Bìoball air-loidhne

Fìlibiyàns 1 - Ŋwàklù Fùyèn Kàn Mù Fê (Cameron)

¹ À nyak mu Bôl ghàh à Timotì ŋwàklù yìna mô ghɨt a fetana ha Jisòs Klistù. Ghàh ni nyàkà ha ghàn ghe a ghàn fo ngɨŋ sanisu ha Yènfù a Fìlibây nâ à jɨ̀m hì mô ha Klistù Jisòs. Ghàh ni nyàkà kəbi ha ghàn ghɨt a tihena nì ghɨt a fetana.

² Yènfù Bè ghàhnà ghê Bâba Jisòs Klistù chwuti təm a jûŋà ha ghàn, ma wù fo yutìnì ha ghàn.

Bôl jə̂m ha ghɨt a bimena a Fìlibây

³ Mu fo àyòŋnà ha Yèn famfu nâbi wùni yu te mu kwàktè ghàn,

⁴ jə̂mà na Yènfù gàmti ghàn nâ à jɨ̀m nâbi wùni yu, mu hì jə̂mà nì saŋlînì.

⁵ Mu fo àyòŋnà ni beka ghàn ti gâmtì mu hi fòktè tum yì jùŋ yina kə ha yìmì wu tuk afa nâ ghàn tì ywo tum mi yìna atɨ̂n hi kwok à tàn lân.

⁶ Mu fê fo àyòŋnà ni beka mu khə hamok na fêt yi jûŋ yin a Yènfù yìme a ghàn a fùtɨ̂n ni na yi hi yê kə ashyə̂ hi tàn wu tuk afa a Klistù Jisòs bè kaha bênà.

⁷ Mu nè hì kwâktè kə ni kum ghàn à jɨ̀m beka mu kòŋà ghàn hanɨ̂ŋ. Yènfù ti bimî, ma ghàhnà nê hi fêtà kə amok, makə mu mò a ndâ chyâk, makə fòktè tum yì jùŋ, yike ghɨta na ghɨ hi khə na yì mò hamok.

⁸ Yènfù khəlò na mu kòŋàlò ghàn à jɨ̀m nâ a jûŋ nì kôŋ ye a Klistù Jisòs tì chwùtè nâ nì ngɨŋ à wûn.

⁹ Mu jə̂mà na Yènfù ni ghàn fê tokâ khɨli gha ye a yi mô hamok ma ghàn hi kôŋà ngɨŋ sanisu nâ a jûŋ.

¹⁰ Mu jə̂mà ni shyəma ghàn hi khə gha ye a yi jwôfà kpene a yi bè hì mô nì yulînì, kəta wi njahi, wùt ngane wi ghàn yi gha wu tuk afa a Klistù bè kaha bênà.

¹¹ Ghàn shìki mô ni ma Jisòs Klistù ni ma ghàn hi chyə chyəna chilichili, shyəma ghɨta hi yena ghàn fo kokhînì ha Yènfù, fê bəmhe wûn.

Wùt mò hi tè fate chyə̂ kə wu yu afa wù fètà ha Klistù

¹² Wana ne, mu khɨŋa na ghàn hi khə na gha ghɨ̂n a ghɨ gânà ha mu ni bɨlà gâmtè kə hi nì na tum yì jùŋ yì Fùyèn hi yênà kə ashyə̂.

¹³ Nâ sojà se a su chînà tok sù jɨ̀m, nì ghɨta afân nâ à jɨ̀m hì khəlò na mu mò a ndâ chyâk beka mu fètà ha Klistù.

¹⁴ Ndâ chyâk yin a mu mò atɨ̂n ti nî na ghɨt a bimena fê tokâ fo təm a ghɨna ha Bâba kum gha ye a ghɨna yena te wù ne ha mu. Ghɨna ghɨ hì fôktè tum à Fùyèn chîn nì təm a ta, fê fânà wi wùt lè.

¹⁵ Ghɨt ale fòktè tum yì jùŋ yì Klistù kum ghə̀k te ghɨna yena te fêt yi mi fate yênà, biyani ghɨ le fôktè tum yîn kə nâ nì təm a jûŋà.

¹⁶ Ghɨt mɨ ghɨ̂n a ghɨ fôktè nì təm a jûŋà ni fòktè beka ghɨna kòŋà mu, khə na ghɨ fa mu a ndâ chyâk beka mu fòktè tum yì jûŋ yì Fùyèn.

¹⁷ Ghɨt ghe a ghɨ fôktè gha Klistù, kəta kwâktì yi be kwàktè kə ngɨŋsu ghɨna su. Ghɨna khɨŋa hi kpenhe ngə̂k à mì a ndâ chyâk afân.

¹⁸ Biyani ngə̂k wi! Ma wùt fòktè tum à Klistù kama nê nâbi yi nî, makə wù nè hamok, mu saŋlelò beka tum yì jùŋ yì Klistù ləma yênà kə ashyə̂.

¹⁹ Mu saŋlelò beka mu khə na jə̂m yani gàmtèlò mu, Yohnà a Jisòs Klistù boŋa gâmtè na mu bon ma mu fwu a ndâ a chyàk afân.

²⁰ Nâ gha yi chik ye a mu kwâktè mò kə na kə mu bè nê gha yi wumeni. Mu khɨŋa hi tè nè fêt yi Klistù nì təm a ta kə te mu chehì nê, khɨŋa na chyəna ma hi bênà kə nì kokhînì ha wûn, kə mu kpulô, makə mu faŋ hi tè chyə̂.

²¹ A mô ha mu, mu chyə kə kum Klistù, ma mu ki kpû, ma à hi bɨlà mô mbì.

²² Yi ki kpên na mu faŋ à hi chyə̂ a chyak a wùna afân, ma mu kwoti lumu hi tòkà nè fêt yi jûŋì. Ma mu tê fè khɨlî na à jwôfà yìni ha mu agha, hi kpû ma hi tè chyə̂ agha.

²³ Mu yɨŋna kə yi yɨŋnâ atɨ̂n à agha afân, kôŋà hi dè chyə ghɨ̂n hi yèn hi tè mò ghàh à Klistù, a mô gha ye a yi jwôfà kpene,

²⁴ biyani yena na a mò nâ gha yi ta na mu faŋ à hi chyə̂ kum kə te mu khɨŋa hi gàmtè ghàn.

²⁵ A ni gha ye a yi ne mu na mu faŋ ghàhnà ghɨ̂n shyəma mu gamti na ghàn ləma ma ghàn hi saŋlê a ghàn yi bimî.

²⁶ Mu nê ni shyəma mu nê shihi kaha bèn ha ghàn, ma ghàn hi fê tòkà jala kum gha ye a Klistù Jisòs ne ha mu tohne ha ghàn.

²⁷ Gha yi ta mò kə na, ghàn hi chyə te tum yì jùŋ yì Klistù khɨŋa shyəma mu ki bên hi yena ghàn, makə mu faŋ nâbi hi bèn, ma mu hi khə na ghàn tà kwuna jə hi tè kəta kwâktì yì mòk, chyə kə ha shyə̀ à mòk, fêtà nâ nì jyaka hi tè ləma a yi bimî ye a tum yì jùŋ yike.

²⁸ Kə ghàn hi fânà bànà sanisu. Ghàn hi kəta təm a ta. Ghàn shìki nî ni, ma ghàn chwùti ha ghɨna na Yènfù nè bobhelò ghɨna ma wù bonhi ghàn. A mô yi fet yi Fùyènì.

²⁹ Mu jìsà ni beka Yènfù ti chwûtì təm a jûŋà ha ghàn ni na ghàn bimi Klistù ma ghàn fê yen ngə̂k kum wûn.

³⁰ Ghàn hi nô kə yi nô. Ghàn khə na nô yina mò ye a ghàn tì ywo na mu nòlò, chin wu hì mô mu baha nô kə yi nô.

« Roimhe

Air adhart »

Lean sinn:

Ceanglaichean taic

Sanasan