Bìoball air-loidhne

Ŋwàklù à Jon 5 - Ŋwàklù Fùyèn Kàn Mù Fê (Cameron)

Jisòs chwuk wùt kə̀blena

¹ À ndùku mô te gha mɨ ghɨ̂n gàna chyala, Jisòs kaha lo kwok a Jèlusalèm hi yə tuk wu chiku ghɨt a Jûs ale afû.

² Chɨm ale mô a Jèlusalèm a ngwùŋ a jwô mbàn à sù njyə̀, ghɨ toŋte na Bèthsidà a jìs yi Hibùlùs. Ma ghɨ ti ba tala wìmù afû mù tân.

^3-4 Jisòs kwok yen ni, ghɨt a yablena mô nì ghɨt a ngəhana atɨ̂n à mù wìmù tɨ̂n dô kə ni, ghɨt a fefana mô, nì ghɨta ma bâh wù wùnu ti kpû.

⁵ Wùt lè mô kəbi atɨ̂n à ghɨ̂t afû ma wù ti yaf wu lɨ̀m mtât njwò fama.

⁶ Jisòs ben yen ni te wù nìŋe afû, khɨli na wù ti yaf nâ wu yu dâ ki buf ha wun na, “Wò kòŋàlò hi ta?”

⁷ Wùt wù yafana àtɨ̂n jis na, “Bèbɨn, jwò nèkà nâbi wùni yu wùt hi bu shyəma wù lihi mu atɨ̂n. Yì nèkà mu shihi ghàlì hi yèn, ma à hì mô kə ma wùt shyə lyî a mo ashyə̂.”

⁸ Jisòs jis ha wun na, “Lòti lyì ghâm fafu ma wò hi gbê yênà.”

⁹ Te wù jìsa ni, wùt àtɨ̂n tâ, lyi ghâm fu wun fu hì gbê yênà. À ndùku mô ni a mô tuk wu laku wu ghɨt a Jûs,

¹⁰ ni ghɨt a tihena Jûs ale yen ni, ki jîs ha wùt mu wunâ na, “Lan mò tuk wu laku, saki bime wi na wò làhi tè gbè chyà nì ghâmfù.”

¹¹ Wùt àtɨ̂n jis ha ghɨna na, “À jis wùt we wù chwuka mu na mu lyi ghâm famfu ma mu lo.”

¹² Ghɨna buf ha wun na, “À mò nâ nde mu we wù jìsa na wò lyi ghâmfù ma wò hi gbê nì funfu agha?”

¹³ Ghɨ ndùku bufa ni wùt we Jisòs tì chwuka yâ khə wi na Jisòs mò nde agha, ma Jisòs ti lo lye a ghɨta fùtɨ̂n ghe ghɨ ndùku mô afû.

¹⁴ Jisòs fî yen wun a ndâ Fùyèn, jis ha wun na, “Wò ti tâ. Kə wò fî ni be, a bu ni, ma gha nê gan ha wò bəma chyâ yîn.”

¹⁵ Wùt àtɨ̂n ki lô a yu mefû yen fôktì ha ghɨt a Jûs na à ye chwuk Jisòs yi.

¹⁶ Ghɨna yîmì hi tè khɨŋle Jisòs, jîsà na à mò te wù chwuka wùt a wu tuk wu laku.

¹⁷ Biyani Jisòs jis ha ghɨna na, “Bom baha fètà kə yi fêt, mu boŋa kəta kə hi tè fèt kə yâ.”

¹⁸ Jîs yi wuni mi yê ni ghɨt a Jûs fî tok khɨŋ wu lum hi ywe wûn, beka wù khɨma sak yi tuk wu laku, tê dè kəbi yâ biyani hì fê toŋte Fùyèn na Bè wûn hi fè chwùtì na yi mò kəbi yi ghəl te Fùyèn.

Yènfù folò jyaka ha Wâ wûn

¹⁹ Ghɨ ndùku ngane wun ni, Jisòs ki jîs ha ghɨna na, “Mu jìsà ha ghàn hamok na, wan wi hi nè yi ghâ a wun a ngɨŋ, wù mò hi nì yi gha ye wù yena Bè wûn nê. Beka Bì nè kəbi ghə a mô kə yì yîn ye wan nè.”

²⁰ Yi ni mò ni beka Bì kòŋà wan, chwûtè nâbi ghə ghe wù nè ha wûn. Wù nè chwûtèlò ale ma wan ni, ghɨ chyâlà nâbi ghɨ̂n ma ghàn hi mô nì kani.

²¹ Kəbi yi ghəl te Bì lòhè ghɨta a yi kpû, wu ni ghɨna hi chyə̂, Wan ki kôŋ ma wù ni ma nâbi nde hi chyə̂.

²² Nâbi yani, Bì bu hi fè sak a wut. Wù ti fo jyaka na Wan hi saka nâ lum tù jɨ̀m,

²³ shyəma ghɨt à jɨ̀m nê hi ngumle Wan kə yi ghəl te ghɨ ngumle Bì. Yi ni chwùtè na à faŋ nâbi nde hi ngumle Wan, ma à hi mô na wù tà ngumli jə Bì we wù tuma wûn.

²⁴ “Mu jìsà ha ghàn hamok na, nâbi nde we wù ywo gha ye mu jìsà, bimi ha we wù tuma mu ma wù hi kəta chyə ye yi bè mê wi, ma ghɨ bê tè fè saka wùt mu wunâ. Yi chwûtè na wù ti tohna chya yi kpû hì chyə̂.”

²⁵ Mu jìsà ha ghàn hamok na, tuku hì bakhe bênàlò mu jìsà ni ma wu shyə bakhâ na ghɨt ghe ghɨ mô te ghɨt a kputena yu jyə̀ Wâ Fùyèn. À yu nâbi nde ni te wù khɨŋa ma wù nê hi chyə̂.

²⁶ Yi mô ni beka Bom ti bimi na, Wan hi nê ghɨta chyə̂.

²⁷ Wù ti fo kəbi jyaka na mu hi saka beka mu mò Wâ Wùt.

²⁸ Kə ghàn hi mô nì kani kum yìna meti beka yu bakha bênàlò na ghɨt ghe ghɨ mô a tu sì yu jyə̀ Wâ Wùt,

²⁹ ma ghɨ loti a yi kpû, ma ghe ghɨ ndùku nê jùŋ, kwoti chyə ye yi bè mê wi, ma sak ghe ghɨ chehì nê be.

Ghɨt ghe ghɨ fôktè kum Jisòs

³⁰ Gha yile wijə ye a mu mò hi nì a mu a jyak. Mu saka kə wu lum afa Yènfù jìsa na mu hi saka atɨ̂n. Yi ni chwùtè na mu saka kə yi ghəl beka mu nè wi gha ye mu kòŋà, biyani nê kə ye wùt we wù tuma mu khɨŋa na mu ni.

³¹ Mu ki kahi hì jîsà kum ngɨŋ à mì, ma ghàn tè bime jə̀ na gha ye mu jìsà mò hamok.

³² Mu khə na wùt lè jìsà lò kum mu, wù jìsà nâbi ghə kum mu yi hi mô kə hamok.

³³ Ghàn che tum ghɨta ha Jon, Jon yen jis kə hamok kum mu.

³⁴ Mu jìsà wi na wùt à mùsòŋ nê hi fôktè kum mu. Mu jìsà kə ni shyəma ghàn bimi ma ghàn bon.

³⁵ Jon chehì mô kə te lâm ha ghàn. À ndùku mô tuk mùlè, ghàn kôŋà hi yute gha ghe wù jìsà, ghɨ bana te lâm, nê na ghàn hi saŋlê.

³⁶ Mu kəta wùt wu jîsà kum mu chyâ Jon. Gha mɨ ghɨ̂n a mu nè jîsà kum mu, a mô ghe Bom fo na mu hi nê. A mô à ghɨ̂n ghe ghɨ chwûtè banhe na à tum Bom mu.

³⁷ Nâbi Bom we wù tuma mu ti jis kum mu. Ghàn tà timi yu jyə̀ wûn, ghàn tà timi yen te wù kə̀kà.

³⁸ Ghàn lèmà wi gha wuni a ghàn a təm beka ghàn tà bimi jə we a wù tuma.

³⁹ Ghàn fatè taŋ ŋwàklù Fùyèn beka ghàn khə na ghàn nè yenalò lumu hi khɨte chyə ye yi bè mê wi. Ŋwàklù Fùyèn yinâ jîsà kəbi kum mu.

⁴⁰ Biyani, ghàn bime wi hi bèn ha mu hi khɨte yi chyə mi yê.

⁴¹ Mu khɨŋa wijə na ghàn hi tuma kumtu ha mu.

⁴² Mu khəlò nki ghɨ̂t ye ghàn mò yini, khə na ghàn kòŋà wi Yènfù a ghàn a təm.

⁴³ Mu ben ma à tum kə nâ Bom mu, ghàn faŋ hi bimî ha mu. Biyani ma wùt wùlè ki bên a wun a ngɨŋ ma ghàn bimi wûn.

⁴⁴ Ghàn kòŋà hi tè tuma tu kum ha ngɨŋ sanisu, mômhè wi hi tè khɨte kum we wu bênà ha Yèn fe a fu mô kə fù mòk. Ghàn ni mò ni, ma ghàn bimi yàni?

⁴⁵ Kə ghàn hi khə na à nè ngane mu ghàn ha Bom, à nè ngane kə Musìs ghàn, we ghàn lèmà kwâktì yani ha wûn.

⁴⁶ Ghàn ndùku bime ha Musìs ma à hi mô na ghàn ti bimi ha mu beka wù ndùku nyâkà gha kum mu.

⁴⁷ Ghàn bimi yàni ha mu bime wi gha ye Musìs tì nyàka agha?

« Roimhe

Air adhart »

Lean sinn:

Ceanglaichean taic

Sanasan