A Nimariu 1 - A Nitana Vure

E Huriki a Israel Ri Lakea o Egipto

¹ E huriki e tune Israel turana a kabu ne ria ri puru o Egipto turane Iakop ra nga,

² e Reuben, e Simion, e Levi, e Iuda,

³ e Isikar, e Sebulun, e Bensamin,

⁴ e Dan, e Naptali, e Gad, e Aser.

⁵ E Iosep i lokovonga muga. Na tahuna iea e huriki a hamone Iakop ri ala ravulu polorua.

⁶ Muri e Iosep, e turana mai, e huriki a hulu turana ri mate.

⁷ Pali e huriki a hamone Israel ri bele kupo, ri gao hateka, ri bele kupo o Egipto.

⁸ Muri na pida i kupo a hariki karaba i matakari o Egipto. Ra hariki iea i uka ma i lohoka ne Iosep.

⁹ Lakea i taki e huriki a viri vona, “E huriki a Israel ri bele kupo, ri rangi hita.

¹⁰ A vabinga tara bara i bele, bara ri taga turane huriki a pile, ri vaubi turane hita. Muri bara ri ha taroa a robo ne hita, ri vano. Si gi matakanea tara dala si gi rata ria nahea ri gi ala kupo hateka.”

¹¹ Lakea e huriki a Egipto ri taki e huriki a matakari ri gi vakuku e huriki a Israel ri gi leho hateka. Ri rata a tanga dagi i rua e Pitom, e Rameses ne vona ni ru kadolu a maki ni kani ne Parao.

¹² E huriki a Egipto ri ratapile e huriki a Israel. Pali e huriki a Israel ri tababana ni bele kupo, lakea e huriki a Egipto ri mangenge ne ria,

¹³ ri rata ria ri leho hateka.

¹⁴ A nimade ne ria ngane i hale liu, a vuhuna i uka ma ri malo. Ri vakuku ria ri gi rata a brik ne vona a ruma. Ri vakataki ria, ri gi leho hateka na hania, i uka ma ri dodo ria.

¹⁵ Na parava tara a hariki ne Egipto, e Parao, i taki a ngatavine o Hibru, e Sipra e Pua, a leho ne rua ni tuhori e huriki a ngatavine ni poda, i ta maea,

¹⁶ “Na tahuna muru tuhoria tara ngatavine o Hibru ge poda a koma bakovi, muru rabalakia a koma. A ngata­vine ge poda a koma ngatavine, naha ni rabalakia a koma.”

¹⁷ Pali ra ngatavine nga ru mangenge na Vure, i uka ma ru ramaia a nitana hariki, i uka ma ru rabalaki e huriki a koma bakovi.

¹⁸ Lakea a hariki i gale valai tabu a ngatavine nga, i nana rua, “I navai i uka ma muru ramaia a ngava a taki marua vona, muru gu rabalaki a koma bakovi?”

¹⁹ Ru koli ru ta maea, “E huriki a ngatavine o Hibru i uka ma ri manga e huriki a ngatavine o Egipto. Ri gao hateka ri poda malaviriri kunana. Maria i uka ma miri bele malaviriri, bara ri poda muga pali.”

^20-21 Lakea a Vure i rata kamumu a ngatavine nga, ru tahoka koma, a vuhuna ru togoa. Muri e huriki a Israel ri bele kupo, ri gao hateka.

²² Lakea e Parao i vakuku e huriki a Egipto, i ta maea, “Mu bole e huriki a koma bakovi na Hibru, mu voro puru na naru dagi e Nail, ri gi pasiri. Pali naha ni rabalaki a koma ngatavine.”