Bìoball air-loidhne

Gàlesiyà 3 - Ŋwàklù Fùyèn Kàn Mù Fê (Cameron)

À tàmtè ghə wò hi khɨte yi bôn

¹ Ngwònu ghɨt a Gàlesiyà wûn! Ghɨ loklô ghàn ma? Ba ghɨ tî chwûtì mihì kə nâ te ghɨ tì bante Jisòs Klistù a kàkfùtàfù ha ghàn?

² Ghàn fòkti gha ha mu. Ghàn fokti ha mu nâ, ghàn tì khɨti Yohnà Fùyènà beka ghàn lèmà Saki ma, ma ghàn tì khɨti beka ghàn ywo tum yì jùŋ bimilò ma?

³ Ghàn ngwò ghə ni? Ghàn yìmi hì chyə̂ beka Yohnà Fùyènà, ghàn khɨŋa hi chyə mihì a ghàn a jyak a ngɨŋa njwô ghə?

⁴ Yi ni chwùtè na ghàn chehì yena ngə̂k nâ haŋaŋ ni kə halô ma? Ghàn wijə hi tè yena kə ngə̂k ni halô.

⁵ Yènfù tî fo Yohnà wuna ha ghàn fî nî a gha a kanana a ghàn a fùtɨ̂n njwo ghàn lèmà Saki ma, ma njwo ghàn ywo tum yì jùŋ ghɨ bimilò agha?

⁶ Ghàn yen lê Ablàhâm! Wù tî bimî ha Yènfù, fu lyi wûn ha wùt à chilichili.

⁷ Ba ghàn ti yen chîn na wana Ablàhâm mò ghɨt ghe a ghɨ bime Yènfù?

⁸ Ŋwàklù Fùyèn hì mô ma yì ti fôktì na Yènfù bè nê ma tumu hi mô ghɨt a chilichili beka yi bimî yi ghɨna. A yi bàm atɨ̂n Yènfù ki fôktì tum yì jùŋ ashyə̂ ha Ablàhâm na, fu bè bònhèlò ghɨta tu lak tù jɨ̀m kum wûn.

⁹ Yi chwûtè na nâbi nde we a wù bime kətalò bônì kəbi yi ghəl te Yènfù tì bònhe Ablàhâm kum yi bimî yi wuni.

¹⁰ Ghɨt ghe a ghɨ yikte ha Saki kəta ndi Fùyèn njwo ghɨ ti nyak a ŋwàklù Fùyèn na, “Ndi Fùyèn mò nâbi ha nde we a wù lèmà sak tê a tu mô a ŋwàklù yì Sak dâŋà yile.”

¹¹ Yi ti fwu kə a ndan chin na wùt wijə hi tè mò chilichili a Yènfù ashyə̂ kə njwo wù lèmà Saki, njwo ghɨ ti nyak kəbi a ŋwàklù Fùyèn na, “Ghɨt ghe a ghɨ mô chilichili kum yi bimî yi ghɨna bè khɨte lò chyə ye a yi bè mê wi.”

¹² Saki kəta wijə gha kum yi bimî. Ghɨ ti bɨlà nyak na, nâbi nde we a wù nè te Saki khɨŋa bè hì chyə kə kum yini.

¹³ Klistù tî yun tu ghàhnà a ndi afa Saki tì bèna nì yini a wu lum na wù tì fyî ndi àtɨ̂n a ghàhnà wu lùk njwo ghɨ ti nyak na, “Ndi Fùyèn mò nâbi ha nde we a ghɨ banti wûn a fukàk.”

¹⁴ Klistù Jisòs tî nî na bôn ye a Yènfù tì chwùne ha Ablàhâm na yi boŋà yen ha tumu. Wù tì ni ni shyəma bimî yi ghàhnà ni ma ghàhnà boŋa khɨti Yohnà Yulena mu ghe a ghɨ tì chwùne.

Saki yi Musìs kəta wijə jyaka hi kwuna chwunu Fùyènù

¹⁵ Wana noma, mu fo chwena yi gha ha ghàn, yi gânà kə tuk mù jɨ̀m. Ghɨt à bà ki bime yi gha ki yə mu kân, wùt wi hi fè chwôk, makə hi kpenhe yi gha atɨ̂n.

¹⁶ Yènfù tî fo chwunu ha Ablàhâm ghê wâ wûn. Ŋwàklù Fùyèn tà jis jə na ghɨ tì fo ha ghê wana hidù. Ghɨ toŋti kə wan wù mòk, wan mu wùna mô Klistù.

¹⁷ Mu ni jìsà hi fwu na, Yènfù tî yə̂ kànû chwûnà yi gha ashyə̂, fu bu hi bè faŋ hi nì. Ghɨ tì fate Saki a yi bàm, ma lɨ̂m mù ti chya yi ghə yì kìk nì lɨ̂m mtât te ghɨ yə kànû, ma Sak yi tɨni wi hi fè kwuna mu kân mù tɨ̂n hi tunhe chwùna wûn.

¹⁸ Yènfù shìki fo yi fo yi wuni ha ghɨta beka ghɨ lêmà Saki, ma fo tɨni hi fê bê wi ha wùt kum wu chwùna. Fu tì fo yi fo mi ye ha Ablàhâm kum wu chwunu we a fu tì ne.

¹⁹ Saki ni hì fêtà nâ ghə? Ghɨ fo Saki hi kpenhe a tô wu chwùna shyəma wùt hi fena wu hi khə na yi ti ni be. Saki kəta hi tè mò kə yi mô hi tàn shyəma wâ Ablàhâm we a Yènfù tì fo chwunu wûn kum wûn ben. Ghɨ tì tum anjèlsu Fùyènsu nì sak yi tɨni ha Musìs na wù chyàhi ha ghɨta.

²⁰ Wùt wijə hi tè mò a ghɨta fùtɨ̂n, chyâhè yi chyâhì gha, a bu na ghɨt atɨna mò à bà. Biyani Yènfù tà tì tohne jə a wùt hi fo chwunu wunu ha Ablàhâm.

Gha ye Saki fètà

²¹ Yi ni chwùtè na Saki tunhe chwunu te Yènfù tì chwune ma? Yi wijə yâ nâ hakoh. À shìki mô ma Yènfù tì fo sak yile shyəma yi ni na ghɨta hi chyə̂, ma sak yi tɨni hi mô hi nì kə nâ na ghɨta hi mô chilichili a Yènfù ashyə̂.

²² Biyani ŋwàklù Fùyèn jis na nâ ghɨt à jɨ̀m a mbyî fètà a kwôs ha be. Yi gan ni shyəma Yènfù fo chwuna we a fu tì chwùna ha ghɨt ghe a ghɨ bime ha Jisòs Klistù.

²³ À ndùku mô ashyə̂ shyəma bimînì hi mô, ghàhnà ghɨt a Jûs gbê kə yi dèt yi Sâk te ghɨt a ndâ chyâk, hi tàn shyəma Yènfù bè chwùtê banhi bimî mi yîn.

²⁴ Saki tòknà kə yi tôknà nì ghàhnà hi tàn shyəma Klistù bê ben hi nì na ghàhnà hi mô chilichili kum yi bimî.

²⁵ Chîn te ghàhnà hì kəta bimînì, Saki fè tôknà wijə nì ghàhnà.

²⁶ Ghàn à jɨ̀m mò wana Fùyènà beka ghàn ti bime ha Klistù Jisòs.

²⁷ Nâ ghàn à jɨ̀m te ghàn tì fye mòlû ghàn chîntì ghàn à Klistù hì mô ma ghàn ti lyi chyəna wuna.

²⁸ Hanɨ̂ŋ fè wijə ha wùt à Jûs ghê wùt à Gɨlìs. Hanɨ̂ŋ bu ha wùt we a wù mò a wun a ngɨŋ ghê wùt we a wù mò a kwôs, bu ha wùt wù lɨmà ghê wùt wù ywên beka ghàn à jɨ̀m hì chîntè mô kə a shyə̀ à mòk ghàn à Klistù Jisòs.

²⁹ Ghàn shìki mô ghɨt a Klistù ni, ma ghàn hi mô wana ha Ablàhâm ma ghàn bê khɨti shyə ghe a Yènfù tì chwùne ha wun.

« Roimhe

Air adhart »

Lean sinn:

Ceanglaichean taic

Sanasan