Markus 4 - A Nitana Vure

A Nivakakika na Viri i Varo a Vit

¹ E Isu i vara tabu na dahana darilomu, i manga a hini muga. E huriki ri made halui ia ri ala kupo hateka, lakea e Isu i rike na aga, i pasi polovavo popote. Pali e huriki ri made pololilo na lavu.

² I vara ria na maka ngava i kupo, na nita vakakika, i ta maea,

³ “Mu longo valai! A bakovi ni leho na hania i varo a vutuna vit.

⁴ Na tahuna i voro lae a vutuna vit, ranga ri boru puru ramai a dala, lakea a maka kadirovo ri valai, ri kani lobo.

⁵ “A maka vutuna vit ranga ri boru langa na hini kedokedo, na hini i uka ma i tahoka hateka a malala. Lakea ri koru rike malaviriri, a vuhuna a malala i tabuli polomeli kunana.

⁶ Pali na tahuna a haro i rike, i kani ria, ri malai, a vuhuna a kane ria i uka ma ri puru hateka.

⁷ “A vutuna vit ranga ri boru puru na hini i vona a barakau. Muri a barakau i koru rike, i kae ria, ri keri ni vua.

⁸ “Pali a vutuna ranga ri boru langa na malala kamumu. Ri gaga, ri koru rike, ri vakabele a kanena i kupo. Ri vakabele i ravulu tolu ranga, i ravulu polotara ranga, pali ranga ri vakabele i ravulu mule ma a murina balaka taku (100).”

⁹ Muri e Isu i ta maea, “E rei a viri i ngaru ni longokilalea a ngavagu, ge longo kamumu, ge luhoi kado.”

¹⁰ E huriki lobo ri vano pali, lakea a murimuri vona ala ravulu a polona i rua, turana e huriki ranga, ri nanea ge tuveve poloa ne ria a nita vakakika.

¹¹ Lakea i ta maea, “A nita kapiloho na harikianga na Vure ni vakasiri pali ne mua. Pali e huriki ri made polovavo, a ngava lobo ni ta vakakika ne ria.

¹² Ni ta vakakika ne ria, ‘ri gi matai, pali i uka ma ri gi matakilala. Ri gi longo, pali i uka ma ri gi longokilala. Ma ri gi pulo a vilone ria, ga puga vuroki a naro hale ne ria.’”

A Pelegona Nivakakika na Vutuna Vit

¹³ Muri e Isu i nana ria, “Mua i uka ma mu longokilalea a nita vakakika iea? Pali mu gu longokilala navai a maka nita vakakika ranga?

¹⁴ “A bakovi i varo a vutuna vit i manga a viri i habi a ngava.

¹⁵ E huriki a bakovi ranga, ri manga a dala, a vutuna vit ni voro langa vona. Na tahuna ri longo a nita, e Satan i valai malaviriri, i bole tala ra ngava ni varo.

¹⁶ “E huriki ranga ri manga a hini kedokedo, a vutuna vit ni voro langa vona. Ri longo a nita, ri malaviriri kunana ri bolea, ri vivi vona. Pali i uka ma ri pesi tora,

¹⁷ a vuhuna a kane ria i uka ma i puru hateka. Na tahuna a maregoa i bele, o e huriki ri vakamadihi ria a vuhuna ri ramaia a nita iea, ri ha malaviriri kunana.

¹⁸ “Pali e huriki ranga ri manga a hini i vona a barakau, a vutuna vit ni voro langa vona. Ri longoa a ngava,

¹⁹ pali a niluhoi legelege na nimade na malala, a nimasigoro na mahala, a ningaru na maki ranga ri valai ri kavitagu a ngava ni varo, lakea i uka ma ri vua.

²⁰ “E huriki ranga ri manga a malala kamumu, a vutuna vit ni voro langa vona. Ri longoa a ngava, ri bolea, ri vakabele a vutuna i ravulu tolu ranga, i ravulu polotara ranga, pali ranga i ravulu mule ma a murina balaka taku (100). Ri bele kupo hateka na vutuna ni varo muga.”

A Lam

²¹ E Isu i taki ria, “A lam i uka ma si namia, muri si gi ru kapilohoa. Bara si ru langea na dede.

²² A maki ni ruhulolo bara i bele kavakava. A maki ni ta ruhulolo vona, bara ni ta pukatala vona.

²³ E rei a viri i ngaru ni longokilalea a ngavagu, ge longo kamumu, ge luhoi kado.”

²⁴ I taki tabu ria, i ta maea, “Mu luhoi kado kamumu a ngava mu longo. A naro mu rata virihi e huriki ranga, a Vure tara bara i rata virihi mua vona, lakea bara ni habi tabu ranga.

²⁵ E rei a viri i tahoka a maki pali, bara ni habi tabu vona ranga. Pali e rei a viri i uka ma i tahoka a maki, bara ni bole mule vona a maki popote i tahoka pali.”

A Nivakakika na Vutuna Vit Ni Varo

²⁶ E Isu i ta maea tabu, “A harikianga na Vure i manga a bakovi i voro lae a vutuna vit na malala.

²⁷ I voro lobo a vutuna vit, i vano i made kunana. A maka vutuna vit ri gaga, ri koru rike, pali a bakovi i uka ma i lohoka vona ri koru rike navai.

²⁸ A malala kunana i ratea a vutuna i gaga. Muri a pagana i lubu, i koru rike, lakea a vuana i lua tala na mapana vit.

²⁹ Pali na tahuna a kanena i moro ngane, a bakovi iea i valai malaviriri, i vali a vit, i ru kadolu, a vuhuna a parava ni mirio i valai pali.”

A Nivakakika na Vutuna Mastad

³⁰ E Isu i ta maea tabu, “Ga ta navai tabu vona a harikianga na Vure? E rei a nivakakika ga tonia vona?

³¹ I manga a vutuna mastad, ra i vutu kiroko liu ni varo na malala.

³² Pali na tahuna ni varo, i koru rike, i langui lobo a maki ni varo na hania. A rahana i buroro, lakea a maka kadirovo bara ri hae a nune ria vona.”

³³ Na tahuna e Isu i vara e huriki, bara i rata bala a nita vakakika, i muri mai a lohokanga ne ria.

³⁴ I uka ma i ta kavakava, i ta vakakika kunana. Pali na tahuna i made turana e huriki a murimuri vona kunana, bara i tuveve polo ne ria a ngava lobo.

E Isu i Vakamalilo a Dari

³⁵ Na parava iea, i malunga pali a hini, lakea e Isu i taki e huriki a murimuri vona, “Si gi vore lakea na tabeke tara na darilomu.”

³⁶ Lakea ri rike turana e Isu na aga i made muga vona, ri vano. I ranga e huriki ri rike na aga ne ria, ri vano turane ria.

³⁷ Muri a vilu dagi i bele, i rere tagua a aga, i ratea i popote ge mabubu.

³⁸ E Isu i mahita langa na moke na kuli na aga, lakea e huriki a murimuri ri vangoa, ri takia, “Mari ni tovo, i uka ma o luhoi lege? Bara si pasiri!”

³⁹ Lakea i pesi rike, i tahatea a vilu, i takia a bokona dari, “O pasi puru! Naha ni kuluko!” Muri i pasi puru a vilu, i puru a malilo i ngapa.

⁴⁰ Muri i nana e huriki a murimuri vona, “I navai mu mangenge? Ra mua, i uka ma mu luhoi tora ma?”

⁴¹ Ri mangenge hateka, lakea ri vanana lae, “E rei a viri iea? A vilu, a dari ru longototoa!”