A Vuhuna 49 - A Nitana Vure

E Iakop i Gamai e Tuna Mai

¹ Muri e Iakop i gale palupu e huriki e tuna, i ta maea, “Mu valai ga taki mua vona a maki bara i bele ne mua muri ma.

² “Mua o huriki e tune Iakop, iau e Israel e tamane mua, a ngaru mua mu gu vapopo, mu gu longo a ngava ga taki mua vona:

³ “O Reuben, ioe a tabua nau. A vakabele ioe na tahuna a riau, a tuhaka vona. O tero o gao hateka ne huriki e tugu.

⁴ Pali ioe a raha. Ngane i uka ma go muga tabu, a vuhuna o mahita turane girihigu tara, o rata halea a kiri nau i katoki.

⁵ “O Simion o Levi muru kinana taku, a bainat a lebo marua.

⁶ Iau i uka ma ga ta turane marua kapiloho. Iau i uka ma ga made turane marua na vaponga, a vuhuna na tahuna muru tahate, muru rabalaki a bakovi. A bulmakau ranga muru ubiputu a vahane ria i manga a rihiva marua.

⁷ Ngane a ruduraha marua, a vuhuna muru hini hatena. E huriki a hamone marua bara ri made viliha turana a kabu ne Israel.

⁸ “O Iuda, e huriki a turamu bara ri kavurike rike a ramu. Ioe bara o hori a lohone huriki a pile vomu. E huriki a turamu bara ri lolu puru na matamu.

⁹ O Iuda, ioe o manga a tuna laion, i lakavu a kania, i hamule na murina, i mahita i po a kanimatana. I uka a viri ge kinikoi ia.

¹⁰ A kodo-hariki i tabuli na limamu, bara o matakari vakaroro, i harena na tahuna o bele na tanga e Silo, o matakari e huriki ala kupo.

¹¹ A Vuhuna Iuda, a maka kaina vain vona i kupo. Bara o kolo tata a donki vomu na rahana, o loi a varakia vomu na naruna.

¹² A Vuhuna Bara o ninu hateka a vain, i vururu a matamu, o ninu hateka a namona ruru, a ngimu bara i kea manga a ruruna bulmakau.

¹³ A Vuhuna “E Sebulun, bara i made tabukoi na dari, a roa vona, bara i tahoka a bala kamumu na girimo ge pasi vona, a robo vona bara i harena o Sidon.

¹⁴ A Vuhuna “E Isikar, i gao manga a donki, pali i mahita turana a popou vona.

¹⁵ A Vuhuna Bara i masia a malala i kamumu, i ngarua ge made vona. Muri bara ia a vorakato, i rata a leho dagi.

¹⁶ “E Dan, ia ra kabu, bara i matakari e huriki a Israel.

¹⁷ E Dan, i manga a mata hale i tabuli na dahana dala. Na tahuna a hos i nunu valai, bara i to tala, i kara tatea a vahana, i boru a bakovi i made na hos.

¹⁸ O BAKOVI DAGI, a ngaru ioe go kori iau.

¹⁹ “E Gad, e huriki a panaho, bara ri valai ri vaubi turana, pali bara i gege ria i lili mule ria.

²⁰ “E Aser, a malala vona bara i vakabele a maki ni kani kamumu, i kara ge kani a hariki.

²¹ “E Naptali, i manga a kinana dia i laho viliha, i vakabele e tuna ri mata kamumu.

²² “E Iosep i manga a kai a vain i pesi tabukoi na lomu, i kupo a kanena. A rahana i kupo i rako rike na nure.

²³ E huriki ri vaubi na kiniperi ri gao hateka, bara ri valili ia ri vaubi turana.

²⁴ Pali bara i nugu tata torea a kiniperi vona, a vuhuna a limana i vaga hateka, na nitora na Vure Tuhaka Hateka ne Iakop, a Matakari, a Kedo ne Israel.

²⁵ A Vure Tuhaka ne tamamu ge matakari ge gamai ioe. Bara i rudu vilia vomu na hunu a vala, i rata a naru ri gi bele kupo na malala; i rata e huriki a ngatavine na kabu vomu ri vakabele a koma i kupo.

²⁶ A Vuhuna Iau e tamamu a ngaru ioe, ge maragisi vomu a maki lobo. A maki kamumu a ngaru go bole bara i bele kupo bara ri kavitagu a maka lolo. Iosep, a maki lobo bara ri tabuli na limamu, a vuhuna ioe a bakovi dagi ne huriki e turamu lobo.

²⁷ A Vuhuna “E Bensamin i manga a kaugara i rabalaki a kania. Na hatelanga i kani a maki i rabalaki. Na malunga i veru a maki i kani kaleva.”

E Iakop i Mate

²⁸ Re huriki nga, a kabu i ravulu a polona i rua ne Israel. Ra maka ngava nga, e Iakop i taki virihi ria vona na tahuna i gamai takutaku ria.

²⁹ Muri e Iakop i tarulu mule e huriki e tuna, i ta maea, “Iau a tabukoi ga mate. A ngaru mua mu gu tanu iau na dahana e huriki a gare nau, na babe na malala e Epron, a bakovi o Hiti.

³⁰ Ra babe iea i tabuli na malala e Makpela tabukoi o Mamare, na robo e Kenan. Ra babe iea turana a malala, e Abraham i kona ne Epron, a bakovi o Hiti.

³¹ E tamarane mua e Abraham e Sara, e tubune mua e Isak e Rebeka, e kinane mua e Lea ni tanu vonga.

³² Ra babe iea turana a malala, ni kona na kabu ne Hiti.”

³³ Na tahuna e Iakop i tarulu lobo ria, i karuku lakea na kiri vona, i mahita puru. Muri i taravango a nilobona bangona i mate, i vano i made turana e huriki a viri vona ri mate pali.