Biblia Todo Logo
Bìoball air-loidhne

- Sanasan -

Matiyò 12 - Ŋwàklù Fùyèn Kàn Mù Fê (Cameron)


Ghɨt a Falàsî ghɨ le buf yi gha kum tuk wu laku ghɨt a Jûs
( Mâk 2.23-28 ; Lûk 6.1-5 )

1 Tuku tî yû wu tuk wu lak wule, Jisòs ghê jùmtìbàmsù wunsu hì tohne chyâ yi bat yi saŋa bota yile, jɨ̀ŋ hì yafa jùmtìbàmsù wunsu, ghɨna shìki yole tû saŋu, kutâ.

2 Ghɨt a Falàsî ghɨ le yen shìki jîs ha Jisòs na “Yen gha ye jùmtìbàm sasu nè wu tuk wu laku saki bime wi!”

3 Jisòs fîsì ha ghɨna na, “Ghàn tà taŋ yu jə gha ye Defìt tì ne te jɨ̀ŋ ndùku yafa wun nì ghɨt a wuna agha?

4 Wù lyi yen a ndâ Fùyèn nì ghɨt a wuna, lyi yə mwə̀ mù yə̂mù Fùyèn, saki chwûtè na à yə kə ngàŋsù ndâ Fùyènsu.

5 Ghàn tà taŋ yu kəbi sak yi Musìs na à mò nâbi wùni tuk wu laku ngàŋsù ndâ Fùyènsu hì mò hi ne yi fêt, hi khɨma sak ye yi kumà tuk mu we, biyani ma yi hi chwûtè wi na ghɨna ti ni bobhi gha agha?

6 Mu jìsà ha ghàn na gha fè làwû afân, chyâ gha ndâ Fùyèn yì chìk.

7 Ghàn yê hì khə gha ye luk wu ŋwàklù Fùyèn wûn jìsà ma ghàn jìsà wi na ghɨta ti ni bobhi gha teka ghɨna ni. Luk wu tɨnu jìsà na “Gha ye mu khɨŋa mò na ghàn hi kwohe seni ha ghɨta, kə ghàn hi tuhe kə nyamsu ha mu.”

8 Wâ Wùt kətalò jyaka hi jìs na ghɨ ni nâbi ghə wu tuk wu laku.”


Jisòs chwuk kpen wu wûtù te wu kpo
( Mâk 3.1-6 ; Lûk 6.6-11 )

9 Te Jisòs tì jìsa mihe ni, lo yen lye a ghɨna ndâ yì chìntena.

10 Wùt lè mô afû ma kpen wu wunu wule ti kpû. Ghɨt ale shìki khɨŋa wu lum hi tè ngane Jisòs, ki buf ha wun na, “Saki bimelò na ghɨ làhi chwuk a wùt wu tuk wu laku ma yi bime wi agha?”

11 Jisòs fîsì ha ghɨna na, “Wùt ha ghàn shìki kəta njyə̀ à wûn, yì fən a yi be wu tuk wu laku, ma wù faŋ hi fihi?

12 A wùt kokne chyâ wi njyə̀ agha? Yi ni chwùtè na saki bimelò na ghɨ ni jùŋ wu tuk wu laku.”

13 Jisòs jis ni, ki jîs ha wùt mu we na, “Nàhi kpen wa.” Wùt atɨ̂n nâhì kə wu yu, kpen wu tɨnu tâ hì mô kəbi te wule.

14 Ghɨt a Falàsî fwu kə wu yu hi bakte hì ywe Jisòs.


Jisòs mò wùt wù fètana ha Yènfù

15 Jisòs khɨli gha ye ghɨt a Falàsî ndùku bakte kum wûn lo afû. Ghɨta yen a wun yi bàm dô kə ni. Wù chwuk ghɨt ghe ghɨ ndùku yable a ghɨna fùtɨ̂n nâ à jɨ̀m,

16 chîhì ha ghɨna na kə wùt nè fôktè gha kum yi ha wùt.

17 Wù tì ni gha ye Yènfù tì jìsa tohne a fòktì Ìsayà na:

18 “Wuna mò wùt we mu chwoka na wù fet ha mu. Mu kòŋàlò wûn, wù nê mu saŋlê. Mu nè folò yohnà ma ha wûn ma wu hì fòktè sak yi mi ha tumu.

19 Wù bè hì gufnà wijə gha ghê wùt; wù bè hì bwate wi ha wùt, wùt bè hì ywo wi jyə̀ wûn wu fwəh.

20 Jaŋ bè khɨma wi wu lùk ma ni wûn, wù bè nê wi kəbi nâ gha yi be ha wùt wù yolena hi tàn wu yu afa wù bè nê ma chilichili tâ chya be.

21 Ghɨt a mbye bè hì chyə yikte kə wun wu wùn.”


Ghɨt a Falàsî hì jîsà na Jisòs fyi a jyak ha Bèlsibùl
( Mâk 3.20-30 ; Lûk 11.14-23 )

22 Ghɨt ale tî ben nì wùt ha Jisòs wu yena wi luktu, jîsà wi ma à ni a yohnà be. Jisòs chwuk wùt àtɨ̂n, wù kaha yen tu luk hì fê jîsà.

23 Nâ ghɨt à jɨ̀m ghe ghɨ ndùku mô afû hì mô nì kani buf na “Ghɨ ni jìsà na wùna mò kə nâ wâ fə̀n Defìt agha?”

24 Biyani ghɨt a Falàsî yu gha tɨni hì jîsà na, “Wù jùmà fihe yohnù mu wun ni beka Bèlsibùl fə̀n à yòhnù wu be fo jyaka ha wûn.”

25 Jisòs khɨli kwâktì ghɨna ki jîs na, “À hì mô kəbi ghɨta a yìni laki kəta a jyàhè wùna ma lak mi ye bef à mihi. À hì mô nâbi ghɨta yi tèk makə yi sah yi nda hì kəta yi bef a ghɨna fùtɨ̂n, ma tèk mi yê makə yi sah yi nda mi ye tê timî.

26 Kum ni Satàn shìki nô ngɨŋ à wûn ma fə̀n wù wunu nê timi yàni. Satàn shìki nî ni ma hi mô na wù fê kəta wi jyaka a tô mwə̀ me wù saka.

27 Mu shìki jûmà fihe yohnù be nì jyaka ma à fo Bèlsibùl, ma ghɨt ghana ghe ghɨ jûmà fihe ma hi fo nde jyaka tɨna ha ghɨna? À nè chwùtè kə ghɨt mɨ ghɨ̂n na ghàn wamalò ma, ghàn jìsà hamok agha.

28 À fo a yohnà Fùyènà jyaka na mu hi jûmà fihe yohnù be wûn. Te yi mò ni, yi chwùtè na fə̀n wù Fùyènù ti ben ha ghàn.

29 “Ghàn fê kwâktè na wùt ni mo yàni hi lye a wùt wu tâ a ndâ hi kumte fihe mwə̀ mù wûn, bu na wù yìti kwut khɨti wùt a jyak mu we agha? Wù ki nî yani, ma wù ki chwoŋa ndâ à wûn mi yê.

30 “Nâbi nde wù bu ghàh à wûn yi gha yì mòk wù ya nò mu. À hì gâmtè wi nâbi nde mu hi bakte ghɨt a Fùyènà ghàh à wûn, ma hi mô na wu sàhà yi sâh.

31 Mu jìsà ha ghàn na, Yènfù làhi lèhèfo nâbi yìni be te wùt ne, hi fè lèhèfo nâbi yìni ndi ghɨ te wûn atɨ̂n, biyani à sùli nâbi nde Yohnà Yulena, ma Yènfù bê tê lèhèfo jə̀ wûn.

32 À jis nâ nâbi nde gha be kum Wâ Wùt, Yènfù làhi lèhèfo wûn, biyani ma à jis nâbi nde gha be kum Yohnà Yulena, ma Yènfù bê tê lèhèfo wûn à mbye afân nì à mbye afa yì bè bênà.


Ghɨ yena khɨle fukâk a wu tam
( Lûk 6.43-45 )

33 Jisòs tî fi yiki na, “Wò ki jîs na kâk fù jwòfàlò wò hi kəta hi jìs na tam wu tɨnu jwòfàlò, wò ki jîs na kâk fù befalò wò hi kəta hi jìs na tam wu tɨnu befalò. Ghɨ yena khɨle kə fukâk wu tam afa fu mo.

34 Ywosu be sîn, gha jûŋì wi hi fwo a ghàn a yi jwô beka ghàn mò kə nâ ghɨt a be. Jyə̀ yì jwo mò ni jîsà kə gha ye yi mô yi təm ma yi ti lûn.

35 Wùt wù jùŋ nè jùŋ ma yì fwu kə atɨn a gha jûŋà fa wù bakte lema a wun yi təm, wùt wù be hi nê kə be ye a yì hì mô ma wù tî bakti lem a wun a yi təm.

36 “Mu jìsà ha ghàn na à bè hì mô wu tuk wu saku Fùyènù ma nâbi nde bê hi fîsè kum nâbi ghə wù ti time jisa, nâbi ghe wù ndùku kəta wi hi jìs.

37 Ghàn be yə sak kə gha afa ghàn jìsa, ma ghàn fən sak kə gha afa ghàn jìsa.


Ghɨt a Falàsî nì chichàsù saksu hì khɨŋa hi yen a chwena
( Mâk 8.11-12 ; Lûk 11.29-32 )

38 Chichàsu saksu lesu nì ghɨt a Falàsî ale jis ha Jisòs na, “Chichà, ni gha kanani yile hi chwùtì ha ghàh te chwe nì jyak gha ghe ghɨ lo kə nâ ha Yènfù.”

39 Jisòs fîsì jis na, “À mò kə ngwàk yì be te yìna yì fànà wi Yènfù a yì mò hi tè bufa chwe. Yì nè yena wi chwe yìlè bu kə yì fòktì Jonà.

40 Jonà tî chyə a yili chiki wu là a mu tuk mù tât, Wâ Wùt mò hi nè kpû hi chyə kəbi tuk mù tât a chyə̂ shyəma wù kahà loti.

41 À bè hì mô wu tuk wu saku ma ghɨta bê time a Yènfù ashyə̂, ma ghɨt a Ninifì bê hi ngane ngwàk yinâ beka ghɨna tì yu yiki Jonà kahi təm a ghɨna a ghɨna sùbe, ngwàk yina yi hì kəta wùt lè chîn wu chyâ Jonà, biyani kahe wi təm a ghɨna a sùbe.

42 À bè hì mô wu tuk wu sak wu Fùyènù, a mô wut we wù ndùku saka bâh à mbye a bàh à nchwô ma wù bê timi ma wù hi ngane ngwàk mi yîn beka wù tì lo a wun a yi lak gbi lum wu dâ, ben hi yute yikî tofani fə̀n Sòlomùn. Biyani, ngwàk yina kəta wùt chîn wu chyà Sòlomùn, yute wi yikî wuni.


( Lûk 11.24-26 )

43 “À yè mô a wu yu afa yohnà be fwo a wùt wù wùn, ghɨ yen gbi kat yi lak yi sùsi yì jɨ̀m khɨŋa wu luk hi yùtì, ghɨ ki faŋ hi yên,

44 ghɨ kaha jis kə ghɨna ngɨŋ na, ‘Mu nè kaha yênà lò kə ndâ afa mu tì fwo atɨ̂n.’ Jis yani, kaha yen yen ndâ àtɨ̂n yi yîm ma ghɨ ti fî fati yahû bakti mwə̀lû a fùtɨ̂n àtɨ̂n,

45 ghɨ kaha yen lyi ben nì yohnù be wule sàmba, wu bəma chyâ ghɨna, wu chîntì lyi wu hi chyə a wùt wuna wu wùn. Yi gan nì wùt àtɨ̂n hi bəma chyâ te wù ndùku mô ashyə̂. À mò ni te yi bè gânà ha ngwàk yina.


Jisòs fôktì ghɨt ghe nè wûn nì wana ne wuna mò
( Mâk 3.31-35 ; Lûk 8.19-21 )

46 Te Jisòs ndùku baha jîsà ha ghɨt a dona ghe ghɨ ndùku gbê a wun yi bàm, nè wûn nì wana ne wuna ben time a bɨn hì khɨŋa hi jìs ha wûn.

47 Wùt lè atɨ̂n à ghɨta afû jis ha wun na, “Nìni wâ, nì wana na mò a bɨn khɨŋa hi jìs ha wò.”

48 Jisòs buf ha ghɨna na nom mò nde, “Wana noma mô nde?”

49 Wù buf ni kaha sok yen nì jùmtìbàmsu wunsu jis na, “Nom nì wana noma mò ghɨt ghɨ̂n.

50 Nâbi nde we wù nè gha ye Bom a nyə̂ khɨŋa ma wù nê hi mô wâ nôm fê mô jâmtè mì, mô nôm.”

© Wycliffe Bible Translators, Inc.

Lean sinn:



Sanasan