Bìoball air-loidhne

Gàlesiyà 6 - Ŋwàklù Fùyèn Kàn Mù Fê (Cameron)

Ghàn hi gâmtè bêkà ngəksu wana ne ghana

¹ Wana noma, wùt ha ghàn ki nî nâbi yìni gha be, ghàn ale ghe a Yohnà Yulena tihe, ghàn mômhì hi chwùtè lumu ha wûn kə nâ nì yutìnì. Ghàn shihi chwùtì, ghàn hi tôknè nì ngɨŋ sanisu bu ya, ma nâ ghàn boŋà fen.

² Ghàn hi gâmtè bêkà ngəksu wana ne ghana. Ghàn shìki tê nì ni, ma ghàn hi lunhe sak yi Klistù.

³ À shìki kwâktè nâbi nde na yi mò a shyə, biyani bu, ma wù hi lehe kə ngɨŋ à wûn.

⁴ Nâbi nde fatè ki chyənà à wûn yì ngɨŋ. Yì shìki jwôf, ma wù hi jala nâ a wun a ngɨŋ, a bu kum te wù fə̀knè ghê wùt,

⁵ beka nâbi nde kəta kə hi tè nè bâh a wuna yi fètà.

⁶ Wùt we a ghɨ yike wun nì chyənà yi bimena kəta hi tè jyatè fo chichàsu wunsu nì mwə̀ mù jùŋ me a wù kəta, nâ mù jɨ̀m.

⁷ Kə wùt nè lehe ngɨŋ à wûn. Wùt wi hi nyìkhè Fùyèn. Wùt yome nâbi ghə, ma wù bê kpê kə ghɨna.

⁸ Wùt ki yome kə shyə ghe a ghɨ foma a njyàsu wunsu wùnsu, ma wù bê kpê kə ghɨna, a mô yi kpu. Wùt ki yome shyə ghe a Yohnà khɨŋa, ma Yohnà bê ni, ma wù kpê kə ghɨna, a mô chyə ye a yì bè mê wi.

⁹ Kə ghàhnà bot hi nè jùŋ, beka ghàhnà ki faŋ hi bôt, ma tuku bê kpen, ma ghàhnà kpi.

¹⁰ Yi ni chwùtè na ghàhnà shìki kəta wu lum nâbi yini hi nè jùŋ, ghàhnà hì mômhè nê kə ha ghɨt à jɨ̀m, fê nê nâ hanɨ̂ŋ ha ghɨt ghe a ghàhnà ghɨna kəta bimî yì mòk.

Bôl kɨn ha ghɨta

¹¹ Ghàn yen a se a ŋwàklù a chika ghe a mu nyaka a ŋwàklù afân ha ghàn kə nâ nì wo ma.

¹² Ghɨt ghe a ghɨ chinte ghàn na ghɨ se nam wanu mò ghê a ghɨ khɨŋa hi tè chwùtì wunu a gha a njyàsu wùnsu. Ghɨna nè gha mi yîn beka ghɨna fànà na ghɨna shìki yikî na ghɨta bimi kum kpu yi Klistù a kàkfùtàfù, ma ghɨ nê chwok wulu ghɨna.

¹³ Nâbi ghɨt mu ghe a ghɨ se nam wu ghɨna lèmà nâbi wi Saki, biyani khɨŋa kə na ghɨ se nam wanu shyəma ghɨna hi gbê kûnà dòk, jîsà na ghàn ti ni gha ye a ghɨna yê hì khɨŋa.

¹⁴ Biyani ha mu, mu kùn à wi dòk kum gha yile, a bu kə kâkfùtàfù Bâba ghàhnà Jisòs Klistù. A mô à ghɨ̂n ghe a ghɨ ne, mwə̀ mù mbyî hì mô kə ha mu te mwə̀ mù kputemù, nâbi mu mô kə te shyə a kpona ha mwə̀ mù mbyî.

¹⁵ Makə ghɨ ti se nam wanu makə ghɨ tà se jə̂, yìna kəta wijə gha yile hi nì. Gha yi ta ni mò kə na, Yènfù ni, ma wò kahà hi mô wut wù fê.

¹⁶ Yutì Fùyènì nì kwohi seni hi mô ha ghɨt ghe a ghɨ chyə ni te mu jìsa, fê mô ha ghɨt à Fùyènà à jɨ̀m.

¹⁷ Hi mihì, mu wu hì jîsà na, kə wùt nè fê fo ngə̂k ha mu kum lat wuna a mu wu wùn chwùtè fêt yi mi ha Jisòs.

¹⁸ Bâba ghàhnà Jisòs Klistù chwuti təm a jûŋà wuna ha ghàn a wana noma. Àmèn.

« Roimhe

Air adhart »

Lean sinn:

Ceanglaichean taic

Sanasan