A Nimariu 30 - A Nitana Vure

A Dede na Havu Mangisipa

¹ “O bolea a kai a akas o haea a dede ne vona ni habi a havu mangisipa nau.

² A niolana dede ge 45 sentimita a nibolana tara ge 45 sentimita, a nipesina ge 90 sentimita. O kau ge va a tupi na nimodona dede i va.

³ A hini polomeli, o kavitagu na gol kabakaba a tupi. A harena dede mu kavitagua na tabekena gol ge ola.

⁴ O rata na gol a halui ge rua, o rua koea tara, na tabeke lake tara, ne vona ni rodo dili a binole. O kolotata ra halui nga polotano tabukoi na gol, o kolotata na harehare.

⁵ O kau a tabekena kai a akas ge rua, ga binole na dede. O kavitagu na gol a binole nga.

⁶ O bolea a dede o rua polovavo na kala dagi, i naviri mule a Tava na Ngava Dagi, tabukoi na murina nidodo polomeli na tava, na hini ga tagui ioe vona.

⁷ “Na hatelanga lobo e Aron ge valai ge rata kamumu a maka lam, ge namia a havu mangisipa ge vakabele a pokona kanono manginoro.

⁸ Na malunga liu ge nami tabua a havu mangisipa, na tahuna i valai ge nami a maka lam. Ra nihabi iea, e huriki a hamone mua ri gi ratea vakaroro muri ma na matane BAKOVI DAGI.

⁹ Na dede iea, naha ni tabari iau vona a havu mangisipa, a sipsip ni gutu-vuro, a vit, a vain i uka ma ni gamai.

¹⁰ Na parava ge taku kunana na pida lobo e Aron ge ratea a dede iea ge matapado na matagu. Ge bole ranga dara na sipsip ra mu habi ni puga vuroki a naro hale, mu ru na tupina dede. Ra dede iea ni gamaia, ne nau kunana. E huriki a hamomu ri gi rata maea muri ma.”

A Nirukadolu na Kape

¹¹ Muri e BAKOVI DAGI i takia e Moses,

¹² “Na tahuna o bole a rane huriki a Israel, o here puru na puhu, o taki ria ri gi habi tavula nau ranga mahala. Ge uka, a gilanga dagi bara i bele i ratapile ria.

¹³ E huriki ni here a rane ria ri gi habi a moni silva ge polotara na gram, ge a nihabi ne BAKOVI DAGI.

¹⁴ O here puru a rane huriki ri tahoka a pida i ravulu rua, i rike. Ria lobo ri gi habi a moni nau.

¹⁵ A bakovi na mahala, nahea ge habi kupo. A matasia, nahea ge habi popote. A bakovi i taku ge habi kunana nau a moni silva maea, ne vona ni kavitagu a naro hale vona, i uka ma ge mate.

¹⁶ Ra moni nga ne vona ni matakari a kape nau. Ga matai a moni, ga luhoi e huriki a Israel, ga kavitagu a naro hale ne ria.”

A Tavila na Hilova

¹⁷ E BAKOVI DAGI i takia e Moses,

¹⁸ “Mu bole ranga bras mu ratea tara tavila, mu ratea tara dede ne vona ni ru langa a tavila vona. Mu kiru na tavila a naru, mu ru na koropalana a dede, a Kape na Vaponga.

¹⁹ E Aron turane huriki e tuna ri gi vahilolo a limane ria, a vahane ria vona.

²⁰ E huriki ri ngaru ni dili na roho nau o ri gi valai tabukoi na dede nau, ri gi habi a nihabi ni gutu na kanono ne BAKOVI DAGI, ri gi vahilolo taro a limane ria, a vahane ria, i uka ma ri gi mate.

²¹ Muholi hateka, ri gi vahilolo a limane ria a vahane ria, i uka ma ri gi mate. E huriki a hamone Aron kunana, bara ri ramaia a vinara iea.”

A Nibiri ne Vona ni Gamai

²² E BAKOVI DAGI i takia e Moses,

²³ “O bole kadolu a maka mangisipa kamumu. O bolea a mir, a nimavana a kilo ge polotara. O bole ranga havu ni gale a sinamon, a nimavana a kilo ge tolu.

²⁴ O bole ranga havu ni rata na kulina kai a kasia, a nimavana a kilo ge polotara. O bole a namona oliv a lita ge taku; o guru dili na maki nga.

²⁵ O vuli ge bele manga a nibiri. Ra nibiri iea ni taba, ne vona ni gamai a maki nau.

²⁶ “O bolea a nibiri iea, o gamaia a Kape na Vaponga, a Tava na Ngava Dagi,

²⁷ a dede turana a maka mahalana, a butuna lam turana a maka mahalana, a dede na havu mangisipa,

²⁸ a dede ne vona a nihabi gutu-vuro turana a maka mahalana, a tavila na hilova turana a dede vona.

²⁹ O gamai a maki nga, ga maki nau kunana. A bakovi o a maki tara ge padoi a maki nga, bara i matapado.

³⁰ “Muri o gamai e Aron turane huriki e tuna bakovi, ge ria a prister, ri gi rata a leho nau.

³¹ O taki e huriki a Israel, o ta maea, ‘Mua, turane huriki a hamone mua, mu bolea a nibiri iea mu gamai a maki nau.

³² Naha ni guru langa na bakovi tavula. Naha ni rata a nibiri ne mua ge maea. Ra nibiri iea ni taba, naha ni padoia.

³³ A bakovi i ratea tara nibiri maea, o ge guru langa tavulea na bakovi tavula tara, ra bakovi iea i uka ma ge made turane huriki a viri vona.’”

A Havu Mangisipa

³⁴ E BAKOVI DAGI i takia e Moses, “O bole a stakti, a onika, a bulukana a keke ni gale a golbanum, a bulukana a kai a balsam, o vuli ge vakabele a havu na havu mangisipa. A nimavana maki nga ge palupulupu.

³⁵ O bole a maki nga, o vuli kamumu, o rata a havu na havu mangisipa. O bole a mami popote o ru puru na havu ge ratea ge matapado ge malamala.

³⁶ O tutu kamumu a maki nga, ge bele a havu, muri o bole dili na Kape na Vaponga ranga, o ru tabukoi na Tava na Ngava Dagi na hini ga tagui mua vona. Ra havu iea i malamala hateka.

³⁷ Nahea tara bakovi ge ratea tara havu maea ge habia mua. Ra havu iea ni gi ru herehere ge nau kunana, e BAKOVI DAGI.

³⁸ E rei a viri i ratea tara havu ge maea, ra bakovi iea i uka ma i kara ge made turane huriki a viri vona.”