Iona 1 - A Nitana Vure

A Vure i Rudua e Iona

¹ Na parava tara, a ngavane BAKOVI DAGI i bele ne Iona, e tune Amatai, i ta maea,

² O pesi rike, o sike lakea na tanga dagi hateka e Ninive, o tahate ria, a vuhuna a matai ria ri rata a naro hale vakaroro na matagu.

³ Pali e Iona i pesi rike, ta ge ha ne BAKOVI DAGI ge lakea o Tarsis. I pori lakea o Iopa, i masia tara aga ta ge lakea vona a tanga iea. I habia a mapana aga, i rike vona, ta ge ha ne BAKOVI DAGI, ge lakea o Tarsis.

⁴ Pali e BAKOVI DAGI i vakabelea a taiava, i ratea a dari i bolu, i kule laea a aga i popote ge mapua.

⁵ E huriki a tahodari ri mangenge, lakea takutaku ne ria i vasileki lakea na vure vona. Muri ri vuroki a galesi ne ria i puru na dari, ge maraha a aga. Pali e Iona i puru na ngavana aga, i tabuli puru, i mahita mate.

⁶ A matakari na aga i valai, i vangoa, i ta maea, O mahita navai ke? O pesi rike, o vasileki na vure vomu, o takia ge matai hita, ge vakakori hita, ma si gi vurua.

⁷ Muri e huriki a tahodari ri vata, ri ta maea, Si gi voro a satu, si gi lohoka vona e rei a vuhuna a taiava iea i pori. R i voro a satu, i boru langa ne Iona.

⁸ Muri ri nanea, O taki mia, e rei a vuhuna a maregoa iea i bele ne hita? A ra leho o ratea? O malaga vai? E rei a rana tanga vomu? E rei a rana kabu vomu?

⁹ E Iona i koli, i ta maea, Iau a Hibru. A kavurikea e BAKOVI DAGI, a Vure na hunu, ra i rata rike a dari, a malala.

¹⁰ A nikoli ne Iona i vakamangenge ria. Lakea, ri nanea, A ra o ratea? Ri lohoka vona i ha ne BAKOVI DAGI, a vuhuna i taki ria pali.

¹¹ A dari i bolu hateka, lakea ri nanea, A ra mi gi ratea vomu ge ratea a dari ge malilo?

¹² I koli i ta maea, Mu bole rike iau, mu voro puru iau na dari. Muri bara i puru a malilo, i ngapa. Iau a lohoka vona, a naro hale nau i vakabelea ra taiava.

¹³ Pali e huriki a tahodari ri koi. Ri toni a bulune ria ni vore hamule na lavu. Ri toni, toni, ri pemo, a vuhuna a taiava i pori valai muga.

¹⁴ Muri ri vasileki lakea ne BAKOVI DAGI ri ta maea, O BAKOVI DAGI. Nahea mi gi vurua vona a matenga na bakovi iea. Nahea go kau virihi mia vona a matenga na bakovi i uka rarenga. O BAKOVI DAGI, o rata na ningaru vomu a maki lobo.

¹⁵ Muri e huriki a bakovi ri nugua e Iona, ri voro purua na dari, i pasipuru a taiava, i puru a malilo, i ngapa.

¹⁶ Na tahuna e huriki ri masia a dari i malilo, ri mangenge hateka ne BAKOVI DAGI, ri habi a nihabi vona, ri ta muholi lakea vona.

A Manu Dagi

¹⁷ Pali e BAKOVI DAGI i rudua tara manu dagi, i todoa e Iona. E Iona i made pololilo na kavutuna manu na haro i tolu, na rodo i tolu.