A Vuhuna 33 - A Nitana Vure

E Iakop e Esau Ru Vakorokoro

¹ E Iakop i mata muga, i masia e Esau i valai turana e huriki a bakovi ala 400, lakea i kalipida e Lea, e Resel, a vora ngatavine ala rua, e huriki a koma.

² I vakalaho muga a vora ngatavine turane huriki e tune rua, e Lea turana e huriki e tuna ri laho na kurukuruna, e Resel e Iosep ru laho muri.

³ E Iakop kunana i laho muga, i lolu puru na malala balaka polorua na tahuna i laho lokovonga ge taguia e tukana.

⁴ Lakea e Esau i nunu lokovonga ne Iakop, i taguia, i rakoa, i ngurua ru vataringi.

⁵ Muri i mata rike e Esau, i matai e huriki a ngatavine a koma, lakea i nana, “E rei e huriki ri turamu?” Lakea e Iakop i koli mulea i ta maea, “Iau a vora vomu. A Vure i rata a naro kamumu nau, i habi nau e huriki a koma nga.”

⁶ Muri a vora ngatavine turane huriki e tune rua, ri laho valai ri lolu puru.

⁷ E Lea turane e tuna mai ri muri mai ria, ri lolu puru. E Resel rua e Iosep ru muri, rua ranga ru lolu puru.

⁸ Lakea e Esau i nana, “Ra maka sipsip a bulmakau a matai, go bole lokovai?” Lakea e Iakop i ta maea, “Bakovi dagi nau, ta ga habi vomu, go rata kamumu iau.”

⁹ Pali e Esau i koli mulea i ta maea, “Tarigu, iau a tahoka i kupo hateka. O matakari a maka sipsip a bulmakau nga, ge ne vomu.”

¹⁰ E Iakop i hehe, i ta maea, “I uka ma ge mavonga. Ngane tu vamatai tabu, o bole nau a maki nga. Ra ngane a matai a matamu, i manga a matai a matana Vure, a vuhuna o vivi ni tagui iau.

¹¹ Ngane a ngaru go bole a mahala nga a vuhuna a Vure i rata a vilo kamumu nau, a tahoka a maki i kupo.” E Iakop i ta hinituhana, lakea e Esau i bole a maka mahala nga.

¹² Muri e Esau i ta maea, “Tu vano, iau ga laho turamu.”

¹³ Lakea e Iakop i ta maea, “Tukagu, e huriki a koma, i uka ma ri paki kamumu ma. Pali iau a luhoi hateka a maka sipsip, a bulmakau ra ri vakaruru, ma ri gi laho hateka na parava i taku, ma ri gi mate.

¹⁴ Tukagu, o laho muga ke. Ge laho muri e tarimu. Ga bae a maka sipsip a bulmakau turane huriki e tugu mai, bara mi pakarau ioe o Seir.”

¹⁵ Lakea e Esau i ta maea, “Ga taparaki vomu ranga vora nau ri gi laho turamu.” Pali e Iakop i koli, i ta maea, “Ge vona ra? A ngaru kunana ioe go ngaru iau”

¹⁶ Na parava iea, e Esau i vakatubu ni laho mule lakea o Seir.

¹⁷ Pali e Iakop i lakea o Sukot, i ratea vonga a tanga vona, i hae a kape na sipsip a bulmakau vona. Lakea ni gale liu ra mada iea e Sukot.

¹⁸ Muri e Iakop i pea e Padan-Aram, re Mesapotamia, i bele na robo e Kenan, i ru a mada vona tabukoi na tanga dagi e Sekem.

¹⁹ Lakea i bole a kedo silva i 100, i kona ne tamane Sekem, na kabune Hamor, a malala i vakapesi a kape vona.

²⁰ Lakea i vakapesia vonga a dede-kedo, i galea, “A Vure a Vure ne Israel.”