A Vuhuna 6 - A Nitana Vure

A Naro Hale ne Huriki

¹ Na tahuna e huriki a bakovi a ngatavine ri bele kupo na malala, ri vakabele e huriki e tune ria ngatavine.

² E huriki a tuna Vure ri matai ria ri mata kamumu hateka, lakea e rei ne ria i ngaru ni parangi, bara ri parangi a ngatavine ri ngaru.

³ Muri e BAKOVI DAGI i ta maea, “A hanugu i uka ma ge made pololilo na bakovi na parava vakaroro, a vuhuna ia a bakovi na malala kunana. A pida ne ria ge harena kunana ne 120.”

⁴ Na tahuna iea, e huriki a kabu ne Nepilin ri made na malala. Lakea e huriki a tuna Vure bakovi ri parangi na ngatavine na malala, ri vakabele huriki a hamone ria. Re huriki nga, ria a bakovi hateka, a rane ria i dagi na tahuna iea.

⁵ E BAKOVI DAGI i matai a narone huriki na malala i hale liu, a maki ri luhoi kunanea a naro hale.

⁶ I kilu vona a hini i rata rike e huriki koea na malala.

⁷ I tapuhaki i ta maea, “Iau ga vakalobo koea na malala e huriki a bakovi a rata rike. Pali ga vakalobo tabu a maka livoa, a kadirovo, turana a maka maki lobo ri laho na robo, a vuhuna iau a kilu vona a hini a rata rike a maka maki nga.”

⁸ Pali e BAKOVI DAGI i vivi vona e Noa.

⁹ Iea a nita na narone Noa: E Noa ia a bakovi kamumu, a narona i kiripiripi na matane huriki a bakovi na tahuna iea. I laho turana Vure.

¹⁰ E Noa i tahoka e tuna i ala tolu: e Sem, e Ham e Iapet.

¹¹ Na matana Vure, a malala i vonu na maka naro hale. E huriki ri tagege, ri vaubi lae.

¹² A Vure i masia a malala i vonu na maka naro hale, a vuhuna a maka narone ria i hale hateka.

¹³ Lakea, a Vure i takia e Noa, “Iau ga ratapile e huriki lobo, a vuhuna a malala i vonu vona a maka naro hale ne ria. Muholi hateka, iau ga ratapile lobo e huriki a bakovi, turana a malala.

¹⁴ Pali ioe, o haea a agarungu vomu, o haea na kai a saipres. O nagi pololiloa, muri o kavitagu a hini pololilo, a hini polovavo na kasita.

¹⁵ Ra agarungu iea o hae maea: a niolana ge 150 mita, a nibolana ge 25 mita, a nipesina ge 15 mita.

¹⁶ Na tahuna o hae a mapana roho na agarungu, nahea a mapana ge padoi liu a gagana. Ge tabuli a hini ge 5 mita. A tabekena agarungu ge tolu: ge polotano tara, na kurukuruna tara, ge polomeli tara. Na gagana tara o rua a hinebi.

¹⁷ Iau ga rudua a marungulolo ge ratapile a maka maki polotano na hunu, a maka maki mahuri ri bango na ruperene ria, a maki lobo na malala bara ri mate.

¹⁸ Pali iau ga rata a ngava dagi turamu, muri bara o rike na agarungu vomu turana e girihimu, e tumu, e kamu.

¹⁹ O vakaha dili na agarungu a maki lobo ri laho na robo, ge ruarua, a toga, a kinana.

²⁰ O vakaha turane mua, ge ruarua a maka kadirovo, a livoa, a maki lobo mahuri legelege.

²¹ O bole tabu a maki ni kani, o ru kamumu, ne vona e mua turana a maka maki mahuri o vakarike.”

²² Lakea e Noa i rata lobo a maki a Vure i taki vona ge rata.