Lukas 20 - A Nitana Vure

E Rei i Habi a Nitora ne Isu

¹ Na parava tara, na tahuna e Isu i tovo e huriki na Velenga Kamumu pololilo na roho na Vure, e huriki a prister dagi, a mari na vinara, e huriki a bakovi dagi ri valai ne Isu.

² Lakea ri nanea, “O vakalongo mia, o bole vai a nitora o rata a maki nga? E rei i taki ioe go rata a maki nga?”

³ E Isu i koli i ta maea, “Ga nana taro mua vona tara ninana. Mu vakalongo iau,

⁴ ra hilova ne Ioanes, i valai na Vure, o i valai na bakovi tavula kunana?”

⁵ Ri vahehe, ri ta maea, “Bara si takia a leho vona i valai na Vure, bara i nana, ‘Pali i navai i uka ma mu luhoi tora ia?’

⁶ Pali hita bara si taki a hilova ne Ioanes a niluhoi na bakovi kunana, e huriki bara ri padimate hita na kedo, a vuhuna ri luhoia e Ioanes a propet.”

⁷ Lakea ri koli mule ri takia, ta i uka ma ri lohoka vona a hilova ne Ioanes i valai ne rei.

⁸ Lakea e Isu i ta rike, i ta maea, “Pali iau tara, i uka ma ga vakalongo mua vona e rei i habi a nitora nau ni rata a maki nga.”

A Nivakakika na Hania

⁹ Muri e Isu i taki ria vona tara nita vakakika tabu, i ta maea, “A bakovi tara i varoa a hania na vain, i habia ne huriki a bakovi ranga ri gi leho taro vona. Muri i vano i havai, i made tabaka na robo tara.

¹⁰ I tabukoi ngane a keva ni mirio a vain, lakea i rudua a vora vona i lakea ne huriki a bakovi ni leho ge bole ranga kanena vain. Pali ri ubia a vora, ri tono mulea i laho a vahana a limana i hamule.

¹¹ Muri i rudu tabua tara vora. Pali ri ubi tabua, ri rata halea, ri tono mulea i laho a limana a vahana i hamule.

¹² A tahona hania i rudu tabua tara vora. I mavonga ia, ri ubi pilea, ri voro talea.

¹³ “Lakea a tahona hania na vain i nana mulea i ta maea, ‘A ra ga ratea ngane? Ga rudua e tugu a bakovi a hategu. Bara ri togo ia.’

¹⁴ “Pali na tahuna e huriki a bakovi ni leho ri masia e tuna, ri vata, ri ta maea, ‘A bakovi iea bara i bole a murine tamana. Si rabalakia, si bolea a hania na vain na tahuna e tamana i mate.’

¹⁵ Lakea ri vuroki talea e tuna, ri rabalakia. “Mu luhoi navia a tahona hania, ge rata navai ria ngane?

¹⁶ Bara i valai, i rabalaki e huriki a bakovi nga, i bole mulea a hania na vain, i habi polo tabua ne huriki a bakovi ranga.” Na tahuna ri longoa a nivakakika iea ri ta maea, “A Vure, nahea ge rata mavonga!”

¹⁷ Lakea e Isu i matanono ria i ta maea, “Pali a ngava ni here puru na Hinere i ta maea, ‘Ra kedo e huriki a mari ni hae a ruma ri marikoi vona, ngane i bele a vuhu kedo ni hae a ruma vona.’

¹⁸ “E huriki ri boru langa na kedo iea bara ri bole a vuranga. Na tahuna a kedo iea bara i boru, i tahoa tara bakovi, bara i ubi momoa.”

¹⁹ Ngane e huriki a mari na vinara turana e huriki a prister dagi i padi ria a mana vona e Isu i taki virihi ria, lakea ri ngaru ni lakavu malaviriria. Pali ri mangenge ne huriki a bakovi a ngatavine.

A Takis ne Kaiser

²⁰ Lakea ri rudu e huriki ranga ri gi tamilalu ni muri ne Isu, ri gi kasisi, ri gi matanonoa ge rata ranga ngava hale, bara ri taki tala ne Pilato.

²¹ E huriki a kasisi nga ri nanea, “Mari ni tovo, mi lohoka vomu, ioe o ta muholi, o vara e huriki na maki muholi. O rata a naro i palupulupu ne huriki lobo. O vara kunana na naro na Vure i muri mai a ngava muholi.

²² A vinara i taki si gi habi a takis ne Kaiser, o i uka?”

²³ Pali e Isu i lohoka vona a taminga ne ria, lakea i taki ria i ta maea,

²⁴ “Mu vakasiria nau tara moni. A hanune rei, a rane rei i tabuli vona?” Ri ta maea ria, “A hanune Kaiser, a rane Kaiser i tabuli vona.”

²⁵ Lakea e Isu i taki ria i ta maea, “Mu habi ne Kaiser a maki ne Kaiser. Mu habi na Vure a maki na Vure.”

²⁶ Ri keri ni padi virihia na ngava vona na matane huriki a bakovi a ngatavine. Ri ngapa ri vulai kunana.

E Huriki a Sadusi

²⁷ Muri e huriki a Sadusi ri valai ne Isu. Re huriki nga ri taki ta a viri i mate i uka ma ge pesi rike mule tabu.

²⁸ Ri nanea, “Mari ni tovo, e Moses i here puru i taki a bakovi i mate, i pe purua e girihina, pali i uka e tune rua, e tarina bara i parangi tabu a havuri vona, ge vakabelea a hamona.

²⁹ I tahoka e tarina mai ala polorua. A tabua i parangi, muri i mate. Pali i uka ma i vakabele e tuna.

³⁰ A pahamuri tabua i parangi tabu vona a havuri vona. Muri ia tara i mate, i uka tabu e tuna.

³¹ A tolune ria i parangi tabu vona, pali ia tara i mate. Re maki tarina mai lobo nga to parangi lobo vona. Muri to mate, i uka ma to vakabele e tune tou.

³² Muri i mate a ngatavine.

³³ Muri ma, na tahuna e huriki ri pesi rike mule na ni mate, ra ngatavine iea ge girihine rei muholi? Tou lobo to parangi vona.”

³⁴ Lakea e Isu i koli, i ta maea, “Koea na malala e huriki ri parangi.

³⁵ Pali muri ma, e huriki a bakovi a ngatavine a Vure ge taki ria ri kamumu, ri gi mahuri mule na nimate, i uka ma ri gi vaparangi,

³⁶ a vuhuna ri manga a agelo, i uka ma ri gi mate tabu. Ria e huriki e tuna Vure, a vuhuna ri mahuri mule na nimate.

³⁷ E Moses tara i vakasiri hita vona e huriki ri mate, bara ri mahuri mule tabu. Na tahuna i here puru a nuverei na kai kiroko i nono, i takia e Bakovi Dagi ia ‘A Vure ne Abraham, a Vure ne Isak, a Vure ne Iakop.’

³⁸ I uka ma ia a Vure ne huriki ri mate. Ia a Vure ne huriki ri mahuri, a vuhuna e huriki lobo ri mahuri na matana.”

³⁹ Lakea e huriki a mari na vinara ri ta maea, “Mari ni tovo, a nikoli vomu i kamumu.”

⁴⁰ Muri ri mangenge ni nana tabua.

E Kristo Ia e Tune Rei

⁴¹ Muri e Isu i nana ria i ta maea, “I navai ni taki e Kristo ia e Tune Davit?

⁴² Na maka Linge, e Davit i here maea, ‘E Bakovi Dagi i takia e Bakovi Dagi nau, “O made na limagu a kanegu,

⁴³ ge harena na tahuna ga ratapile e huriki a pile vomu, ri gi vora tavula vomu.” ’

⁴⁴ “E Davit i galea a viri iea a Bakovi Dagi vona. Pali i navai tabu ge ia e tune Davit?”

E Isu i Biu e Huriki a Mari na Vinara

⁴⁵ Muri i taki e huriki a murimuri vona na matane huriki lobo, i ta maea,

⁴⁶ “Mu matadoko na narone huriki a mari na vinara. Ri vakaholi, ri ngaru ri gi bagetu keke. Ri ngaru e huriki ri gi tagui kamumu ria na mada. Ri ngaru ni made mugamuga na roho na vaponga, ri ngaru ni made mugamuga na habu.

⁴⁷ Ri rata a nivasileki olaola, e huriki ri gi luhoi ta ria a bakovi kamumu hateka, pali ri panaho a ruma, a malala ne huriki a havuri. Re huriki nga, a Vure bara i habi a nimadihi dagi ne ria na tahuna i pelekado a narone ria.”