Bìoball air-loidhne

Fêt 26 - Ŋwàklù Fùyèn Kàn Mù Fê (Cameron)

Bôl jis hi gàmtè ngɨŋ à wûn a fə̀n Àgɨlibà

¹ Fə̀n Àgɨlibà jis ha Bôl na, “Ghɨ ti fo lumu ha wò na wò jis kum ngɨŋ yâ.” Bôl lôhì a wo a nyə̂ yîmì hi tè jìs na,

² Fə̀n Àgɨlibà mu khə na à mò a to jûŋà ha mu hi tè jìs kə nâ a wo ashyə̂ lân, hi fîsì a gha ghe ghɨt a Jûs lèma a mu tû nâ à jɨ̀m.

³ Yi mô kə nâ ni beka wò khə mihè lum te ghɨt a Jûs chyə atɨ̂n, fê khə kəbi lum te ghɨna lyè gha hi fatî ghɨna hi jîsà atɨ̂n. Mu chyate na wò fatè yuti gha ye mu ti jîsà.

⁴ Ghɨt a Jûs à jɨ̀m khəlò te mu ndùku chyə ha walà khə te mu chyə kwoka a ghàh a yi lak fî chyə a Jèlusalèm,

⁵ fê khə mu nâ hadà, ma ghɨna làhi fòktè mihì kə nâ ni, a wu yu afa ghɨna kôŋà, na mu mò ni mô wut à Falàsî ma mu ndùku kokhe lò Yènfù kə nâ wu lum afa ghɨt a Falàsî ndùku kokhe Yènfù atɨ̂n.

⁶ Mu mò afân chîn ni ghɨ saka mu kə beka mu khə hamok na Yènfù ti lunhi chwùna we wù tì chwùne ha be ghàhnà ghɨ shyə.

⁷ A fê mô kəbi wu chwùna we sah yi nda ghɨta ghàhnà ghɨ̂n njwòsù bà ndùku kokhe Yènfù nchwì nì ntuksu khə na ghɨ bè khɨtelò, à baha mò kə kum gha yinâ, mbè, a yi ne, ghɨt a Jûs lêmà gha ghɨ̂n a mu a tû.

⁸ Njwô ghə te ghàn ywo yi ta ghaka ghàn hi bimî na Yènfù lòhèlò ghɨta a yi kpû?

⁹ Nâ mu ha mu ngɨŋ ndùku khə na mu kəta hi nì nâbi ghə hi bobhe fêt yì Jisòs wù Nasalì.

¹⁰ À mò fêt ye mu ndùku nê a Jèlusalèm. Ngàŋsù ndâ Fùyènsu chiksu tì fo jyaka na mu lem ghê ghɨ kokhe Yènfù wu lum afa mu kokhe atɨ̂n chîn a chyâk, ghɨ dô kə ni. À hì mô te ghɨ chyahe saki na ghɨ ywiti ghɨna, nâ mu tok gha tɨni.

¹¹ Mu tì fô ngə̂k ha ghɨna a ghɨna ndasu chintesu nâ sù jɨ̀m, mômhì nâ yu mù domù na ghɨna tunhi ma hi fê samhe wi ha Jisòs. Mu ndùku bânà ghɨna nâ haŋaŋ fwo yênà a lak tu letu kə hi fo ngə̂k ha ghɨna.

Bôl fôktì te wù kahe hì mô wut wù bimena

¹² À ndùku mô te mu lòte hì yênà yi tèk yi Dàmaskùs kum gha mi yîn te ngàŋsù ndâ Fùyènsu chiksu tuma mu afû, fo a jyak na mu yen.

¹³ Mu fwu tan wu lum kə nâ nchwì tâ ni, a mbè, ban yile fwu a nyə̂, ta chyâ yuchwî mwanlò a wu lùk afa mu ndùku mô atɨ̂n ghàh à ghɨt ghe ghɨna ghɨna gbê a mu yi bàm.

¹⁴ Ghàh fente a chyə̂ kə à jɨ̀m, mu yu te jyə̀ jìsà yi jìs yi Hibùlùs na, Sôl, Sôl, wò chɨma wulu mu ni njwô ghə? Wò nùkà wu wun wa halô jîsà na wò nò mu.

¹⁵ Mu buf na à mò wò nde a Bâba? Bâba fîsì jis na, à mò mu Jisòs we wò chɨma wulu wunu yâ.

¹⁶ Biyani lòti timi a nyə̂. Mu fwu a wo yi kə̀k hi chwoka wò ha wùt à mù wù fèt ma wò nê hi mô fôktè kum mu nì gha ghe wò yena lân nì ale ghe mu nè chwûtè ha wò.

¹⁷ Mu nè bônhèlò wò a ghɨt a Isalì a wô, nì ha tum we mu tuma wò ha ghɨna.

¹⁸ Wò nè yâhèlò se ghɨna ma wò fê fihi ghɨna a bɨn a finana ma wò lihi ghɨna atɨ̂n yì bân. Wò nè nêlò ma ghɨna fwu a Satàn yi dèt yi sak ma ghɨna yen ha Yènfù ma wò lêhèfo gha ghɨna a be ma ghɨna khɨti luku atɨ̂n à nòn a ghɨt ghe Yènfù chwokte beka bimî ye ghɨna nè khɨte ha mu.

Bôl fôktì te wù ndùku fôktè tum yì jùŋ

¹⁹ Fə̀n Àgɨlibà, mu tà tì tunhî hi nè gha ye ban yê tì fwo a nyə̂ ghɨ jis ha mu na mu ni.

²⁰ Mu tî yîmì hi yiki a Dàmaskùs nì a Jèlusalèm nì ghɨta yi lak yi Jùdiyà kə yì jɨ̀m, yiki kəbi tumu na ghɨna kəta hi bɨ̀nhè təm a ghɨna a ghɨna gha be hi bèn ha Yènfù hi tè nè gha ghe ghɨ chwûtè na ghɨna ti kahi təm a ghɨna.

²¹ À ni mò gha ye ghɨt a Jûs tì khɨte mu atɨ̂n a ndâ Fùyèn hì khɨŋa hi ywî.

²² Biyani Yènfù gâmtì mu hi bè tàn lân, mu mô afân te wùt we mu tì yena hi fôktè gha mɨ ghɨ̂n ha ghɨt à jɨ̀m, ha ghɨ tetana nì ha ghɨ chika. Gha ye mu jìsà mò kəbi gha ye Musìs nì fòktìsu chiksu ndùku mô ma ghɨna ti fôktì na yi bè gânàlò.

²³ Ghɨna tì jis na, “Wùt we Yènfù chwoka lema kəta hi yen a ngə̂k hi kpû, hi tè mò wùt wù shyə̂ hi kaha lòtì a yi kpû shyəma wù fòkti ha ghɨt a Jûs nì tumu na ghɨ làhi bònhì ghɨna, Yìna mô hi tè mò ha ghɨna te yi bân.”

²⁴ Te Bôl jìsa be tana wu lùk afân ni, Festùs kat jîs yi wuni jis na, “Bôl, wò mò ni tof wa bu a jûŋ, ŋwàklù yâ yì dona ti nî wò ti jyâk.”

²⁵ Bôl fîsì ha wun na, “Mbè, to ma tà jiblî, mu jìsà kə nâ wu tof jîsà kə nâ gha hamok.

²⁶ Mu jìsà ni fânà wi beka fə̀n hì khəlò kum gha mɨ ghɨ̂n, beka ghɨ tà tì gan jə̂ a lèt.

²⁷ Fə̀n Àgɨlibà, mu khə na wò mò nì bime a gha ghe fòktìsu chiksu tì nyàka. À wi ni agha?”

²⁸ Àgɨlibà buf ha wun na, “Ba, wò kwàktè na kə fu yulâ ni wò làhi bɨ̀nhè mu ha wùt wù bimena agha?”

²⁹ Bôl fîsì na, “À làhi tè mò a fu yulà makə wu yu dâ, mu jə̀mà na Yènfù ni ma wò hi mô wùt wù bimena, bakhi nâ nì ghɨt à jɨ̀m ghe ghɨ yute gha ye mu jîsà lân, na ghɨna kahè hi mô kəbi te mu. Mu jə̀mà na yi shìki mô ni, kə wùt nêhi mô te wùt à ndâ chyâk te mu.”

³⁰ Fə̀n ki lôtì ghê Gobnà nì Bènîs nì ghɨt à jɨ̀m ghe ghɨna ndùku mô amok

³¹ lo afû yen hì bitè gha atɨna jîsà na, “Wùt wuna nè wi gha be yile ye ghɨ mô hi lèmà wun a ndâ chyâk atɨ̂n makə hi ywe wûn.”

³² Àgɨlibà jis ha Festùs na, “Ghɨ yê làhi dè wùt wuna na wù lo, à mò kə na wù chehì mô ma wù ti chyati na fə̀n wù chìk a Lûm sak sak à wûn.”

« Roimhe

Air adhart »

Lean sinn:

Ceanglaichean taic

Sanasan