Iakop 1 - A Nitana Vure

A Nita Muga

¹ A haro kamumu ne mua lobo. Iau, e Iakop, a vora na Vure, a vora ne Isu Kristo, a Bakovi Dagi ne hita. A herea a raukea iea i lakene ne mua, a kabu ne Israel i ravulu a polona i rua, ra mu pe a tanga ne mua, mu made viliha na tanga lobo na malala.

Mu Kaloho a Maregoa

² Mua e huriki a turagu, a ngaru mu gu vivi hateka na tahuna a nitoni ge bele ne mua,

³ a vuhuna mu lohoka vona a nitoni i bele ne vona ni toni a niluhoi ne mua, mu gu pesi tora.

⁴ Mu kaloho a nimava, naha ni malo, muri bara mu malamala liu, i uka ma mu gu bala vona tara naro kamumu na Vure.

⁵ E rei a viri i uka ma i tahoka a loho­kanga kamumu ni laho kamumu, ge nanea a Vure ge habia vona a lohokanga. Muri a Vure bara i habia a lohokanga vona, a vuhuna a Vure ia a mari ni hate­balala. Na tahuna a Vure i habi a maki, i habi kunana. I uka ma ge vakamaruhu a viri.

⁶ Pali na tahuna a viri ge nana, nahea ge loho rua. Ge luhoi tora. A viri i loho rua i manga a bokona dari i bolea a vilu i rere viliha.

⁷ Ra bakovi maea, ma ge luhoi e Bakovi Dagi ge habia vona tara maki.

⁸ A bakovi i loho rua, i uka ma i tabuli kamumu a niluhoi vona, bara i ruru.

⁹ E huriki a turane hita ri matasia, ri gi vivi na tahuna a Vure ge kavurike ria.

¹⁰ Pali e huriki ri tahoka a mahala i kupo ri gi vivi na tahuna a Vure ge vakakiroko ria, a vuhuna bara ri mate tavula manga a hurumade.

¹¹ I rike a haro, i hua a hurumade, i malai a kaina, i maparu a vuana, i uka ma i mata kamumu tabu. I mavonga kunana a viri i tahoka hateka a mahala bara i mate na tahuna i tabana ni rata a leho vona.

Mu Gege a Nitoni

¹² A viri i pesi tora na tahuna a nitoni i bele ge vivi, a vuhuna a Vure bara i habi a mapana, ge bole a nimahuri vaka­roro, i manga a viri i mulangi na rihiva i bole a tama. A Vure i taki muga pali ge habi a mapa ne huriki ri ngarua a Vure.

¹³ Na tahuna a bakovi tara i ngaru ni rata a naro hale, nahea ge ta maea, “A Vure i turari iau a ratea a naro hale iea.” Naha ni ta mavonga, a vuhuna a Vure i uka ma ge turari ioe go rata a naro hale. Pali a Vure tara, a naro hale i uka ma ge turaria. A Vure tara i uka ma ge turari ioe go rata a naro hale.

¹⁴ Pali a nitoni i bele na bakovi na tahuna a ningaru hale na hatena i turari ia i rata a naro hale.

¹⁵ Muri a ningaru hale i vakabele a naro hale. Muri a naro hale i vakabele a matenga.

¹⁶ Mua e huriki a turagu, a ngaru hateka mua. Naha ni tami mule mua.

¹⁷ A maki kamumu lobo si bole, a maki kamumu lobo ni habi tavula ne hita, ri valai ne Tamane hita na hunu, ra viri i ratarike a haro, a keva, a maka hada ri para polomeli na hunu. A maka nipara nga, ri para dagi na parava ranga, ri para kiroko na parava ranga. Pali e Tamane hita i uka ma i mavonga. I uka ma i pulo lae a vilona.

¹⁸ Na ningaru vona i vakasiri a nita muholi vona, ge rata hita ge hita e huriki e tuna. I rata mavonga, ge bole tala hita na maki lobo i ratarike, si gi muga ne ria.

Mu Longototo a Nitana Vure

¹⁹ Mua e huriki a turagu, a ngaru hateka mua. Mu longo kamumu. Na tahuna a viri i ta, naha ni koli malaviriri a ngava. Mu longo kamumu taro a ngava, mu luhoi kado, muri mu koli. Naha ni hini­hate,

²⁰ a vuhuna a nihinihate na bakovi i uka ma ge vakabele a naro malamala na Vure.

²¹ Lakea, a ngaru mu gu pe a naro i katoki, a maka naro hale legelege ne mua. Mu vakakiroko mua, mu longototo a nitana Vure, ra ni ru na hatene mua. Ra ngava iea i kara ge korimule mua.

²² Na tahuna mu longoa a nitana Vure, naha ni longo tavulea. Mu longototoa. Na tahuna mu longo tavulea, mu tami mule mua.

²³ A ta mavonga a vuhuna e huriki ri longo a nitana Vure, pali i uka ma ri muri mai, ri manga a bakovi i mata­nono a matana na tuku.

²⁴ I masia a matana, pali i uka ma i ratea tara maki. I vano kunana, i uka ma i luhoi tabua a matana i mata navai.

²⁵ Pali a viri i longo kamumu a vinara kamumu na Vure, i ramai a ngava i tabuli vona, i uka ma i longo kaburungia, a Vure bara i rata kamumu ia. Si lohoka vona, a vinara na Vure i vakamatukapaga hita na naro hale.

²⁶ E huriki ri luhoi ta ri ramai a Vure, pali i uka ma ri matakari kamumu a tabelene ria, re huriki maea ri tami mule ria. A maka maki ri rata, ri luhoi ta a maki a Vure ge vivi vona, ri rata tavula kunana.

²⁷ A naro i malamala na matana Vure, e Tamane hita, i maea: si gi kori e huriki a duku, e huriki a havuri, na tahuna ri bole a maregoa. A maki tara si gi ratea si gi matakari kamumu a nilaho ne hita, i uka ma si gi ramai a rabu na malala, ma si gi katoki na matana Vure.