A Vuhuna 40 - A Nitana Vure

E Iosep i Vakalohoka a Vurena Bakovi ala Rua

¹ Na parava ranga muri, a vora ni ninu kilehi a vain ne Parao turana a vora ni gutu a bret vona, ru rata a naro e Parao i uka ma i ngaru.

² E Parao i madihi a hatena vona a vora vona nga, ra matakari na vain, a matakari na bret.

³ Lakea i ru dili rua na roho na ubu ne huriki a tagari, ra na bavi ni ru dili e Iosep vona.

⁴ A ubu na tagari i habi rua ne Iosep ge matakari. Ru made tabaka popote na bavi,

⁵ lakea na rodo tara ru vurena varago, pali a vurene rua i uka ma i palupulupu. A nituveve na vurene rua ranga, i uka ma i palupulupu.

⁶ Na hatelanga e Iosep i valai mai rua, i matai rua ru loholege vona a vurene rua.

⁷ Lakea i nana ra bakovi nga, ra ru made turana na ruma na matakari vona, “I navai muru mata matasia mavonga mona?”

⁸ Ru koli, ru ta maea, “Maria miri vurena, pali i uka tara viri koea ge tuveve polo a ngava kapiloho na vurene maria.” Lakea e Iosep i ta maea, “A Vure kunana i kara ni tuveve a nita kapiloho na vurene marua. Muru tuverei a vurena marua, ga longo.”

⁹ Lakea a matakari na vain i tuvereia ne Iosep a vurena, “Iau a vurena vona a kai a vain,

¹⁰ i tahoka a rahana i tolu. Muri kunana na pagana i koru rike, i pura, i rara liu a kanena.

¹¹ A bolea a kikei ne Parao, a bebe purua vona a naruna vain, muri a habia vona.”

¹² Muri e Iosep i tuvevea vona a vurena, “A rahana i tolu i manga a parava i tolu.

¹³ A parava i tolu ge lobo, e Parao bara i bole mule ioe, o leho tabu vona, o habi tabu a kikei na vain vona, i manga hosi o leho vona.

¹⁴ Na tahuna o pagitala o made kamumu o luhoi iau, o rata a naro kamumu nau. O takia e Parao ge bole tala iau na bavi.

¹⁵ Ra iau, hosi ni turari na robo ne huriki a Hibru, ni bole valai koea. Na tahuna a made koea i uka ma ratea tara naro hale, pali ni vakamadihi tavula a kuligu, ni ru dili na bavi.”

¹⁶ Na tahuna a matakari na roho na bret i longoa e Iosep i tuveve kamumu a vurena bakovi i matakari a vain, lakea i takia, “Iau tara a tahoka a vuregu: a vurena a kube a kulopi na bret i tolu.

¹⁷ A kulopi polo meli liu, i vonu vona a maka bret legelege ne Parao. Pali a maka kadirovo ri valai ri karapasi tala a bret a kube na kulopi.”

¹⁸ E Iosep i tuvevea a vurena, “A nita kapiloho na vuremu i maea: a kulopi i tolu i manga a parava i tolu.

¹⁹ Ge lobo a parava i tolu, e Parao bara i vakatavore ioe na kai. Muri, a maka kadirovo bara ri valai ri kania a bobomu.”

²⁰ Muri na parava i tolu, e Parao i rata a habu na parava ni poda vona, i kani turana e huriki a bolekori. I bole valai a matakari na vain, a matakari na bret, i vakapesi rua na matane huriki a bolekori vona.

²¹ Lakea i takia a bakovi i matakari a vain ge hamule lakea na leho vona, ge habi tabu a kikei na vain ne Parao.

²² Pali a bakovi i matakari na bret, ni bole ni vakatavore na kai, i manga a ngava e Iosep i tuveve polo vona.

²³ Na tahuna a matakari na vain i pagitala, i uka ma i luhoi tabua e Iosep, i longokaburungia.