Iona 2 - A Nitana Vure

¹ Na tahuna e Iona i made pololilo na kavutuna manu, i vasileki ne BAKOVI DAGI, a Vure vona,

² i ta maea, Na naro hale nau, a popote ga mate, lakea a gale ioe, e BAKOVI DAGI, o koli mulea a ninana nau. O longoa a nitangi nau pololilo liu na lovo ne huriki ri mate.

³ O voro puru iau na utu, pololilo na dari. A dari i kavitagu iau, a bokona dari i rere tagu iau.

⁴ Muri a ta maea, Ioe o ngalahere nau, pali muri ma bara matai tabu a roho ni taba vomu.

⁵ A dari i kavitagu iau a popote ga mate. A utu i tabuli halui iau, a kadola i rako halui a gigu.

⁶ Polotano na vuhuna lolo, a pasiri puru, a puru polotano liu na utu, a luhoi ta ga made vakaroro na bavi. Pali ioe o korimule iau na lovo, ioe e BAKOVI DAGI, a Vure nau.

⁷ Na tahuna i vurea a matagu, a longo visi tabu ioe, e BAKOVI DAGI. A nivasileki nau i bele vomu na roho ni taba vomu.

⁸ E huriki ri togo a maka vure tavula ne ria, ri ngalahere na naro kamumu vomu o ngaru ni vakasiri ria vona.

⁹ Pali iau ga habi a nihabi vomu, bara kavurike ioe na linge. Ra maki a ta muholi vomu vona, bara rata kamumua. A nikorimule nau i valai ne BAKOVI DAGI!

¹⁰ Muri e BAKOVI DAGI i vakukua a manu, i lua talea na bike e Iona.