Ioanes 2 - A Nitana Vure

A Habu na Parangia o Kana

¹ Muri na parava i rua, a habu na parangia ni rata o Kana na tabeke ne Galili. E kinane Isu i lokovonga ge masia a habu.

² E Isu turane huriki a murimuri vona, ria ranga ni taki ri gi lakea na habu iea.

³ Na tahuna a vain i lobo, lakea e kinana i takia e Isu, i ta maea, “A vain ne huriki nga i lobo.”

⁴ Pali e Isu i koli, i ta maea, “Naha ni vakuku iau. A parava nau i tabana.”

⁵ Lakea e kinana i taki e huriki a vora, i ta maea, “A ra ngava ge taki mua vona mu muri mai kunana.”

⁶ A ruma iea i tahoka a ulo na naru i polo­tara. A ulo nga ne vona e huriki a Iuda bara ri rata a leho ni hilolo, ri gi mala­mala na matana Vure. Ra ulo nga, ni rata na kedo. A lita i 100 bara ni guru dili vona a ulo i taku.

⁷ Lakea e Isu i taki e huriki a vora, i ta maea, “Mu kiru a maka ulo.” Lakea ri kiru a maka ulo, ri vonu.

⁸ Muri e Isu i taki ria, i ta maea, “Mu vidiru tala ranga, mu bole lakea na vora i matakari e huriki a vora na habu.” Lakea ri muri mai a ngava i taki,

⁹ ri vidiru tala a lingena popote, ri bole lakea na matakari. A matakari ne huriki a vora i dame kilangana ra naru ni pulo lakea na vain. I uka ma i lohoka vona i valai vai a vain iea, pali e huriki a vora ri lohoka vona a hini ri kiru a naru vona. Muri a matakari ne huriki a vora i galea a bakovi i parangi karaba,

¹⁰ i ta maea, “E huriki ri rata a habu, bara ri habi taro a vain kamumu hateka. Muri, na tahuna e huriki ri ninu hateka pali, bara ni habi a vain i uka ma i nami kamumu hateka. Pali ioe, i uka ma o rata mavonga. Ioe o habi muga a vain i uka ma i nami kamumu. Pali ngane kunana o habi tala a vain i nami kamumu hateka.”

¹¹ Ra nivakasiri iea e Isu i ratea na tanga e Kana, o Galili. Ia a mugana niva­kasiri ne Isu, i vakasiri a bagetua vona, lakea e huriki a murimuri ri luhoi tora ia.

E Isu i Lili Tala e Huriki na Roho

¹² Muri na habu, e Isu i puru o Kaper­naum turana e kinana, e tarina mai, e huriki a murimuri vona. Ri made vonga na parava ranga.

¹³ Na tahuna a Habu na Nipagepolo ne huriki a Iuda i tabukoi, lakea e Isu i sike o Ierusalem.

¹⁴ Na tahuna i bele na roho na Vure, i matai e huriki a bakovi ri vahabi ri vakona a bulmakau, a sipsip, a balu. E huriki a bakovi ranga ri made na dede ri vangoli a moni.

¹⁵ Lakea e Isu i bole rikea a mota, i ratea lebo vona, i lili tala e huriki na roho na Vure. I hotu a maka sipsip a bulmakau, i lili tala ria. Muri i guru viliha a moni ne huriki ri vangoli a moni, i pulo ngalatudu a maka dede ne ria.

¹⁶ Muri i taki e huriki ri vahabi a balu, i ta maea, “Mu bole ha koea a maka balu ne mua! Naha ni ratea a roho ne Tata ge manga a roho na ni vahabi ni vakona a maki!”

¹⁷ Na tahuna e huriki a murimuri ne Isu ri longoa a ngavana, ri longovisi a ngava ni here puru hosi na Hinere i ta maea, “A luhoi hatekea a roho vomu, i rata­pile iau.”

¹⁸ Muri e huriki a Iuda ri nanea, “A ra nivakasiri go vakasiri mia vona, o tahoka a nitora ni rata a maka naro nga?”

¹⁹ Lakea e Isu i taki ria, i ta maea, “Mu pukea a roho na Vure iea, pali na parava i tolu bara vakapesi mulea.”

²⁰ E huriki a Iuda ri koli, ri ta maea, “A roho na Vure iea, ni hae na pida i ravulu va a polona i polotara. Pali ioe o taki ta go hae tabua na parava ge tolu kunana?”

²¹ Pali e Isu i uka ma i taki a roho ni rata na kedo. A roho na Vure e Isu i takia, i ta vakakika vona a kakaina.

²² Muri, na tahuna e Isu i pesi rike mule na matenga lakea e huriki a murimuri vona ri longovisia ra ngava iea. Lakea ri luhoi tora a Hinere turana maka ngava e Isu i taki.

²³ Na tahuna e Isu i made o Ierusalem na Habu na Nipagepolo, e huriki ri matai a maka nivakasiri i rata, lakea ri luhoi torea a rana.

²⁴ Pali e Isu i uka ma i luhoi tora ria, a vuhuna i lohoka vona a vilo ne huriki a bakovi lobo.

²⁵ I uka ma i ngaru a bakovi tara ge vakalongoa vona a naro na bakovi, a vuhuna i lohoka vona pali a niluhoi ne huriki a bakovi lobo.