Bìoball air-loidhne

Fêt 5 - Ŋwàklù Fùyèn Kàn Mù Fê (Cameron)

Ànàniyàs ghê Sàfeliyà wam yi fə̂m

¹ Wùt lè ndùku mô yet yi wuni mô Ànàniyàs, yet yi ywê wuni mô Sàfeliyà. Tuk lefu ghɨna bəkli luku ghɨna fu chyə wule,

² ghɨna fati hi nyama fàf à lèm bəha ka ale hi yèn nì bəha ha ghɨt a Jisòs ghɨ tuma.

³ Ànàniyàs yen fo bəha ka mi ghê ni, Bità buf na, “Wò de na Satàn lye a wo yi təm kum ghə, hi nì na wò wam fəmi ha Yohnà Yulena ma wò let bəha ka ghe wò ye bəkle luk wa wu fu chyə we atɨ̂n agha?

⁴ À ye hì kəta wi wò luk wûn shyəma wò bəkle, te ghɨ ye bəkle, à ka tɨnu yê baha kəta wi nâbi wò. Njwô ghə te wò ye kwâktè hi nè nki gha yîn? Wò tà fə̂m yîn wam ha ghɨta, wò wam kə nâ ha Yènfù.”

⁵ Te Ànàniyàs ywo gha yîn ni kə wu yu, fen a chyə̂ kpulò. Fânì bəmani kwo ghɨt à jɨ̀m ghe ghɨ tì ywo gha mi yîn.

⁶ Mwəlà mù kpuŋ lôtì lyi gun yi Ànàniyàs lim nì gûmà fwu yen gûmàlò.

⁷ Ghɨ motì kə ni te bɨŋlu sù tât ywe Ànàniyàs boŋ lyi bên khə wi gha ye yi gana ha lɨm à wûn.

⁸ Bità jis ha wun na, “Fòkti ha mu na wuna mò ka we wù jɨ̀m a ghàn à lɨm wâ che bəkle luk wu fu chyə we atɨ̂n agha?” Wùt ywen àtɨ̂n bimî jis na, “À mò kə nâ ka tɨnu wù jɨ̀m.”

⁹ Bità ki buf ha wun na, “Njwô ghə te ghàn à lɨm wâ che fate hi mòmhe Yohnà Bâba? Ghɨt ghe ghɨ ye beka lɨm wâ yen gûmàlò baha mô kə yi jwô ndâ chîn mô hi boŋa fwo yè gùmà wò kəbi yâ.”

¹⁰ Te wù jìsa ni, Sàfeliyà boti fen a wun a shyə̂ kpulò. Mwəlà mu kpuŋ mê lyi ben yen ma wù ti kpû bêkà fwu nì wun yen gûmà a lɨm à wûn à ngwùŋ.

¹¹ Fânì chiki kwo ghɨt a bimena nâ à jɨ̀m nì ghɨt ale ghe ghɨ tì ywo gha tɨni.

Ghɨt a tuma nî gha kanana ghɨ dô kə ni

¹² Ghɨt a tuma Jisòs hì nê chwesu gha kanasu dô a ghɨta fùtɨ̂n hi chwùtè jyaka Fùyènà. Nâ ghɨta bimena à jɨ̀m hì nyâŋhè yûŋtè a Sòlomùn a jèm.

¹³ Wùt hì bu wùt wù bimena, hì chîntè wi ghê ghɨna, biyani ke ghɨna, ghɨna kokne kə ni.

¹⁴ Lɨmànà nì ywên ghe ghɨna bime ha Bâba hì dô kpenhe bê kə yi bên a nòn afû.

¹⁵ Ghɨta yen gha kanana mɨ ghɨ̂n hì bêkà bênà nì ghɨt a ghɨna ghɨ yablena a mu khɨ̀ nì a mu ghàm, fwo lêmà a bìtu lumtu shyəma Bità nê shihi chyà nâbi lɨ̂ŋhà wuna kum ghɨt atɨ̂na.

¹⁶ Ghɨt a dona fwu a tu tèk afa tu ndùku mô bakhe bê a Jèlusalèm hì bêkà bênà nì ghɨt a ghɨna ghɨ yablena nì ghe yohnù be ndùku fo ngək ha ghɨna, ghɨ chwuk ghɨna nâ à jɨ̀m.

Ghɨ fo ngə̂k ha ghɨt a tuma Jisòs

¹⁷ Ngàŋ à ndâ Fùyèn yì ngaŋtena nì ghɨt a wuna à jɨ̀m a mô ghê ghɨna ndùku mô a chìntê ghɨt a Sadùsî yîmì hi tè ghə̀k a ghɨt a tuma Jisòs, lem na ghɨna nè yenalò gha,

¹⁸ kwoti ghɨt a tuma atɨ̂na fa a ndâ chyâk.

¹⁹ Biyani à hì mô ntuksu anjèl à Bâba bên chwok jwo nda ye ghɨ tì fa ghɨna atɨ̂n, lyi fwu nì ghɨna jis ha ghɨna na,

²⁰ “Ghàn yen a ndâ Fùyèn ma ghàn fokti nâ gha à jɨ̀m ha ghɨta kum nì chyənà yì fe ye ghɨt a bemena kəta.”

²¹ Ghɨna yu ni tuku yu ben kə ni, ghɨna lye a ndâ Fùyèn yîmì hi tè yike à ghɨ̂t. Ngàŋ à ndâ Fùyèn yì ngaŋtena nì ghɨt a wuna toŋa chəhsu ghɨt a Jûs nâ sù jɨ̀m, na ghɨna bê khɨti yûŋtìnì, fî tum na ghɨ yê lye ben nì ghɨt a tuma Jisòs a chyâk.

²² Ghɨt ghe ghɨ ndùku chînà ndâ Fùyèn yên tê yena jə̀ ghɨna afû, kaha ben fôktì ha ghɨt a sakana,

²³ na, “Ghàh ti yên jwo ndâ chyaki ma ghɨ ti fati fa, ghɨt a chinana mô kə nâ yi jwô ndâ biyani ghàh ti jimì te yena jə̀ ghɨt a tuma Jisòs ghê atɨ̂n.”

²⁴ Ngàŋsu ndâ Fùyèn su chiksu nì tu ghɨt ghe ghɨ ndùku chînà ndâ Fùyèn, yu ni, hì kante nâ à gan ghə ha ghɨt a tuma Jisòs ghe agha.

²⁵ Kə ni, wùt lè ben jis ha ghɨna na, “Ghɨt ghe ghàn che fa a ndâ chyâk yâ mò a ndâ Fùyèn, yike à ghɨ̂t.”

²⁶ To ghɨt ghe ghɨ tì chînà ndâ Fùyèn yu ni, ghê ghɨt a wuna lo yen lyi ghɨt a tuma atɨ̂na, kə a mbonà, beka ghɨna ndùku fânà na ghɨta làhi tumle ghɨna nì te.

²⁷ À hì mô te ghɨ be nì ghɨt a tuma ghɨ̂n, jis na ghɨna timi à ghɨta ashyə̂, ngàŋ à ndâ Fùyèn yì ngaŋtena jis ha ghɨna na,

²⁸ “Ghàh ndùku mô ma ghɨ ti chyâhì lâŋà na kə ghàn fi yiki ghɨta nì gha ye Jisòs tì jìsa na ghàn hi yikê. Biyani, ghàn ti waŋ Jèlusalèm nì yikî tɨni. Ghàn ti fah na ghàn nè nêlò ma ghɨta hi ngane ghàh na a che ni ghàh na ghɨ ywi Jisòs.”

²⁹ Bità ghê ghɨt a tuma Jisòs ale fîsì na, “Ghàh kəta hi tè yu kə ha Yènfù bu ha ghɨta.

³⁰ Ghàn che ni na ghɨ banti Jisòs a kàkfùtàfù wù kpû. Biyani Yèn fe be ghàhnà ndùku kokhe lôhì wûn a yi kpû.

³¹ Yènfù lyi kokhi wûn a bàh à wuna ghɨ kpen wu wo ta na wù hi mô wut wu tihena fê mô bònhì shyəma wù ni ma ghɨt a Isalì khɨli lumu hi kahe təm a ghɨna a gha be, ma Yènfù lehèfo besu ghɨna su.

³² Ghàh mô sù fòktì a gha afân, Yohnà Yulena ghe Yènfù fo ha ghɨt ghe ghɨ ywo ha wûn, chwùtè kəbi na gha mɨ ghɨ̂n mò nâ hamok.”

³³ À hì mô te ghɨt a sakana ywo gha mɨ ghɨ̂n, ghɨ yaf ghɨna na haŋaŋ, ghɨna hì khɨŋa hi ywite ghɨta tuma Jisòs.

³⁴ Biyani wùt à Falàsî wùlè yet yi wuni mô Gàmàliyà, a mô chichà yì sak, ghɨt à jɨ̀m kokhe wûn, wù lôtì timi a nyə̂ kan na ghɨ lye fwu nì ghɨt a tuma ghɨ̂n a bɨn a fu yulâ ni,

³⁵ ki jîs ha ghɨt a sakana ghe na, “Ghɨt a Isalì, ghàn hi tôknè nì gha ghe ghàn khɨŋa hi nì ha ghɨt ghɨ̂n.

³⁶ À ndùku mô kəbi wu tuk wule Tìyodàs fwu kwok ben jis na à mò kə nâ yi mu we, ghɨta jûmtì wûn kwoka chema yi ghə yì kìk. À hì mô te ghɨ ywe wûn, ghɨt ghe ghɨ tî jûmtè wûn jyâhì kə fù mòk, fù mòk.

³⁷ À hì mô yi bàm yi tɨ̂n, Judàs wùlè ma wù fwu ben yi lak yi Galìlî, fî fwu kwôk a mu tuk afa ghɨ ndùku taŋa ghɨta atɨ̂n guf a nôn à ghɨ̂tà le ghɨ jûmtì wûn. Ghɨ ywi wûn nôn à wun atɨna jyâhì kə à jɨ̀m.

³⁸ Mu wu hì jîsà ha ghàn kum nki gha yîn na kə ghàn ni gha ye ghàn kwâktè hi nì ha ghɨt ghɨ̂n, ghàn de kə ghɨna ni beka gha ghɨ̂n ghɨna fate fê nè, à hì mô na ghɨna nè a wùt à jyak ma yu nê tê dàf shyəma ghɨna de.

³⁹ Biyani fêt tɨ̂n shìki mô ma à fo Yènfù jyaka na ghɨna hi nê ma yi nê hi bone wi ha ghàn hi ta ghaka ghɨna, ma ghàn nê yen na ghàn kə̀kà te ghàn nò Fùyèn.” Ghɨt a sakana ghê yu tobhî ye Gàmàliyà fo.

⁴⁰ Toŋa lihi ghɨt a tuma Jisòs a ndâ jis ha ghɨt ghe ghɨ chînà ndâ Fùyèn na ghɨ sam ghɨna fî kan na kə ghɨna nè fê jîsà gha yile wu lùk kum Jisòs, de ghɨna lô.

⁴¹ Ghɨt a tuma Jisòs lo afû saŋle kə ni beka Yènfù ti chwok na ghɨna kpenelò hi yen a ngək a wun a yi yet.

⁴² Ghɨna faŋ hì fôktè tum yì jùŋ kum Jisòs we ghɨ chwoka lema kə tuk mù jɨ̀m a ndâ Fùyèn, nì a ghɨta sù ndâ.

« Roimhe

Air adhart »

Lean sinn:

Ceanglaichean taic

Sanasan