Bìoball air-loidhne

Ŋwàklù à Jon 10 - Ŋwàklù Fùyèn Kàn Mù Fê (Cameron)

Jisòs jis kum chìn à sù njyə̀ yì jùŋ nì njyə̀su wunsu

¹ Jisòs tî ma ngàn yìlè jis na, “Mu jìsà ha ghàn kə nâ hamok na, wùt ki bên de yi jwo mbànì hi lye atɨ̂n yen kwok lyi lum wu lùk wu lô ma wù nê hi mô kə nâ wùt wù chwoŋana.

² Wùt we wù mò kə nâ chìn à sù njyə̀ wù yè lye kə yi jwô mbàn.

³ Wù shihi lyî, wùt we wù chìnà jwo mbànì, jimì ha wûn. Njyə̀su hi ywo khɨle jyə̀ chìn à sù njyə̀ mi yinâ. Wu toŋâ, su yu khɨle jyə̀ wûn, wu lyê fwu nì sinsu.

⁴ Wù lyi fwu nì njyə̀su wunsu sîn nâ sù jɨ̀m ni, wu hi gbê tôknè nì sinsu. Su hi yênà kə wun a yi bàm beka su ywo khɨlelò jyə̀ wûn.

⁵ Njyə̀ sîn wi hi yèn a wùt yi bàm khə wi wûn. Su ki yen a wùt wù lò su tet kə yi têt beka su ywo khɨle wijə jyə̀ wûn.”

⁶ Jisòs ma ngàn yina ni biyani ghɨt ghe ghɨ ndùku yute tê khɨlî na wù jìsà nâ ghə agha.

Jisòs fôktì na yi mò chìn à sù njyə̀ wù jùŋ

⁷ Jisòs fî jis kpenhi na, “Mu jìsà ha ghàn kə nâ hamok na, mu mò jwo mbàn ye njyə̀su kəta hi tè tohna atɨ̂n.”

⁸ Nâ ghɨt à jɨ̀m ghe ghɨ tì bèna a mu ashyə̂ ndùku mô kə nâ ghɨt a chwoŋana, biyani njyə̀sù tê ywo jə̀ ghɨna.

⁹ Mu mò yi jwô yi mbànì, ma a tohna nâbi nde atɨ̂n, ma wù bon ma wù hi chyə̂. Lyê, fê chyâ fwô kəta wù kòŋà, fê kəta mwə̀ mù yə̂mù hi tê yə̂.

¹⁰ Wùt wù chwoŋana yè bê kə hi chwôŋ, bê kə hi bobhî nì hi fè ywî. Ha mu, mu ben a mbyî hi nì na ghɨta nê hi chyə̂ gha wi shyə ale.

¹¹ À mò kə nâ mu chìn à sù njyə̀ wù jùŋ. Chìn à sù njyə̀ wù jùŋ mò we wù mò hi kpû kum njyə̀ se wù chìnà.

¹² À mò wu yu afa ghɨ lâkà wùt na wù hi chînà njyə̀sù a bu chìn à sù njyə̀ makə bè sù njyə̀, wù yen a wu yu afâ nyàm à bâ bènà wu tet de njyə̀su, yi ben kwoti njyə̀su tɨnsu sulesu tet jyâhìlò.

¹³ Wù yè teta de ni beka ghɨ lâkà wûn yi lâk, ma à koŋ ma à gan nâbi ghə ha njyə̀su tɨnsu.

¹⁴ Mu mò kə nâ chìn à sù njyə̀ wù jùŋ mu khəlò njyə̀ samsu, su khə mu,

¹⁵ kəbi yi ghəl te Bom khə mu, mu khə wûn. Mu mô hi kpû kum njyə̀ samsu.

¹⁶ Mu kətalò njyə̀ samsu lesu su bu atɨ̂n à mbàn afân. Mu kəta hi lyè bèn nì sinsu na su hi ywo jyə̀ mì, mô a nôn a mòk kəta chìn wù mòk.

¹⁷ “Bom kòŋàlò mu beka mu kəta hi kpû shyəma wù kahà lohi mu na mu hi chyə̂.

¹⁸ Wùt wijə hi ywe mu, à kòŋà kə nâ mu hi fo ngɨŋ à mì ha kpu. Mu kətalò jyaka hi fo ngɨŋ à mì ha kpu, kəta kəbi a jyak hi kaha lòtì hi tè chyə̂. Jyak mɨ ghɨ̂n mò ma à fo Bom ha mu.”

¹⁹ Te wù jìsa ni, ghɨt a Jûs fî yîmì gùfna kə ghɨna ngɨŋ.

²⁰ Ghɨ dona hì jîsà na, “Wù kəta a yohnà be, jyakâ. Ghàn ywo ghə ha wun agha?”

²¹ Biyani ghɨ le jîsà na, “Yìna wijə jis yi wùt we wù kəta yohnà à be. Wùt we wù kəta yohnà be làhi nì na wùt wù fèfana kaha yen luktu agha?”

Ghɨt a Jûs mana Jisòs

²² Yu yi Yə we ghɨ ndùku kwâktè te ghɨ tì kaha fo ndâ Fùyèn yì chìk a Jèlusalèm ha Yènfù tì kpên a mô mbɨ̀ŋ.

²³ Jisòs hi gbê chyâ a bàh a nda Sòlomùn a bɨn a ndâ Fùyèn,

²⁴ ghɨt a Jûs ale ben yûŋtì a wun a ngwùŋ jis ha wun na, “Ghàh nè kwâktè gha hi yè tàn yini? Wò shìki mô kə nâ we ghɨ chwoka lema wo fôktì banhi ha ghàh.”

²⁵ Jisòs fîsì jis na, “Mu hì mô ma mu ti fôktì ha ghàn, biyani ghàn ti tê bimî. Gha kanana ghe mu nè a Bom a jyak fòktèlò wùt we mu mò wunù,

²⁶ biyani ghàn bime wi beka ghàn wijə njyə̀ samsu.

²⁷ Njyə̀ samsu ywolò jyə̀ mì, jûmtè mu, mu khə sinsu.

²⁸ Mu fo chyə ye yi bè mê wi ha njyə̀ mu sîn, su bu hi bè fè kputî. Wùt bu hi khɨte fye sinsu a mu wô.

²⁹ Bom we wù fo njyə̀ mu sîn ha mu chyàlò nâbi nde. Yi ni chwùtè na wùt wi hi khɨte fye a Bom a wô.

³⁰ Ghàh à Bôm mò kə ha wùt wù mòk.”

³¹ Wù jis ni ghɨt a Jûs kumti a ti hi tumle wûn atɨ̂n.

³² Jisòs buf ha ghɨna na, “Bom ti fo jyaka na mu hi nê gha kanana ha ghɨta ghɨ dô kə ni. Ghàn khɨŋa hi tumle mu chin kum yìni?”

³³ Ghɨna fîsì na, “Ghàh khɨŋa wi hi tumle wò yi gha yile atɨ̂n à gha afân. Ghàh khɨŋa hi tumle wò beka wò mò kə wût sûlè Fùyèn jîsà na, wò mò kəbi te Fùyèn.”

³⁴ Jisòs ki buf ha ghɨna na, “Ba ghɨ ti nyak a ghàn yi sâk na, ‘Ghàn mò mù yèn’?

³⁵ Yènfù ki toŋte ghɨt ghe gha Fùyènì tì bèna ha ghɨna na ‘mù yèn,’ ghàhnà khə na ghɨ wi hi kwuna yi gha Fùyènì,

³⁶ à nè fè kwuna nâ nde ma Bom ti chwok mu ha wùt à wûn, tum a mbye? Yi shìki mô ni ghàn hi fê ngane mu ha ghə na mu ti sûlì Yènfù, jîsà na mu mò Wâ wûn agha?

³⁷ Mu skìki nê wi fêt ye Bom tuma mu na mu hi nê kə ghàn bimi ha mu.

³⁸ Biyani mu shìki nê fêt yi tɨni ghàn faŋ nâbi hi bimî ha mu ghàn bimi kum gha kanana ghe mu nè shyəma ghàn yiki hi tè khə na ghàh à Bom mò wùt wù mòk hanɨ̂ŋ bu.”

³⁹ Wù jis ni ghɨt atɨna hi mômhè hi kwo wûn biyani wù tet lô.

⁴⁰ Wù lo kaha daŋ yi jin yi jwô à Jodàn a bàh afa Jon ndùku yità fo mòlû ashyə̂, faŋ kə afû.

⁴¹ Ghɨta jûmtì wûn dô kə ni jîsà na, “Nâbi te Jon tà ti chwûtì jə̂ chwe yì gha kanani yìlè, nâbi ghə te wù tì jìsa kum wut wunâ mò kə hamok.”

⁴² Ghɨ bimi ha wûn afû dô kə ni.

« Roimhe

Air adhart »

Lean sinn:

Ceanglaichean taic

Sanasan