Ioanes 1 - A Nitana Vure

A Nita i Bakovi

¹ Hosi na nidoko na hunu a malala, a Nita i made pali. A Nita i made turana Vure. A Nita ia a Vure.

² Hosi na nidoko na hunu a malala, i made pali turana Vure.

³ Na limana Nita iea kunana, a Vure i ratarike a maki lobo. I uka tara maki ge bele na dala ranga, a maki lobo i bele kunana na limana.

⁴ Ia a vuhuna a nimahuri. A nimahuri iea i vakapalala e huriki a bakovi a ngatavine.

⁵ A nipara iea i para na hini uvo, a uvo i uka ma i kavitagua.

⁶ A Vure i rudu vilia tara bakovi, a rana e Ioanes.

⁷ I valai ge vakalongo e huriki vona a nipara iea, ri gi luhoi torea.

⁸ Pali e Ioanes i uka ma ia a nipara iea. I valai kunana ge vakalongo e huriki na nipara iea.

⁹ A nipara muholi, ra i vakapalala e huriki lobo, ta ge valai na malala.

¹⁰ A nipara iea, na limana Vure i ratarike a malala. Pali na tahuna i luve na malala, e huriki na malala i uka ma ri matakilalea.

¹¹ I luve ne huriki a viri vona, pali i uka ma ri taguia.

¹² Pali e huriki ri taguia, ri luhoi tora ia, i rata ria ge ria e huriki a tuna Vure.

¹³ E huriki nga ria a tuna Vure, i uka ma i ramai a darane kinane ria o ne tamane ria, o na ningaru na kakaina viri, o na ningaru na bakovi. A Vure kunana i rata ria ge ria e huriki e tuna.

¹⁴ A Nita i bele manga a bakovi, i made turane hita. Mi masia a bagetuanga vona, a bagetuanga ne Tuna a Madiva, ra viri i valai ne Tamana. Ia a mari ni dodo, a mari ni ta muholi.

¹⁵ E Ioanes i vakalongo e huriki, i gale tala, i ta maea, “Ia ra bakovi a taki muga mua vona ge muri valai nau, i dagi hateka nau, a vuhuna i made hosi na tahuna iau i uka ma ni poda ma.”

¹⁶ A naro kamumu vona i dagi hateka. Balaka kupo i rata kamumu hita.

¹⁷ A Vure i habi polo ne Moses a vinara, i habi ne hita. Pali a naro kamumu, a nita muholi, a Vure i habi polo ne Isu Kristo, i habi ne hita.

¹⁸ I uka tara viri ge masia a Vure. Pali a Vure Kikeri, ra i made tabukoi ne Tamana, ia kunana i vakasiri a Vure ne hita.

E Ioanes a Mari ni Vahilolo

¹⁹ Iea ngane a ngavane Ioanes i ratea na tahuna e huriki a Iuda o Ierusalem ri rudu e huriki a prister, e huriki a Levi, ri gi nanea e Ioanes ia e rei muholi.

²⁰ Lakea e Ioanes i uka ma i ruhuloloa tara ngava. I ta kavakava ne ria, i ta maea, “Iau, i uka ma iau e Kristo.”

²¹ Lakea ri nanea, “Pali ioe e rei ke? Ioe e Elaisa?” I lavuni, i ta maea, “I uka.” Lakea ri nana tabua, “Pali ioe e rei? Ioe ra propet ta ge valai?” I koli, i ta maea, “I uka.”

²² Lakea ri nana tabua, “Pali ioe e rei muholi? O vakalongo mia mi gi hamule, mi gi vakalongo e huriki ri rudu mia. O taki ioe, ge ioe e rei muholi?”

²³ Lakea e Ioanes i koli, i ta maea, “Iau a lohona viri i gale dagi na robo, a ta maea, ‘Mu kado a dala ne Bakovi Dagi,’ i manga a ngava e Isaia, a propet, i taki hosi.”

²⁴ E huriki ranga, e huriki a vinuru ne huriki a Pariseo,

²⁵ ri nanea, “O taki ioe, ta i uka ma ioe e Kristo, i uka ma ioe e Elaisa, i uka ma ioe a propet tara. Pali i navai o vahilolo e huriki?”

²⁶ Lakea e Ioanes i koli, “Iau a vahilolo e huriki na naru. Pali a viri tara i pesi turane mua, i uka ma mu lohoka vona.

²⁷ A bakovi iea bara i muri valai nau. Iau i uka ma a bakovi kamumu, ga puga vuroki a mota na vahapolo vona.”

²⁸ A maka naro nga ri bele o Betani, na gagana naru e Iordan, na tabeke e Ioanes i vahilolo e huriki vona.

A Tuna Sipsip na Vure

²⁹ Na parava muri e Ioanes i masia e Isu i laho valai vona. Lakea i taki e huriki, i ta maea, “Mu mata lakea, mu masia a Tuna Sipsip na Vure, ra viri i puga vuroki a naro hale ne huriki na malala!

³⁰ Ra bakovi iea kunana a vakalongo mua muga vona, a ta maea, ‘Ra viri bara i muri nau, i dagi hateka nau, a vuhuna i made muga hosi na tahuna iau i uka ma ni poda ma.’

³¹ I muga, iau i uka ma lohoka vona ia e rei muholi. Pali iau a valai, a vahilolo e huriki ne vona ni vakasiri kavakava ne huriki a Israel vona a bakovi iea.”

³² Muri e Ioanes i vakalongo ria, i ta maea, “A masia a Hanu Kiripiripi i puru valai na hunu i manga a balu, i toka langa vona.

³³ I muga, iau i uka ma a lohoka ge ia a bakovi iea. Pali a viri i rudu iau a valai ga vahilolo e huriki na naru, i taki iau, i ta maea, ‘Ra bakovi o masia a Hanugu ge puru valai na hunu i manga a balu ge toka langa vona, ra bakovi iea kunana bara i vahilolo e huriki na Hanu Kiripiripi.’

³⁴ Iau a masia, lakea a vakalongo mua vona ngane, ra bakovi iea a Tuna Vure.”

E Huriki a Mugana Murimuri

³⁵ Na parava muri e Ioanes i pesi tabu vonga turana murimuri vona ala rua.

³⁶ Na tahuna e Ioanes i masia e Isu i laho polo, i ta maea, “Muru mata lakea! A Tuna Sipsip na Vure!”

³⁷ Ru longoa, ru muri maia e Isu.

³⁸ E Isu i matagege i matai rua ru muri vona, lakea i nana rua, “A ra muru ngarua?” Lakea ru nanea, “Rabi, o made vai?”

³⁹ E Isu I koli, i ta maea, “Muru valai, muru masia a hini a made vona.” Lakea ru vano ru masia a hini e Isu i made vona. Ru made turana, a vuhuna i malunga pali a hini.

⁴⁰ I tara ne rua e Andreas, e tarine Simon Petrus, ra viri i longoa a ngavane Ioanes, lakea i muri ne Isu.

⁴¹ E Andreas i malaviriri kunana i vano, i matavisia e tukana, i vakalongoa, i ta maea, “Miri matavisia e Mesaia” (re Kristo).

⁴² Muri e Andreas i tulia e Simon, ru lakea ne Isu. Na tahuna e Isu i masia, i ta maea, “Ioe e Simon, e tune Ioanes. Ngane a vunu ioe ge ioe e Sipas” (e Sipas na nita Grik i manga e Petrus).

E Pilip Rua e Nataniel

⁴³ Na parava muri e Isu i ngaru ni lakea o Galili. I pakaraua e Pilip, lakea i turea, i ta maea, “O valai o muri mai iau.”

⁴⁴ E Pilip, e Andreas, e Petrus, tou lobo a bakovi na tanga e Betsaida.

⁴⁵ Muri e Pilip i vano ge gosia e Nataniel. Na tahuna i matavisia, i ta maea, “Mete mata­visia ra viri e Moses turana e huriki a propet ri here vona hosi. Ia e Isu, e tune Iosep o Nasaret!”

⁴⁶ Lakea e Nataniel i nana, “A ra maki kamumu ge bele na tanga e Nasaret?” E Pilip i koli, i ta maea, “O valai o masia.”

⁴⁷ Na tahuna e Isu i masia e Nataniel i laho valai vona, lakea i takia, “Muholi, ra bakovi iea a koma o Israel. I uka ma ia a bakovi ni tatami.”

⁴⁸ Lakea e Nataniel i nanea, “O lohoka navai nau?” E Isu i koli, i ta maea, “A matai ioe na tahuna o made na taruna kai a pik, muga ne Pilip i tura valai ioe koea.”

⁴⁹ Muri e Nataniel i ta maea, “Mari ni tovo, ioe a Tuna Vure, ioe a hariki ne Israel.”

⁵⁰ E Isu i takia, “O luhoi tora iau a vuhuna a taki ioe a matai ioe o made na taruna kai a pik. Pali a maka maki dagi hateka bara o matai ma.”

⁵¹ Muri i voro­polo, i ta maea, “A taki muholi mua, bara mu masia a hunu i mata ka, mu matai e huriki a agelo na Vure ri rike puru na Tuna Bakovi.”