Bìoball air-loidhne

Filemùn 1 - Ŋwàklù Fùyèn Kàn Mù Fê (Cameron)

Toŋtînì

¹ À nyàkà mu Bôl ŋwàklù yina ha wò a Filemùn. Mu mô a ndâ chyâk beka mu fòktè tum yì jùŋ kum Klistù Jisòs. Wâ nè ghàhnà Timotì jis na mu toŋti ha wò. Wù mò sun wâhù, fêtà ha Klistù kəbi te ghàh.

² Toŋti ha Àfìyà te wù mò ha ghàhnà te jâmtù, ma wò toŋti ha Àkibùs te wù fòktè tum yì jùŋ nâ nì jyaka kəbi te ghàhnà. Ghàh chinhe kəbi yi toŋtî ha nôn a ghɨt a bimena ghe a ghɨ chîntè a wò ndâ.

³ Yènfù, Bì ha ghàhnà ghê Bâba Jisòs Klistù chwuti təm a jûŋà ha ghàn, ma wù fo yutìnì ha ghàn.

Bôl fo àyòŋnà ha Yènfù kum Filemùn

⁴ Filemùn, mu shihi jə̀m nâbi wùni yu mu hi toŋte yet ya, fo àyòŋnà ha Yèn fe a mu kokhe.

⁵ Mu nè ni beka te mu ti yû lum we a wò bime ha Bâba ghàhnà Jisòs, hì fê kôŋà ghɨt a Fùyènà nâ à jɨ̀m.

⁶ Mu jə̀mà na chîntì ye a wò kəta ghàn à ghɨt a bimena hi ləma kwokâ beka wò khəlò mwə̀ mu jùŋ me a Yènfù fo ha ghàhnà. Gha tɨni gànà ni shyəma ghɨta hi fo kokhînì ha Klistù.

⁷ Wâ nôm, kôŋ ye a wò kəta ha ghɨt a Fùyènà nì lum we a wò nè ghɨna saŋlê, ti ni mu tê hì saŋlê kə ni, beka wò ti ni na ghɨt a Fùyènà à jɨ̀m mô kə nâ a jûŋ.

Bôl chyati na Filemùn kahà lyi Ònesimùs

⁸ Te wò hì kôŋà ghɨt a Fùyènà ni, mu kəta wi hi tè fàn te wut wù tum à Klistù Jisòs, hi jìs na wò ni gha ye a wò kəta hi nì.

⁹ Mu bɨlà chyate wò beka mu khəlò na wò kòŋàlò ghɨt a Fùyènà. Mu jìsà na wò ni gha yîn chin ni, mô wut wù ləmâ fê mô a ndâ a chyâk beka mu fètà ha Klistù Jisòs.

¹⁰ Mu chyate na wò gamti Ònesimùs te wù hì mô ha mu te wâ mù. Mu chehì mô a ndâ chyâk, wu bênà mu gâmtè wûn, hì mô te bì ha wun a yi bimî.

¹¹ À ndùku mô ashyə̂, wu mô kə nâ shyə a makana ha wò, biyani chin hì mô, wu mô kə nâ wut hi tè gàmtè ghàh à wò.

¹² Mu kaha chinhe wun ha wò chin ni, kòŋ wûn nâ nì təm à jɨ̀m.

¹³ Te mu hì mô a ndâ chyâk ni beka mu fòktè tum yì jùŋ, mu yê làhi kòŋ hi lèm na wù faŋ à kə afân shyəma wù lyi luk wa hi tè gàmtè mu.

¹⁴ Biyani kôŋà wi hi nè gha tɨni a bu kə na wò ti bimî, shyəma yi hi chwûtè na nâbi jùŋ yì ghə te wò nè ha mu wò nè te wò kòŋà, a bu na mu khɨti wò yi khɨtî.

¹⁵ Yi làhi tè mò na, Ònesimùs bukhi ngɨŋ à wûn a fu yulà shyəma wù bê shihi kaha bèn ha wò, ma wù bê kə hamok.

¹⁶ Hi yìmì chîn, wù nè hì fê wijə ha wò kə te a kwôs, wù nè hì mô ha wò te wâ nâ wù jùŋ beka ghàn à wûn kəta yi bimî yì mòk. Mu kôŋà wûn, biyani wò kəta hi tè kòŋà wûn chyâ te mu kòŋà. Wò hi kôŋà wûn te a kwôs gha, fê kôŋà wûn te wut we a wù bime ha Bâba hì mô wâ nì wâ.

¹⁷ Wò hì khə na ghàh à wò nè kə nâ yi fêt yì mòk, wo fyi Ònesimùs kəbi te wò ndùku mô hi fye mu.

¹⁸ Wù hì mô ma wù ti ni nâbi yìni gha yi be ha wò, makə wù kəta wu ka hi làk ha wò, wo fôktì ma mu lak.

¹⁹ À nyàk kə nâ mu nì wo a ma ha wò ni na, “Mu Bôl nè lâkàlò nâbi ghə ha wò te Ònesimùs kəta hi làk.” Wò khə na nâ wò kətalò kəbi gha hi nì ha mu te mu che ne wò wu hì mô wut wù bimena.

²⁰ Wâ nôm, nì gha yina a mu jìsà ni ha wò. Nê, ma mu hi saŋlê, beka wò khəlò na ghàh à wò fètà kə ha Bâba Jisòs Klistù à jɨ̀m.

²¹ Mu khəlò kə nâ ni na, te mu chinhe ŋwàklù yina ha wò ni, na wò nè nê kə nâ te mu jìsà, wò shihi nì, wo ni chya nâ te mu khɨŋa.

²² Hi kpenhi, mu chyate na wò fati luk wu chyənu a wò ndâ ha mu beka mu kəta kə nâ kwâktìnì na, Yènfù nè ywolò jə̂m ya ma wù ni ma ghɨ fihi mu a chyâk shyəma mu fê bê yen ghàn.

Ghɨt a bimena chinhi toŋtînì ha Filemùn

²³ Èbafàlàs jis na mu toŋti ha wò. Wù mò a ndâ chyâk ghàh à wûn beka wù fòktè tum yì jùŋ kum Klistù Jisòs.

²⁴ Ghɨt ghɨ̂n chinhe kəbi yi toŋtî ha wò. A mô Mâk nì Àlìstakùs nì Demàs nì Lûk. Ghɨna gàmtè mu, fôktè tum yì jùŋ.

²⁵ Bâba Jisòs Klistù chwuti təm a jûŋà wuna ha ghàn.

« Roimhe

Air adhart »

Lean sinn:

Ceanglaichean taic

Sanasan