Bìoball air-loidhne

Lûk 13 - Ŋwàklù Fùyèn Kàn Mù Fê (Cameron)

Ghàn kahi təm ghana a ghàn a gha be

¹ À ndùku mô kəbi a wu yu afû, ghɨt ale afû fwu ben fôktì ha Jisòs kum ghɨt a Galìlî ale te Balèt tì ywite lyi luŋ mù ghɨna chîntì nì luŋ mù sù nyam se ghɨ tì sete hi fo te yi fô.

² Jisòs buf ha ghɨna nâ, “Ghàn kwàktè na ngə̂k yîn tì kwoti ghɨt a Galìlî ghɨ̂n ni beka ghɨna ndùku mô ghɨt a be chyâ ghɨt ale ma?

³ Yi ndùku wijə yâ nâ hakoh, biyani mu jîsà ha ghàn na, ghàn ki fâŋ hi kahe təm ghana a ghàn a gha be ma ghàn à jɨ̀m bê ləha kəbi yâ.

⁴ Ghàn fê kwakti gha ye yi tì gàna ha ghɨta njwò fama. Ndâ ti ye ghɨ tì ba ghɨ toŋte na Silàm, yi dàfà kə ni tì fên ywiti ghɨna nâ à jɨ̀m. Ghàn kwàktè na ghɨna tì nilô besu chyâ ghɨt à jɨ̀m a Jèlusalèm ma?

⁵ Yi wijə yâ nâ hakoh, biyani mu jìsà ha ghàn na, ghàn ki faŋ hi kahe təm ghana a ghàn a sùbe, ma ghàn bê ləha kəbi ghàn à jɨ̀m.”

⁶ Jisòs ki mâ ngàn yîn ha ghɨna na, “Wùt lè ndùku kətalò kâk fù wùmfu a wun a fùk te wù yome, hì yênà yu mù jɨ̀m hi yen na fu ti mù tamu agha, biyani yena wi tamu atɨ̂n nâ hakoh.”

⁷ Wù ki jîs ha wùt à wûn wù fèt na, ‘Mu ti ben a sah à fùkàk afan kə yùŋ a yùŋ a wu lɨ̀m wù tât tê yena jə̀ shyə ale a tô àtɨ̂n, gbèt à màka funfu, njwô ghə te fu bobhe chyəfu halô agha?’

⁸ Wùt fètana àtɨ̂n fîsì na, ‘Bâba, dè kə funfu a lɨ̀m afân, ma mu nê chɨm à kat sah yi tɨni ma mu lem mbaŋfu a sah àtɨ̂n’.

⁹ Tamu ki mo atɨ̂n a lɨ̀m à benana ma ghɨ de funfu, biyani fu ki faŋ hi mù ma gbet à màka.

Jisòs chwuk wùt ywên wù kə̀blena a ghɨna tuk wu laku

¹⁰ À ndùku mô wu tuk wu lak wule, Jisòs lye a ndâ chìnti yìlè hì yike ghɨta.

¹¹ Wùt ywên wùlè mô afû ma yohnà be ti fo ngə̂k ha wûn a wu lɨ̀m njwò fama, wù guma faŋ hì bu hi lòtè gbì chilichili.

^12-13 Jisòs yen wûn ni toŋa wûn, wù fwu bên. Jisòs nâhì a wô kum wûn, jis na, “Wùt ywên, wò ti bonâ, bonlò.” Kə wu yu tɨnu, wù timi gbî chilichili hi bəmhe kokhe yênà nì Yènfù.

¹⁴ Biyani to ndâ chìnti ghê hì bâŋhè wu lâ beka Jisòs tì chwuk wùt a ghɨna tuk wu laku, wù ki jîs ha ghɨta na, “Tuk mâhù mù fèta mù mò tufa a ngâm, ghàn kəta hi bèn na ghɨ chwuk ghàn a mu tuk afân a bu wu tuk wu laku.”

¹⁵ Bâba fîsì na, “Fùshâŋ, ghɨt a kama ne ghɨ̂n! Nâ wùt lè làwû a ghàn a fùtɨ̂n, a wù mò hi dè nyàm à wûn hi yèntì na yì nyu mòlû a tuk wu laku agha?

¹⁶ Wùt ywên wunâ mò wùt a yi sah yi nda bè ghàhnà Ablàhâm ma Satàn ti kwut ghâŋtà wûn a wu lɨ̀m njwò fama, ma ghɨ faŋ hi yèntè wûn a tuk wu laku agha?”

¹⁷ Te wù jìsa ni, bànàsu wunsu wumî. Ghɨt a dona fwu hi saŋle kum gha kanana à jɨ̀m ghe wù ndùku nê.

Ngànsù kum fə̂n wù Fùyènù
( Mat 13.31 ; Mâk 4.30-32 )

¹⁸ Jisòs ki buf ha ghɨta na, “Fə̂n wù Fùyènù mò te ghə? Mu mò hi fə̀k à wunu nâ nì ghə?

¹⁹ Wu mô kəbi te sêlà fu ngwìk fùkàkfu lefu ghɨ toŋte na mostà, te wùt tì yome a wun a fùk, fu ləma kwôk ha fùkàk, nyɨ̀mû ben hi bâ ndasu ghɨna su a tô tu kpoŋ tu tɨntu.”

( Mat 13.33 )

²⁰ Jisòs buf kpenhi na, “Mu fè fəknà fə̀nù nì ghə?

²¹ Wu mô kəbi te fùshìk fe wùt ywên lyè lêmà a mu kwùŋ mù kwaŋ nâ hidù fu gbi kùŋ mù tɨ̂n nâ mù jɨ̀m.”

À bè lye nde wu lùk wu fə̀n wù Fùyènù
( Mat 7.13-14 , 21-23 )

²² Jisòs chyâ hì gbê yênà a Jèlusalèm tohna yi tèk yi tèk yike ghɨta.

²³ Wùt lè buf ha wun na, “Bâba, ghɨt ghe ghɨ bê bônà bè hì tobte kə ni ma?” Wù jis kə ha ghɨt à jɨ̀m na,

²⁴ “Ghàn momhi nì jyaka hi tohna yi jwô ndâ falani hi lye lùk wu fə̀n wù Fùyènù. Mu fòktè ha ghàn na ghɨt a dona bè khɨŋalò hi lye atɨ̂n, biyani ma yi tâ ghak ghɨna.”

²⁵ Yu kpene bê lò, ma bè ndâ nê lòte à fa jwo ndâ, ma ghàn timè faŋ a bɨn, ma ghàn hi kûmtè jîsà na, ‘Bâba, jìmi jwo nda ha ghàh,’ ma wù fisi ha ghàn na, ‘Mu khə wi na ghàn lô afa agha.’

²⁶ Ma ghàn ki yîmì hi tè jìs na, ‘Ghàhnà ndùku yə fê nyô amok, wo fê yike a ghàh a tù tèk.’

²⁷ Biyani ma wù fê jis na, mu jis na, mu jìsà ha ghàn hamok na mu khə wi na ghàn lò afa agha? Ghàn lô a mu jwô nda, ghàn ghɨt a be ghɨ̂n!

²⁸ Ghàn bè yenalò Ablàhâm nì Isìk nì Jakòb nì fòktìsù chiksu sù jɨ̀m wu lùk wu fə̀n wù Fùyènù ma ghàn hi luŋle jyê ma ghɨ ti fa de ghàn a bɨn.

²⁹ Ghɨta bè fwo bê a bûlà tu mbyi tù jɨ̀m ma ghɨ ndoko hi yə̂ wu lùk wu fə̀n wù Fùyènù.

³⁰ Mu jìsà na, “Ghɨt ghe ghɨ mô yi bàm chîn bè hì mô ashyə̂, ghe ghɨ mô ashyə̂ chîn, bê hì mô yi bàm.”

Jisòs hì kwohe yi sen ha ghɨt a Jèlusalèm
( Mat 23.37-39 )

³¹ Kə wu yu afû, ghɨt a Falàsî ale ben yen Jisòs jis ha wun na, “Wò kəta hi lò afân beka fə̀n Helòd khɨŋa hi ywe wò.”

³² Wù jis ha ghɨna na, “Ghàn yê fokti ha sòŋà ye na, ‘Mu jùmà fihelò yohnù be lân fê chwuka hi bè tàn yi bîs. Ma hi mô yi bàm atɨ̂n, ma mu ki mihè fêt yi mi.’”

³³ Jisòs kaha jis ha ghɨna na, “Nâbi te yi mò ni, mu kəta hi tè yèn nì fêt yì mi ashyə̂ lân nì yi bîs hi yaka shyəma mu bê tan a Jèlusalèm beka fòktì wù chìk kəta ki hi kpu kə a Jèlusalèm.”

³⁴ Wonê, ghàn ghɨt a Jèlusalèm, ghàn tì ywiti fòktìsu chiksu tumli ywiti ghɨt ghe ghɨ tì tuma ha ghàn! Mu ti mômhì a mu yu, a mu yu, hi yùŋtè ghàn te nè ngwû yè yûŋtè wana wuna, a wun a tù ghà. Biyani ghàn ti tet kə yi têt!

³⁵ China ni, Yènfù ti tum mâkà tèk yani. Mu jìsà ha ghàn na ghàn bè fè yena wijə mu, bu kə na a bè hì mô wu tuk afa ghàn jìsa na, ‘Bônì mò ha wùt we wù bênà a Bâba yi yet.’

« Roimhe

Air adhart »

Lean sinn:

Ceanglaichean taic

Sanasan