A Vuhuna 3 - A Nitana Vure

A Mata i Tamia a Ngatavine

¹ A mata i moro hateka na rabu na taminga, i rangi a maka livoa lobo e BAKOVI DAGI a Vure i rata rike. I nanea a ngatavine, “I muholi a Vure i taki marua, nahea muru gu kani a maka kanena kai lobo na hania?”

² A ngatavine i koli, i ta maea, “Maria bara miri kani lobo a maka kanena kai na hania,

³ pali a Vure i taki maria tabu nahea miri gi kani a kanena kai na kurukuruna hania, nahea miri gi padoi ia, ma ga miri gi mate.”

⁴ Lakea a mata i takia a ngatavine, “I uka ma muru gu mate. I uka liu.

⁵ A Vure i lohoka, bara muru kania, a matane marua bara i palala, bara muru manga a Vure na nilohoka na naro kamumu na naro hale.”

⁶ Ngane a ngatavine i masia a kanena kai i kamumu na nikanina, i kamumu na matana, i ngaru ni tahoka a niluhoi dagi. I bolea, i kania. Muri i bole a kalavana i habia ne girihina, ia tara i kani.

⁷ Muri a matane rua i palala, ru matakilala rua ru bobo, pali ru rahi a pagana kai a pik, ru kapikari rua vona.

⁸ Muri a bakovi turana e girihina ru longoa e BAKOVI DAGI a Vure i lalaho na hania na malunga. Lakea ru vano ru pesi kapiloho vona na kai na hania.

⁹ Lakea e BAKOVI DAGI a Vure i galea a bakovi, “Adam, ioe vai?”

¹⁰ E Adam i koli mule, i ta maea, “A longo ioe o laho na hania, a mangenge. A kapiloho a vuhuna a bobo.”

¹¹ Lakea a Vure i nanea, “E re i taki ioe o bobo? Ra ioe, o kania a kanena kai a ta pupukari ioe vona?”

¹² A bakovi i koli, i ta maea, “Ra ngatavine o vakamade turagu, ia kunana i habia nau a kanena kai, a kania.”

¹³ Muri e BAKOVI DAGI a Vure i nanea a ngatavine, “A ra o ratea ke?” Lakea a ngatavine i koli, “A mata i tami iau a kania a kanena kai.”

¹⁴ Pali e BAKOVI DAGI a Vure i takia a mata, “Ngane a ruduraha ioe bara o bole a nimadihi polomeli liu na maka sipsip a bulmakau, a livoa, a vuhuna ioe o rata a naro hale. Ngane bara o laho na ngalamu, o todo a habulo na parava vakaroro.

¹⁵ Bara ioe a pile na ngatavine, e huriki a hamomu ranga bara ria a pile na hamona ngatavine. A hamona ngatavine bara i paha momo a gimu, pali ioe bara o kara tatea a vahana.”

¹⁶ Muri a Vure i takia a ngatavine, i ta maea, “Ioe bara o bole a nimadihi dagi ni singou, ni poda a koma. Ra nimadihi, i uka ma go hatakia. Pali bara o ngarua e girihimu, e girihimu bara i matakari ioe.”

¹⁷ Muri i takia e Adam, “Ioe, o longototo e girihimu o kania a kanena kai a ta pupukari vona, ‘Naha ni kania’. Ngane a rudurahea a malala a vuhuna o longotaro iau. Na parava vakaroro bara o leho, o kani.

¹⁸ A malala bara i vakabele a poto a barakau. Ioe bara o kani a maki o varo na hania.

¹⁹ Bara i kani ioe a mavidia, o kani. Bara o rura i vano, i harena na tahuna o mate vona. Muri, bara o hamule lakea na habulo ra a vakabele ioe vona. Ioe a habulo, bara o hamule lakea tabu na habulo.”

²⁰ E Adam i vunua a rane girihina e Eva, a vuhuna bara ia e kinane huriki lobo.

²¹ E BAKOVI DAGI a Vure i rahi a varakia na kulina kanirau, i vakarea rua.

A Vure i Lili Tala e Adam, e Eva o Iden

²² Muri e BAKOVI DAGI a Vure i ta maea, “A bakovi ngane i manga teu, i lohoka na vilo kamumu, na vilo hale. Nahea ge made tabukoi koea, ma ge padoi a kai na nimahuri, ge kania, ge mahuri vakaroro.”

²³ Lakea e BAKOVI DAGI a Vure i tono talea na hania o Iden a bakovi, ge hamule, ge leho na malala ni rata rike ia vona.

²⁴ A Vure i tono talea pali a bakovi, muri i vakapesi na nirikena haro na hania o Iden ranga agelo, turana a vito i hube i vito vito lae, ri gi tagaria a dala lakea na kai na nimahuri.