Mateo 20 - A Nitana Vure

E Huriki a Voravora na Hania na Vain

¹ “A harikianga na hunu i manga a tahona malala i vuho tala ge matakana e huriki a vora ri gi leho na hania na vain vona.

² I taki ria ge kona ria na denarius i taku. Ri longo, lakea i rudu ria ri gi leho na hania na vain.

³ “Muri na kilala i polova na hatelanga i vano tabu, ge matakana e huriki a vora. I matai e huriki a bakovi ri pesi tavula na mada,

⁴ lakea i taki ria, i ta maea, ‘Mua ranga mu valai, mu leho na hania na vain nau. Bara kona kamumu mua.’

⁵ Lakea ri vano, ri leho. “I rata mavonga tabu na kuru haro. I vano tabu na kilala i tolu na malunga.

⁶ Na malunga, na kilala i lima, i vano tabu. I matai e huriki ranga ri pesi tavula, lakea i nana ria, ‘I navai mu pesi tavula mavonga koea na parava iea?’

⁷ “Ri koli, ri ta maea, ‘I uka tara viri ge taki mia mi gi leho vona.’ “Lakea i taki ria, ‘Pali. Mua ranga mu valai mu leho na hania na vain nau.’

⁸ “Na malunga liu ngane, i takia a matakari na vora, i ta maea, ‘O gale palupu e huriki a vora, o kona ria. O vakatubu ne huriki ri bele muri.’

⁹ “E huriki a vora ni bole na malunga ri valai muga ri bole a mapane ria. Ni habi ne ria takutaku a denarius i taku.

¹⁰ Muri e huriki ri leho muga ri valai, ni gi kona ria. Ri pahadaki ta ri gi bole a moni dagi, pali ria ranga, ri bole takutaku a denarius i taku kunana.

¹¹ Na tahuna ri bole a mapane ria, ri vakatubu ni deke,

¹² ri ta maea, ‘Re huriki nga o bole na malunga liu, ri leho kunana na kilala i taku, lakea ke o kona ria i manga o kona mia. Pali mia, mi leho tabaka, i kani mia a haro.’

¹³ “Lakea i koli i takia a viri tara ne ria, i ta maea, ‘Turagu, iau i uka ma rata hale ioe. Muga o longo vona a denarius a taki ioe ga kona ioe vona.

¹⁴ O bolea a mapamu, o vano. A ningaru nau kunana a kona mua na mapa i taku.

¹⁵ Ra moni nga, a moni nau. I navai, go taki iau a ra ga ratea vona? I navai ke? I madihi a hatemu a vuhuna iau a hatebalala?’

¹⁶ “I mavonga kunana, e huriki ri muri bara ri muga. E huriki ri muga bara ri muri.”

E Isu i Taki Mugea a Nimatena

¹⁷ E Isu i lalaho sike o Ierusalem. I tuli lakea na gaga e huriki a murimuri vona ala ravulu a polona i rua, i taki ria, i ta maea,

¹⁸ “Ngane si gi sike o Ierusalem. A Tuna Bakovi bara ni habi na limane huriki a prister dagi, a mari na vinara. Bara ri taki ni gi rabalaki ia.

¹⁹ Muri bara ri habia na limane huriki i uka ma ria a Iuda, ri gi padikedea, ri gi hotua, ri gi paditatea na kai tavalavala. Muri na parava i tolu, a Vure ge vakamahuri mulea.”

E Kinane Iakobus Rua e Ioanes

²⁰ Muri e girihine Sebedi, i tuli valai ne Isu e tuna rua. I pasike puru na ngalane Isu, i nanea ge ratea vona tara maki.

²¹ Lakea e Isu i nanea, “A ra o ngarua?” I koli, i ta maea, “A ngaru e tugu nga ru gu made turamu na harikianga vomu. Ge made na kanemu tara, na maurimu tara.”

²² E Isu i koli, i ta maea, “I uka ma moto lohoka vona a maki moto nana vona. A nimadihi i tabukoi ga bolea, i kara marua muru gu kalohoa, o i uka?” Ru koli e maki tari rua, ru ta maea, “I kara maria.”

²³ Lakea e Isu i taki rua i ta maea, “I muholi hateka muru gu kalohoa a nimadihi manga iau. Pali e rei ge made na kanegu, a maurigu, i uka ma a maki nau ga habi. A gula nga e Tata i rata puru na viri i vulaki pali.”

²⁴ Na tahuna e huriki a murimuri ala ravulu ri longoa, i madihi a hatene ria.

²⁵ Pali e Isu i gale palupu ria, i taki ria, “Mu lohoka vona e huriki i uka ma ria a Iuda, a hariki ne ria ri matakari hateka ria. E huriki a bakovi dagi ne ria ri rata polo mugamuga.

²⁶ Pali mua, i uka ma mu gu rata mavonga. E rei a viri i ngaru ge ia a viri dagi ne mua, ge leho manga a vora ne mua.

²⁷ E rei a viri i ngaru ni muga ne mua ge ia a vora ne mua,

²⁸ ge manga a Tuna Bakovi. Ra Tuna Bakovi, i valai i uka ma ge vakavora e huriki. I valai ge ia a vora ne huriki, ge mate, ge kona­mule e huriki ala kupo.”

E Isu i Vakamatapara a Kepa

²⁹ Na tahuna e Isu, e huriki a murimuri vona ri pea e Ieriko, e huriki ri ala kupo ri muri vona.

³⁰ A kepa ala rua ru mamade na dahana dala. Na tahuna ru longoa e Isu i laho polo, ru gale tala, ru ta maea, “O Bakovi Dagi, hamone Davit, o dodo maria!”

³¹ Pali e huriki ri tahate rua, ri taki rua ru gu vulai. Pali ru gale hinituhana tabu, ru ta maea, “O Tune Davit, Bakovi Dagi, o dodo maria!”

³² Lakea e Isu i pesi tata, i gale valai rua, i ta maea, “A ra muru ngarua?”

³³ Ru koli, ru ta maea, “Bakovi Dagi, miri ngaru go vakamatapara maria!”

³⁴ E Isu i dodo rua, i nugu a matane rua. Malaviriri kunana ru matapara, ru muri vona.