Bìoball air-loidhne

Fêt 27 - Ŋwàklù Fùyèn Kàn Mù Fê (Cameron)

Ghɨ lyi yen nì Bôl a Lûm

¹ À hì mô te ghɨ lema na ghàh lye a ngwùk ma yen a Italì, ghɨ fo Bôl ghê ghɨt a ndâ chyaka ale ha to sù sojà ghɨt a Lûm ale, yet yi wuni mô Jùliyàs. Ghɨ ndùku toŋte ghɨna na sojàsu fə̀n wù chìk.

² Ghàh lo yen lye a ngwùk ma yì lo a yi tèk yi Àdɨ̀làmitùŋ, hì chwo yèn lumu wu lùk afa ngwùksù ndùku yê time atɨ̂n yi lak yi Esiyà. Ghàh à Àlìstakùs, a wùt yi lak yi Màsìdoniyà wùlè ma wù fwu yi tèk yi Tèsàlonikà mô amok.

³ Tuku yû ghàh yen tan a Sidòn, Jùliyùs hì kəta yi kwâktì jûŋì ha Bôl, de wûn na wù yê yen sunsu wunsu ma wù khɨti mwə̀ me wù ndùku khɨŋa.

⁴ Ghàh ki lô afû, fufa hì fo chyâhì ngə̂k, ghàh lô yen lumu a bàh a bonena ghe fufa ndùku chyâ wi atɨ̂n, yi bi yi lak yi Sàbulùs.

⁵ Kaha lye atɨ̂n à jwò yì chìk daŋ yen lumu a bàh afa ghɨ ndùku bakhe a Sìlisiyà nì Bàmfiliyà yen tan a yi tèk yi Milà a yi lak yi Lìsiyà.

⁶ To sù sojà mu ghe yen ngwùk ma yi lo yi tèk yi Àlèksandiliyà hì yênà a Italì lihi ghàh atɨ̂n, ghàh à ghɨna lô.

⁷ Ghàh lyi mu tuk, gbê kə a jwô, a jwô, beka fufa ta ndùku nê na gbî tɨni hi bona wi, gbi ben tan yi tèk yi Nidùs. Fufa tê dè na ghàh yen lumu afû, ghàh ki lêm hi yèn a bàh bonena afa fufa ndùku chyâ wi atɨ̂n a bàh à Sàlmonè yi lak yi Kɨ̀lît.

⁸ Ghàh ndùku gbê kə yi bè yi bè, jɨŋ kə ni ghaŋ agha ben tan wu lùk wule we ngwùksù ndùku bênà chyə atɨ̂n, ghɨ toŋte na, “Yusa jûŋà,” ghɨ bakhe yi tèk yi Làsiyà.

⁹ Ghàh bobhi mu tuk kə halô, gbî tɨni hì ghaka ghàh, beka a ndùku mô ma tuk we ghɨ ndùku bama jwo atɨ̂n kum besu tî chyâ, a mô wu yu we gbî jwôlì yè ta atɨ̂n. Bôl ki tobhe à ghɨ̂t jis na,

¹⁰ “Wana noma, mu yena na gbî ghàhnà hi yèn ashyə̂ kətalò ngə̂k yi bəma kə ni. Ngwùk yina kə̀kà te yì nè shàktèlò ma nâ mwə̀ me mù mò atɨ̂n ma mù bef, ma ghɨta fê kputi.”

¹¹ Biyani to sù sojà ghe tê yu gha ye Bôl jìsa, lem kə a to wuna yi gha afa bè ngwùk nì wùt we wù ndùku tihe ngwùk ndùku jîsà.

¹² Luk we ngwùk ndùku mô hi time atɨ̂n ndùku jwôfà wi hi chyə afû, a wu yu tònànù we fufa yè chyâlà, ghɨta ndùku kôŋà kə na ghɨ hi yênà ashyə̂ atɨ̂n à jwò yì chìk, nô na ghɨ yê tan a Fonìs ma yuti afû. Fonìs ndùku mô wu luk we ngwùksù ndùku yê chyə atɨ̂n a Kɨ̀lɨ̂t wu ke yênà a bàh afa yuchwî lye atɨ̂n.

Fufa bəmana chyâ atɨ̂n à jwò

¹³ À hì mô te fuf ghe bota, ghɨ le yîmì a bàh a nchwô hì chyâlà kə hijə, hijə, ghɨt atɨna yen yâ, lyi kə na kwâktì ghɨna làhi kpên, ghɨna guf kokhi shyə ghe ghɨ ye chwuŋa na ghɨ khɨti ngwùk kə yì hi gbê, yì yîmì hi tè gbì hijə hijə kə yi bì jwôlì Kɨ̀lɨ̂t.

¹⁴ Biyani fufa ta ale yîmì hi tè chyà, ma ghɨ lo a bàh a kwokànà, hì lye bê lumu a jwô.

¹⁵ Hì bê yani shikà ngwùk ghàh mômhì hi yèn lumu a bàh afa ghɨ bênà atɨ̂n, yi ta ghak ghàh, ghàh dê, ngwùk atɨ̂n gbi atɨ̂n à fuf.

¹⁶ Ghàh kwuŋ chya lumu a fù laklà fu lefu atɨ̂n à jwò ghɨ toŋte na Kodà mômhì nâ nì jyaka guf lihi ngwùk yì tetana ye ghɨ tì chwuŋa yi bàm yi ngwùk yì chìk.

¹⁷ Ghɨ guf lihi nì yinì yani fati kwut ngwùk yì chìk nì kùlsù na kə yì bâtì. Ghɨt ghe ghɨ ndùku tihe ngwùk atɨ̂n hì fânà kə na yì làhi ye kùn a tuŋ a sùsi ghe ghɨ ndùku mô atɨ̂n à jwô lumu a bàh à yi lak yi Libiyà, ki yêntè chwohe a bâh à sùnju ghe ghɨ ye chwuŋa a tô ngwùk, hi nì na kə ngwùk hi gbê haŋaŋ, de na à hi china kə a fûf.

¹⁸ Fuf atɨna faŋ hì fo kə ngə̂k. Tuku shihi yula bèn, ghɨna hì fihe mwə̀ mùlè me a mù ndùku mô a ngwùk tuma chwohe a jwô.

¹⁹ Tuku yû wu tuk wu kumtenu, ghɨna hì chwokte kə mwə a ngwùk tuma chwohe a jwô.

²⁰ Tuk mùlè chyâ teka ghàh yen yuchwî makə mu jên, a chyâ kə a fûf. Te ghɨ faŋa hì chyâlà kə ha jyak yani ghàh yen na ghàh nè bônà wi.

²¹ À hì mô te ghɨt atɨna fèta ha ghaf teka ghɨna yə shyə ale, Bôl lôtì timi a ghɨta ashyə̂ jis na, “Wana noma, à ye hì mô na ghàn yu gha ye mu jìsa ma ghàhnà ta ye lo jə a Gɨlìs, ma ghàhnà tà bobhi jə mwə̀lû nè hi fè khɨti a lə̀hà ghɨ̂n.

²² Mu chyate jîsà ha ghàn chîn na, ghàn kwut təm ghana beka a shàkti kə ngwùk biyani wùt ha ghàn tà kpû.

²³ Mu jîsà ni beka à chehì mô ntuksu lân, anjèl à Fùyèn fê fu kəta mu a fe mu kokhe che ben ha mu,

²⁴ jis na, “Bôl, kə wò fan beka Yènfù ti lem na wò timi kə nâ a fə̀n wù chìk ashyə̂. Fî lèm na wùt nè kpo wi atɨ̂n à ghɨ̀t afân a ghàn a ghɨna gbê amok ni, kum təm a jûŋ ghe fu kəta ha wò.”

²⁵ “Mu jîsà ha ghàn wana noma na, ghàn kwut təm ghana beka mu bime ha Yènfù, khə nâbi ghə ghê ghɨ nè gânà kəta ghɨ jisa ha mu.

²⁶ Fufa nè china fihelò ghàhnà ma ghɨ lem yi bàm yi lak yile atɨ̂n à jwò.”

²⁷ “Ngàmsù chya sù bà à hì mô ntuksu, fufa baha bɨlà ki yi bɨ̂l nì ghàh a jwò à Àdìliyà. À hì mô ntênàsê, ghɨt ghe ghɨ tihe ngwùk yen na ghɨna hì kùmhè bênà a yi bi jwôlì.

²⁸ Ghɨna mak chwohi kùl a jwô ma ghɨ ti chwuŋ shyə ale yi jwô àtɨ̂n, yì lyi chwô ghɨna fek yen na jwò àtɨ̂n lyelò tàmsù wosu wu wə nì mbà. Ghɨna chyəti kə ni fî mak kùl yen na jwò àtɨ̂n lye tânà kə tàmsù wosu mbulamòk.

²⁹ Ghɨna yîmì hì fânà na fufa nè lyê lôlò nì ghɨna ma yê kùnâ ywiti yi wo, kahi chwohi mwə̀ me mù kìk yi bàm yi ngwùk, a mù nè na ngwùk time a jwô, hì jə̀mà kə na tuku yu.

³⁰ Ghɨta a ngwùk afâ tî mômhè hi tet a fwu a ngwùk, hì chwohe yênà nì ngwùk yi tetana yê a jwô kama nê te ghɨ khɨŋa hi fihe mwə̀ me mù ndùku ghaŋle ashyə̂ ngwùk, a me mù nè na kə ngwùk gbi.

³¹ Bôl yen gha tɨni jis ha to sù sojà ghe nì sojàsu wunsu na, “Ghɨt ghɨ̂n a ngwùk afân tê faŋ hi ndokò atɨ̂n à ngwùk afân ma wùt nê tê bòn.”

³² Sojàsu tɨnsu yu ni tenti sù kùl se su ndùku mô a ngwùk yì tetana afa de yì hì yênà a jwô a yinì ngɨŋ.

³³ Tuku hì yula bê kə ni, Bôl chyati ghɨna à jɨ̀m jis na, “Ghàn mômhì hi yə a shyə. Ghàn ti chyə ngàmsù bà chîn teka ghàn yə shyə ale, mô kə a fumhì.

³⁴ Chîn mu chyate na ghàn yə shyə kə wùt ha ghàn nê kpu. Ghalà fu lefu nè gânà wi ha wùt ha ghàn nâ hakoh.”

³⁵ Te Bôl jìsa ni, lyi a bân fo àyòŋnà ha Yènfù kə ghɨna ashyə̂ bəktilò yîmì hi yə̂.

³⁶ Ghɨna yen ni kwut a təm nâbi nde yə a shyə.

³⁷ Ghàh ndùku chîntè mô a ghɨ̂t yi ghə yì bà nì msàmba njwò tufa a ngwùk afû.

³⁸ À hì mô te nâbi nde yə kpene kəta wù khɨŋa, ghɨna fihi saŋa wît ghe ghɨ ndùku mô a ngwùk hì tumhi a jwô na ngwùk yaŋhi.

Fufa nî ngwùk ye shyâktì

³⁹ À hì mô te tuku yula bê ghɨna tà fî khɨlî na à mô yìni bi yi laki agha, biyani yen wu lùk wule yi bi jwôlì, wu mô te a chɨm, lem na yi shìki bona ma ghɨna yen nì ngwùk ma yi time afû.

⁴⁰ Ghɨna tenti mwə̀ me mù ndùku khɨte ngwùk, de mù chwo a jwô, ghɨna fî yêntì kùl se su ndùku khɨte shyə ghe ghɨ tihe ngwùk kokhi a bâh à sùnju ghe ashyə̂ shyəma fufa chìn à fihi ngwùk atɨ̂n a bi jwôlì.

⁴¹ Biyani ngwùk àtɨ̂n yen kun a tu a tuŋ a sùsi ale yi sah à jwò, jwo ngwùkì so a chyə̂ yi tê fê yèn, jwò nêk bam yi tɨni shyâktì wu bàh wu bàh.

⁴² Sojà se yen ni hì khɨŋa hi ywite ghɨta ndâ chyâk ghe atɨ̂n nâ à jɨ̀m hi nì na kə wùlè nê nâhà fwu ma wù tet.

⁴³ Biyani to sù sojà ghê hì khɨŋa hi bònhè Bôl ki tunhî na kə ghɨna mom, ki bɨlà jìs na nâbi nde we wù mò hi nàh wù yitê chyakte fwu ashyə̂ ma wù nah à daŋ.

⁴⁴ Ghe ghɨ faŋa, ma ghɨ khɨti bâh wu mu kàkù makə bâh wu ngwùk we ghɨna mò hi khɨtî. À ni mò te ghàh tì gbe shyəma ghàh bon.

« Roimhe

Air adhart »

Lean sinn:

Ceanglaichean taic

Sanasan