Bìoball air-loidhne

Ŋwàklù à Jon 14 - Ŋwàklù Fùyèn Kàn Mù Fê (Cameron)

Jisòs fôktì lum we wu yênà ha Bì

¹ Jisòs jis ha jùmtìbàmsu wunsu na, “Kə ghàn hi fumhe ngɨŋ sanisu. Ghàn bimi ha Yènfù ma ghàn fê bimi kəbi ha mu.

² Bɨn a Boma kəta sù ndâ su dô kə ni, à ye hì wijə ni, ma mu ti fôktì ha ghàn. Mu yènà hi fate wu luk afû ha ghàn.

³ Mu ki yê fatî, ma mu kahà bê lyi ghàn shyəma ghàn yen à hi mô ghàhnà wu lùk afa mu mò atɨ̂n.

⁴ Ghàn khəlò lum we wu yênà wu lùk afa mu yènà atɨ̂n.”

⁵ Tomòs ki buf ha wun na, “Ghàh mò hi khɨle yàni lumu a Bâ, khə wi nâbi nâ luk we wò yènà agha?”

⁶ Jisòs jis ha wun na, “Mu mò wu lûm, mô hamok fê mô a chyəna ghe ghɨ bè mê wi, wùt wi hi yèn ha Bì, a bu na wù tohna a mu wùn.

⁷ Ghàn shìki fate khə mu, ma ghàn hi boŋa khə Bôm. Hi yìmì chîn hi yèn ashyə̂, ghàn khəlò wûn ma ghàn ti yen wûn.”

⁸ Filîb jis ha wun na, “Bâba, ghàh khɨŋa kə yi gha yì mòk na wò chwuti Bì ha ghàh.”

⁹ Jisòs fîsì na, “Ba yi ni mô na mu ti chyə ghàhnà ghɨ̂n a wu yu dâ ni wo khə wi mu agha? Nâbi nde we wù yena mu, mò ma wù ti yen Bì, wò wu hì fê jîsà na mu chwuti wùni Bì ha ghàn?

¹⁰ Ba yi mô na wò bime wi na mu nì Bì mò kə ha wùt wù mòk agha? Gha ghe mu jìsà ha ghàn à wijə gha ma ghɨ ngɨŋa. À mò a gha a Bì we wù fo jyaka ha mu a yu mù jɨ̀m.”

¹¹ Ghàn bimi te mu jìsa na, ghàh à Bì mò kə ha shyə̀ à mòk bu ni, ghàn bimi lê kə kum nì gha kanana ghe a ghàn yena.

¹² Mu jìsà ha ghàn hamok na, à bimi nâbi nde ha mu ma wù nê hi nê nki tu gha te mu nè, fê nê chyâ nâbi ya beka mu kaha yênà ha Bì.

¹³ Mu nè nêlò nâbi ghə ghe a ghàn bufa a mu yi yet shyəma Bì chwuti koknì wuni tohne a Wâ wûn.

¹⁴ Ghàn ki buf nâbi ghə a mu yi yet ma mu nê ni ha ghàn.

Jisòs chwûnà na yi nè yê chinhelò Yohnà Yulena

¹⁵ Ghàn shìki kôŋà mu, ghàn hi lêmà sak tamtu.

¹⁶ Mu nè bufalò ma Bì fo gàmtì wùlè ma wù faŋ ghàn à ghɨna kə yu mù jɨ̀m.

¹⁷ Gàmtì mi yinâ mò a Yohnà Fùyènà ghe ghɨ chwûtè hamok kum Yènfù. Ghɨt a mbye wi hi fye a gàmtì mi yinâ beka ghɨna yena wi wûn, khə wi wûn. Biyani ghàn khə wûn beka wù chyə ghàn à ghɨna, mô hi tè mò a ghàn a fùtɨ̂n.

¹⁸ “Mu lò de wijə ghàn na ghàn faŋ te wana nkwô. Mu nè lôlò ma mu kahà ben.

¹⁹ Kə fu yulâ ni ghɨta mbye nè fè yena wi mu, biyani ghàn yenâ. Beka mu chyə, ma ghàn nê hi boŋa chyə̂.

²⁰ À bè hì mô wu tuk afa mu kaha bena ha ghàn ma ghàn khɨli na ghàh à Bôm mò kə ha wùt wù mòk, ma ghàhnà ghɨ̂n hi boŋa mô kə ha shyə̂ à mòk.

²¹ Wùt we wù kòŋà mu mò wut we wù ywo sak tamtu. À hì kòŋà nâbi nde mu, ma Bôm nê hi boŋa kôŋà wûn, chwûtè lum tamtu ha wûn.”

²² Wù jis ni Judàs, a bu Judàs Ìskaliyòt buf na, “Wò nè chwûtè yàni lum tatu ha ghàh a Bâ, ma wò faŋ hi chwùtì ha mbyî agha?”

²³ Jisòs fîsì ha wun na, “À koŋ nâbi nde mu, ma Bôm nê hi boŋa kôŋà wûn, ma ghàh à wûn nê ben ma ghɨ hi chyə̂ ghê wùt mu wê.

²⁴ Wùt hì kôŋà wi mu ma wù hi ywo wi yikî mi. Yikî yin a ghàn ywo ni à wijə yikî mi yi ngɨŋi, à mò yi yikî Bì we wù tuma mu.”

²⁵ “Mu ti fôktì gha mɨ ghɨ̂n ha ghàn kə nâ à jɨ̀m baha mô nì ghàn.

²⁶ Gàmtì ye a Bì nè tuma a mu yi yet a mô a Yohnà Yulena ghɨ nè yikelò ghàn nâ nì gha à jɨ̀m, ma wù fê yɨŋti nâbi ghe mu mò ma mu ti jis ha ghàn.

²⁷ “Mu ti lo de yutì yi mi ha ghàn. Mu fo kə nâ yutì mi ha ghàn. Mu fo wi yutì mi yîn ha ghàn te mbyi fo. Kə ghàn de na təm ghana hi fo ngək ha ghàn, kə ghàn hi fânà.

²⁸ “Ghàn tê yu te mu ye jisa na, ‘Mu lò de ghàn hi yèn hi kaha bèn.’ Ghàn shìki kôŋà mu ma ghàn hi saŋle na mu yènà a Bì a ngwùŋ beka Bì ngaŋte chyâlàlò mu.

²⁹ Mu ti fôktì gha ghɨ̂n ha ghàn chîn ghɨ baha mô teka ghɨ gan shyəma ghɨ nê shihi gàn ma ghàn bimi.

³⁰ Mu tê fê jîsà wi ha ghàn chin hadà beka fə̀n à mbyî wuna hì bènàlò. Wù kəta wi jyak ale a mu a tû,

³¹ biyani ghɨt a mbye mô hi khɨlî na mu kòŋàlò Bì njwo mu nè kə gha ye wù jìsa na mu hi nê. “Ghàn ben ma ghàhnà lo afân.”

« Roimhe

Air adhart »

Lean sinn:

Ceanglaichean taic

Sanasan