Bìoball air-loidhne

Ŋwàklù à Jon 18 - Ŋwàklù Fùyèn Kàn Mù Fê (Cameron)

Ghɨ kwo Jisòs
( Mat 26.47-56 ; Mâk 14.43-50 ; Lûk 22.47-53 )

¹ Te Jisòs jə̀ma mihe ghê jùmtìbàmsu wunsu lo daŋ a fuŋla Kìdilòn, yen lyi a ngun à sù Olìfs sulesu.

² À ndùku mô yâ, Judàs we wù bəkle Jisòs khə luk wu tɨnu beka Jisòs ghê jùmtìbàmsu wunsu ndùku nyâŋhè yênàlò afû.

³ Te Jisòs ye lye a ngun afû ni, Judàs boŋ ben, chwûtè bênà nì lumu ha sojà sulesu nì ghɨt ale ghe ghɨ chînà ndâ Fùyèn, ma à tum ngàŋsu ndâ Fùyènsu nì ghɨt a Falàsî. Ghɨna ndùku bênà yâ kəta mwə̀ mù wòŋ nì khə̀ksù nì lâmsù.

⁴ À ndùku mô yâ, Jisòs khə nâbi ghə ghe ghɨ ndùku mô hi gàn ha wûn. Wù fwuti ben buf ha ghɨna na, ghàn khɨŋa nde.

⁵ Ghɨna fîsì na, “Ghàh khɨŋa wâ wùt à Nasalì wunâ ghɨ toŋte na Jisòs ni.” Jisòs jis na, “À mò mu ni.” Wù ndùku jîsà yâ Judàs we wù tì bəkle wûn mô kəbi afû ghê ghɨt mu ghê.

⁶ À hì mô te Jisòs jìsa ya na, “À mò mu ni,” ghɨna kaha kôtì yen a yi bàm fenti a chyə̂.

⁷ Wù fî buf ha ghɨna na, “Ghàn khɨŋa nde agha?” Ghɨna fî fîsì kə na, “Ghàh khɨŋa wâ wùt à Nasalì wunâ a ghɨ toŋte na Jisòs.”

⁸ Jisòs fî jis na, “Mu ti jis ha ghàn na à mò mu ni. Ghàn hì khɨŋa mu, ghàn delò ma jùmtìbàm sam sîn lo.”

⁹ Wù jis ni shyəma gha ye wù tì jisa ha Bè wûn kpen na, “Nâ wùt tà ləhà atɨ̂n à ghɨ̂t afa wò tì fo ha mu.”

¹⁰ À ndùku mô yani Samùn Bità kəta yi fâ, wù chwôk kat tən a tûŋla kpen wu wo ta wùt wù fètana a ngàŋ à ndâ Fùyèn yì ngaŋtena, yet yi wùt wù fètana àtɨ̂n mô Malkùs.

¹¹ Jisòs jis ha Bità na, “Kaha lihi fâ ya a mba. Wò kwâktè na mu kòŋà wi hi yena ngə̂k wu lum afa Bom lèma na mu yen atɨ̂n agha?”

Ghɨ lyi yen nì Jisòs ha Anàs

¹² Sojà sê nì wùt a ghɨna wù tâ, bakha nì ghɨt a Jûs ghe ghɨna ndùku chînà ndâ Fùyèn yì chìk tî kwo Jisòs kwut wûn,

¹³ lyi yen nì wûn a Anàs ashyə̂, a mô bà ywê Kàyafàs we wù ndùku mô ngàŋ à ndâ Fùyèn yì ngaŋtena a lɨ̀m afû.

¹⁴ Kàyafàs mu we ndùku mô kəbi we wù tì tobhe ghɨt a Jûs na yi jwôfà na wùt wù mòk kpu a ghɨta à jɨ̀m a tû.

Bità mana Jisòs
( Mat 26.69 , 70 ; Mâk 14.66-68 ; Lûk 22.55-57 )

¹⁵ Ghɨ kwo Jisòs ni shihi yèn, Samùn Bità yen a wun yi bàm ghê jùmtìbàm à Jisòs wùlè. Jùmtìbàm à Jisòs mi yê yen boŋ lyi kə yi lyî ghê Jisòs a bɨn a ngàŋ à ndâ Fùyèn yì ngaŋtena beka ngàŋ à ndâ Fùyèn àtɨ̂n ndùku khəlò wûn,

¹⁶ biyani Bità timi ki yi jwô bɨn. Jùmtìbàm à Jisòs yê a ngàŋ à ndâ Fùyèn ndùku khə kaha fwu yen a yi ywô bɨn, chyati wan wù ywên we wù ndùku fêtà afû wu yu mefû wù lyi lyi nì Bità.

¹⁷ Ghɨna shihi lyi ni wan wù ywên mu we ki buf ha Bità na, “Ba wò mò ni mô kəbi jùmtìbàm à wùt mu wuna wùlè agha?” Bità tunhî jis na, “Mu wijə jùmtìbàm à wûn.”

¹⁸ À ndùku mô ni, ngàŋ à ndâ Fùyèn yì ngaŋtena bakha nì sojàsù ti fati wusu beka luktu ndùku sana, Bità boŋ yen timi ghê ghɨna hì yotê.

Ngàŋ à ndâ Fùyèn yì ngaŋtena bufti a gha ha Jisòs
( Mat 26.59-66 ; Mâk 14.55-64 ; Lûk 22.66-71 )

¹⁹ Ngàŋ à ndâ Fùyèn yì ngaŋtena hì bufte a gha ha Jisòs kum jùmtìbàmsu wunsu nì yikî wuni.

²⁰ Jisòs fîsì jis na, “Mu chehì jîsà kə a ndan ha ghɨta à jɨ̀m yike a ndasu chintesu makə a ndâ Fùyèn yì chìk a tu lùk afa ghɨt a Jûs bè chîntè atɨ̂n. Mu tà ye timi hì nyamte jîsà yi jîs gha.

²¹ Wò bufte kə nâ a gha ghɨ̂n ha mu njwô ghə? Wò buf ha ghɨt ghe ghɨ chehì yute jîs yi mi. Ghɨna khəlò gha ghe mu chehì jîsà.”

²² Te Jisòs ndùku jîsà bê ni, sojà yìlè sam a wo a wun a jyə̀k buf ha wun na, “Wò gbi yàni hi tè jìs ha ngàŋ à ndâ Fùyèn yì ngaŋtena ni?”

²³ Jisòs fîsì na, “À shìki mô ma mu ti jis njahû, wo fôktì gha be ye mu jìsa, à hì mô ma mu jis yi gha hamok, wò fôktì na wò mu sam ha ghə agha?”

²⁴ Anàs jis na ghɨ lyê yen nì Jisòs ha Kàyafàs ngàŋ à ndâ Fùyèn yì ngaŋtena. Jisòs baha mô kə sù kùl.

Bità fî mana Jisòs
( Mat 26.71-75 ; Mâk 14.69-72 ; Lûk 22.58-62 )

²⁵ Bità hì baha mô yote kə wu wus, ghɨ fî buf ha wûn na, “Ba wò ni mô kəbi jùmtìbàm à wùt mu wuna wùlè?” Bità tunhî jis na, “Mu wijə jùmtìbàm à wûn.”

²⁶ Wùt wù fètana à ngàŋ à ndâ Fùyèn yì ngaŋtena a we à mò wut ha wùt we Bità tì kak a təna tûŋla wuna yâ buf ha wun na, “Mu tà che yen ghàn à wûn a ngun à sù Olìfs agha?”

²⁷ Bità fî tunhi kə yi tunhî lɨm à ngwû tôŋ.

Ghɨ yen nì Jisòs ha Balèt
( Mat 27.1 , 2 , 11-14 ; Mâk 15.1-5 ; Lûk 23.1-5 )

²⁸ Ghɨ bɨs lyi Jisòs a Kàyafàs à bɨn yen nì wun a tôk à wùt we à fə̀n à Lûm tì lèma na wù hi saka bâh à yi lak mu ghê. Ghɨt a Jûs yen tan afû tən hi lye a tôk beka ghɨna khɨŋa hi tè mò nì yulînì a ghɨna chyəna laka shyəma ghɨna khɨli hi yə Yə Daŋa chyalani.

²⁹ Balèt fwu ben buf ha ghɨna na, “Ghàn jis na wùt wuna bobhi ghə?”

³⁰ Ghɨna fîsì kə na, “À yê hì mô na wù tà gha bobhî, ma ghàh tà ben jə̂ nì wûn ha wò.”

³¹ Balèt jis ha ghɨna na, “Ghàn lyi lê wûn ma ghàn sak kə ghàn a sù ngɨŋ kə te sak yani yi laki chwùtè.” Ghɨt a Jûs mu ghê tunhî jis ha wun na, “Ghàh kəta wi jyaka hi ywe wùt.”

³² Ghɨna jîsà ni, hi lunhe gha ye Jisòs tì jisa kum nì nki kpu ye wù ndùku mô hi bè kpû.

³³ Balèt kaha lye a tôk toŋa Jisòs buf ha wun na, “Wò mò fə̀n ha ghɨt a Jûs ma?”

³⁴ Jisòs fîsì buf ha wun na, “Wò bufa kə nâ ha wo ngɨŋ ma, wò bufa kəta ghɨ tì fôktì gha ha wò kum mu ma?”

³⁵ Balèt buf ha wûn na, “Wò kwàktè na mu mò kəbi wùt à Jûs ma. À lo a ghɨt gha nì ngàŋsu ndâ Fùyènsu ben nì wò ha mu. Wò bobhi ghə?”

³⁶ Jisòs jis na, “Mu saka wijə fə̂n wù mu a mbye afân. Bu ni ma ghɨt a ma ghɨ fetana no hi tàmtì na kə ghɨt a Jûs kwo mu. Mu saka fə̂n wù mu wu lùk wu lô.”

³⁷ Balèt buf ha wun na, “Ba yi ni chwùtè na wò mò fə̀n agha?” Jisòs fîsì jis na, “Wò jìsà kə nâ hamok na mu mò fə̀n. Ghɨ bwɨ kə nâ mu ha fə̀n, mu ti ben a mbyî te fə̀n hi tè fòktè gha ye yi mô hamok. Nâbi nde we wù jìsà hamok ywolò jyə̀ mì.”

³⁸ Balèt buf ha Jisòs na, “Hamok mò na ghə?” Te wù bufa, kaha fwu yen a bɨn jis ha ghɨt a Jûs ghe na, “Mu tà yen jə̂ gha ye ghɨ mô hi kwo wûn atɨ̂n,

Balèt fo wu lum na ghɨ ywi Jisòs
( Mat 27.15-31 ; Mâk 15.6-20 ; Lûk 23.13-25 )

³⁹ biyani khə na à yè bê tânà wu yu Daŋa chyalanu wun, ghàn fôktì wùt mu fihi a chyâk. Mu fihi fə̀n a ghɨt a Jûs ha ghàn chîn agha?”

⁴⁰ Ghɨna bwati jis kə na, “Ngàŋ, kə fihi wûn! Bɨ̀li fihi Bàlabàs ha ghàh!” À ndùku mô yâ Bàlabâs mô wut wù chwoŋana.

« Roimhe

Air adhart »

Lean sinn:

Ceanglaichean taic

Sanasan