Bìoball air-loidhne

Gokhini 16 - Ŋwàklù Fùyèn Kàn Mù Fê (Cameron)

¹ Yi bàm atɨ̂n, mu yu te ghɨ jîsà nâ nì jyə̀ yì tâ atɨ̂n à wu lùk wu yulenu afâ a ndâ Fùyèn ha anjèlsu Fùyèn se sàmba na, “Ghàn yê suh à chwohi ngək se a chyə̂, à se su mô wu kaŋ afa sàmba, chwûtè wu lâ Fùyèn wu baŋanu.”

² Anjèl à Fùyèn yì shyə̂ yen suh chwohi nì shyə ghe a ghɨ ndùku mô a wun a kaŋ a chyə̂. Jì wu bəmana wule kwo ghɨt ghe a ghɨ ndùku kəta chwena nyàm yê, fê ngumle mosò fu tɨn fê.

³ Kùmtê à anjèl à Fùyèn yìlè suh chwohi nì shyə ghe a ghɨ ndùku mô a wun a kaŋ atɨ̂n à jwò yì chìk, mòlû mù tɨ̂n kahi hì mô kə te mu luŋ mù wùt wù kpona, nâbi ghə ghe ghɨ mô a jwô afû kpû.

⁴ Kùmtê à anjèl à Fùyèn suh chwohi nì shyə ghe a ghɨ ndùku mô a wun a kaŋ, atɨ̂n à jwosu tasu nì tok tu. Mòlû mù tɨ̂n kahi ha mu luŋ.

⁵ Mu yu te anjèl ye à yì ndùku kəta jyaka kum jwosu jîsà na, “Wò ti kat sak kə chilichili. A mò wò we a wò ndùku mô, ma wò hì mô. A mô kə wò we a wò mò nì yulînì.

⁶ Ghɨta ti ywiti ghɨt gha, ywiti fòktì su chiksu, wò ti fo luŋû chîn na ghɨna nyu. Wò lak kə nâ ghɨna nì shyə ghe a ghɨ kpene ha ghɨna!”

⁷ Mu fî yu te jyə̀ fwo bênà lumu a bàh a baŋ yi fo jîsà na, “Bâba Yènfù, Bè jyak à jɨ̀m. Wò saka kə hamok, fê saka kə nâ chilichili!”

⁸ Yi bàm atɨ̂n, mu yen anjèl à Fùyèn yìlè na à hi mô anjèlsu Fùyèn sù kìk, yì suh chwohi shyə ghe a ghɨ ndùku mô a wun a tû a kaŋ, yuchwî khɨti a jyak nyôklì à ghɨ̂t kə te wu wus.

⁹ Lûm yi tɨni nyôklì ghɨna nâ haŋaŋ, ghɨna hì sûlè Fùyèn fe fu kəta jyaka hi fo ngə̂k mu sîn, biyani ghɨna tê kahi jə təm a ghɨna a sùbe hi tè kokhe Fùyèn.

¹⁰ Anjèl à Fùyèn yìlè fî fwu na à hi mô anjèlsu Fùyèn sù tân, suh chwohi shyə ghe a ghɨ ndùku mô a wun a kaŋ, a tô kpòk wu tu fə̀nù nyàm yê, Luk we a wù ndùku saka atɨ̂n fin kə wù jɨ̀m, ghɨt ghe a ghɨ ndùku mô afû hì lumle chwûtù ghɨna tu kum lùmchuŋ ye a ghɨna ndùku ywo.

¹¹ Ghɨna hì sûlè Fùyèn fe a fu mô a nyə̂ beka lùmchuŋ yê, nì jì we a wu mô a ghɨna wu wùn biyani ghɨna faŋ hi kahe təm a ghɨna a ghɨna sùbe.

¹² Anjèl à Fùyèn yìlè fwu na à hi mô anjèlsu Fùyènsu tufa suh chwohi shyə ghe a ghɨ mô a wun a kaŋ a jwô yì tâ yìlè, ghɨ toŋte na Yufelèt. Jwò àtɨ̂n yim nâ yì jɨ̀m hi fo wu lum ha fə̂n tê a tu fwo bênà a bàh afa yuchwî sata atɨ̂n na tu daŋ.

¹³ Mu fî yen yohnù wu be wule wù tât, wu mô te wù chàmàkhɨ̀s. Ale hì fwo bê a ywò yi jwô, ale fê fwo bê a nyàm ye yi jwô, ale fwo kəbi a fòktì yì fəm ye yi jwô.

¹⁴ Yohnù wûn mô deblìsu te su gbê chwûtè chwesu kanasu. Yohnù tɨnu gbî yen nâ ha fə̂n tù jɨ̀m a mbyî, ghɨ yûŋtì ghɨna wu lùk wù mòk na ghɨna hi bakte hi bè nò Yènfù a tuk wu chiku, Bè jyak wù jɨ̀m.

¹⁵ Mu yu te wùt jìsà na, “Ghàn yuti! Mu bê ni te wut wù chwoŋana. Saŋlînì mò ha wùt we a wù ndòko hì gbùtè, nì njusu a wun wu wùn, kə wù nè fwo nì sah yi yimi nì wumînì a ghɨta ashyə̂.”

¹⁶ Yohnù wu be we yûŋtì fə̂n mu tɨ̂n wu lùk wule, ghɨ toŋte jìs yi Hibùlùs na Àmagedòn.

¹⁷ Anjèl à Fùyèn yìlè fwu na à hi mô sù anjèl sàmba waŋ a shyə ghe a ghɨ ndùku mô a wun a kaŋ a nyə̂. Jyə̀ yì tâ yìlè fwu ben a kpòk wu tu fə̀nù a ndâ Fùyèn jis na, “Nâbi ghə ti mî!”

¹⁸ Wuli hì mwâmtè, fê bwatê wu lùk afû, jyesu fwu ben afû. Luktu hì senâ a lum wule teka wu timè hi senâ nâ te Yènfù tì fate wùt. Seni yi tu lùk yìna hì bəma nâ haŋaŋ.

¹⁹ Ghɨ jyâtì Babilòn bâh wù tât, bobhi tèk tu chik tu nâ tù jɨ̀m kə tu lak tù jɨ̀m. A ni lum we a Yènfù tì kwàkte ghɨt a Babilòn atɨ̂n, ni ghɨna nyu shyə ghe a ghɨ ndùku chwûtè lâ baŋanu wunu a bòm afâ.

²⁰ Lak tê a jwosu ndùku mô ma su ti jɨŋ kat samî, kunsu boŋ samî kə sù jɨ̀m.

²¹ Temù hì chemle chwo a ghɨta a tû, se yì mòk jîtà bəma kə ni. Ghɨta hì sûlè Fùyèn kum ngək mi yìna beka à ndùku mô nâ ngək yì bəmana.

« Roimhe

Air adhart »

Lean sinn:

Ceanglaichean taic

Sanasan