Markus 16 - A Nitana Vure

E Isu i Mahuri Mule

¹ I lobo pali a Parava Nimalo lakea e Maria Magdala, e Maria kinane Iakop, e Salome to kona a mangisipa to go biri a kuline Isu vona.

² Na hatelanga, na mugana parava na vik, to laho lakea na babe.

³ Lakea to vanana, “E rei ge kule talea ne teu a kedo ni kule kari a ngavana babe vona?”

⁴ Na tahuna to bele, to masia a kedo ni kule vuroki pali. Ra kedo iea i dagi hateka.

⁵ Na tahuna to dili na babe to masia a riau i rodo a varakia keakea i made na tabeke na limana kanene tou, lakea to turutu.

⁶ A bakovi iea i ta rike, i ta maea, “Naha ni mangenge. Iau a lohoka vona moto matakanea e Isu o Nasaret, ra ni paditata na kai tavalavala. I mahuri mule pali na matenga. I uka a hini koea. Moto masia a murina ni vakatabuli vona rira.

⁷ Ngane moto vano, moto vakalongo e huriki a murimuri vona turana e Petrus, moto ta maea, ‘E Isu i muga lakea o Galili. Mu vano mu masia vonga, i manga a ngava i taki muga mua vona.’”

⁸ To turutu, i vakulu a tagane tou na mangea. Lakea to ha taroa a babe, to nunu hamule. Pali i uka ma to vakalongoa tara viri, a vuhuna to mangenge hateka.

E Maria Magdala i Masia e Isu

⁹ E Isu i mahuri mule na matenga na hatelanga na mugana parava na vik. I bele taro ne Maria Magdala, ra ngatavine e Isu i lili tala vona hosi a hanitu i polorua.

¹⁰ Muri e Maria Magdala i vano ge vakalongo e huriki a murimuri ra ri rakoli vona ri tatangi.

¹¹ Na tahuna e Maria i vakalongo ria vona i masia e Isu i mahuri mule, ri luhoi ia ta i tatami.

E Isu i Bele na Murimuri Vona ala Rua

¹² Muri e Isu i bele tabu na murimuri vona ala rua na tahuna ru lalaho na dala, ta ru gu lakea na tanga tara. Pali i uka ma i mata manga ia muga.

¹³ Lakea ru hamule, ru vakalongo e huriki a murimuri ranga. Pali ria ranga ri luhoi ta a ngava taminga kunana.

E Isu i Rudu e Huriki a Murimuri

¹⁴ Muri e Isu i bele taho e huriki a murimuri vona ala ravulu a polona i taku na tahuna ri kani. I tahate ria, a vuhuna i uka ma ri luhoi tora, ri gigi tora hateka, i uka ma ri luhoi e huriki ri masia na tahuna i mahuri mule pali.

¹⁵ Muri i taki ria, “Mu lakea na tanga lobo na malala, mu vakalongo e huriki lobo na Velenga Kamumu.

¹⁶ E rei a viri i luhoi tora iau, ni gi vahilolo, a Vure bara i korimulea. Pali e rei a viri i koi ni luhoi tora iau, bara i velu.

¹⁷ E huriki ri luhoi tora iau bara i bele ne ria a naro nga: Bara ri lili tala e huriki a hanitu na ragu. Bara ri ta na ngava karaba.

¹⁸ Bara ri nugu a mata na limane ria, ri ninu a naru hale i uka ma ge vakahale ria. Bara ri ru a limane ria ne huriki ri giloa, bara ri tavaga.”

E Isu i Sike na Hunu

¹⁹ E Isu a Bakovi Dagi i vara lobo e huriki a murimuri vona. Muri ni bole sike na hunu i made turana a Vure, na limana a kanena.

²⁰ Muri e huriki a muri­muri ri vano, ri lakea na tabeke lobo na malala, ri vara e huriki na Velenga Kamumu. E Bakovi Dagi i tuhori ria i vaka­tora a ngava vona na maka nivakasiri.