ni mangenge. A lohoka marua, muru matakanea e Isu, ra ni paditata na kai tavalavala.

⁶ I uka ma ia koea, a vuhuna i mahuri mule pali, i manga a hini i taki muga. Muru valai muru masia a murina i tabuli muga vona a podana.

⁷ Muri muru vano malaviriri, muru vaka­longo e huriki a murimuri vona, muru ta maea, ‘E Isu i mahuri mule pali na nimate. I muga lakea o Galili. Mu vano, mu masia vonga.’ Ngane a vakalongo pali marua.”

⁸ Ra ngatavine nga ru mangenge, pali ru vivi hateka. Ru pea a babe, ru nunu hamule lakea ne huriki a murimuri, ru vaka­longo ria.

⁹ Ru tabana ni nunu na dala, e Isu i luve vakaturutu ne rua, i ta maea, “Hate­langa.” Lakea ru valai vona, ru nugu­tata a vahana, ru kavu­rikea.

¹⁰ Muri e Isu i taki rua, i ta maea, “Naha ni mangenge. Muru vano muru vakalongo e huriki a turagu ri gi lakea o Galili, ri gi matai iau vonga.”

A Nita ne Huriki a Tagari

¹¹ Ru tabana ni lalaho lokovonga, lakea e huriki a tagari ranga ri lakea o Ierusalem, ri vakalongo e huriki a prister dagi vona a maki i bele.

¹² Lakea e huriki a prister dagi ri vapopo turana e huriki a gare, ri vata vona a maki ri gi ratea. Muri ri habi ne huriki a nugumaheto a moni dagi,

¹³ ri ta maea, “Mu taki e huriki, mu ta maea, ‘E huriki a murimuri vona ri vali na rodo ri panahoa a podana na tahuna mi mahita.’

¹⁴ Ra ngava iea, ge longoa e Pilato, naha ni loho lege. Bara mi vano, mi vakalongo kamumua, bara mu uka ngava.”

¹⁵ Lakea e huriki a nuguma­heto ri bole a moni, ri muri mai a ngava ni taki ria vona. Ra ngava taminga iea, i nunu viliha lae ne huriki a Iuda, i valai i harena mona.

E Isu i Habi a Leho

¹⁶ Muri e huriki a murimuri ala ravulu a polona i taku ri lakea o Galili. Ri bele vona a lolo e Isu i taki ria ri gi luve vona.

¹⁷ Na tahuna ri masia e Isu, ri kavurikea. Pali e huriki ranga ne ria ri loho rua.

¹⁸ Muri e Isu i valai mai ria, i ta maea, “A Vure i habi nau a nitora lobo na hunu a malala.

^19-20 I mavonga mu vano, mu lakea na tanga lobo na malala. Mu vahilolo e huriki na rane Tata, ne Tuna, na Hanu Kiripiripi. Mu tovo ria ri gi ramai a ngava lobo a habi ne mua. I mavonga bara mu rata ria ge ria e huriki a murimuri nau. Mu longo. Iau ga made vakaroro turane mua, ge vano ge harena na nilobona malala.”