Bìoball air-loidhne

Fêt 23 - Ŋwàklù Fùyèn Kàn Mù Fê (Cameron)

Ghɨ lyi ben nì Bôl wu lùk wu saku

¹ Bôl ki yen nì ghɨt ghe ghɨ ndùku mô yi chìnti afû jis ha ghɨna na, “Wana noma, mu kwàktè wi yi kwâktì chyə ye mu chyə kwoka a Yènfù ashyə̂ hi tàn lân mô kə nâ a jûŋ.”

² Ànàniyàs we wù ndùku mô ngàŋ à ndâ Fùyèn yì ngaŋtena jis ha ghɨt ghe ghɨ ndùku mô bakhe a Bôl a ngwùŋ na ghɨna sam wo a wun a yi jwô.

³ Bôl jis ha wun na, “Yènfù bè sama kəbi wò ni, wò fufa kə̂kà ni te ndâ yì yokana. Mô afâ jîsà na ghɨ sak mu te saki khɨŋa, fê khɨma kəbi sak yi tɨni kə ha wo ngɨŋ, jîsà na ghɨ sam jwo mi.”

⁴ Ghɨt ghe ghɨ tì time bakhe afû buf ha wun na, “Wò sùlè ngàŋ à ndâ Fùyèn yì ngaŋtena agha?”

⁵ Bôl fîsì ha ghɨna na, “Wana noma mu ye hì khə wi na wù mò ni a mô ngàŋ à ndâ Fùyèn yì ngaŋtena.” À ye hì mô na mu hi khə, ma mu tà wun sùlì beka ghɨ ti nyak a ŋwàklù Fùyèn na, “Kə wùt bè sûlè wùt wânù yì sak.”

⁶ À hì mô te Bôl yena na ghɨta làwû afû ni, ghɨ le mô ghɨt a Falàsî, ghɨ le mô ghɨt a Sadùsî, wù bwat jis nâ haŋaŋ na, “Wana noma, mu mò ni mô wùt à Falàsî, ma bom ghɨ̂n ndùku mô ghɨt a Falàsî. Ghɨ saka mu afân beka mu bime na Yènfù bè nêlò ma ghɨt a kputena loti a yi kpû.”

⁷ Wù jis a gha mɨ ghɨ̂n ni, njaŋi lôtì, jyàhè wùna lôtì a ghɨna fùtɨ̂n,

⁸ beka ghɨt a Sadùsî ndùku bime wi na ghɨta bè lôtèlò a yi kpû, shyə ale bu ni te sù anjèlsu Fùyènsu makə wu yohnù, biyani ghɨt a Falàsî bime gha mɨ ghɨ̂n nâ à jɨ̀m.

⁹ Ghɨt mɨ ghɨn fî bwati yên kə ashyə̂. Chichà su sak su lesu a nòn à ghɨt a Falàsî ki lôtè timî hì njaŋâ nâ nì jyaka jîsà na, “Ghàh tà yen jə̂ gha be ye wùt wunâ ne. À làhi te mò ma yohnà ti jis ha wûn makə à jis anjèl à Fùyèn.”

¹⁰ To sù sojà ghɨ chik mu ghê yen te njaŋ yi tɨni ta yênà kə ashyə̂ wù hì fânà na ghɨt atɨ̂na nè shàktèlò Bôl kə wu kòm a wu kòm, wù jis ha sojà su wunsu na su yê lyê fwu nì Bôl a nòn afû ma yen nì wûn a mbàn.

¹¹ À hì mô ntuksu Bâba ben timi bakha a Bôl a ngwùŋ jis ha wun na, “Wò hi kəta kə təm a ta ni. Te wò time hi jìs kum mu ha ghɨta a Jèlusalèm afân wò kəta hi yè timi hi jìs nâbi yâ ha ghɨta a Lûm.”

Ghɨt a Jûs lem hi ywe Bôl

¹² À hì mô te tuku yula ghɨt a Jûs yûŋtì a chìnti, laha yə mu kân na ghɨna nè fê yə wi shyə bu hi nyo kə nâ mòlû à bu na ghɨna ywilô Bôl.

¹³ Ghɨt ghe ghɨ ndùku fate gha mi yîn tî chyâlò ghɨt mkìk.

¹⁴ Ghɨna yen yen ngàŋsu ndâ Fùyèn su chiksu nì chəhsu jis na, “Ghàh ti yûŋtì kan na ghàh nè fê kumà wi shyə a ghàh yi jwô a bu na ghàh ti ywi Bôl.

¹⁵ Yi ni chwùtè chin na ghàn ghɨt a sakana ti chinhelò tum ha to sù sojà, na wù jis ma ghɨ lyê ben ni Bôl ha ghàn ma yi hi kə̂kà kəta ghàn khɨŋa hi tòkà bufte a gha ha wûn. Ma shihi bèn nì wûn ma ghàh ywi wûn teka wù bê tan afân.”

¹⁶ Biyani wâ jàmtù Bôl yu gha ye ghɨna ndùku fate, lo yen a sojà sù a mbàn fôktì ha Bôl.

¹⁷ Bôl toŋa to sù sojà ghɨ le jis ha wun na, “Lyì wan wù kpuŋ wuna ma wò yen nì wun ha to sù sojà ghɨ chika, wù kətalò gha hi fòktì ha wûn.”

¹⁸ Sojà yê lyi wan wù kpuŋ we yen nì wûn ha to sù sojà ghɨ chika ki jîs ha wun na, “Wùt à ndâ chyâk we yet yi wuni mò Bôl ya jis na mu lyê ben nì kpuŋ wûn ha wò beka wù kətalò gha hi fòktì ha wò.”

¹⁹ To sù sojà ghɨ chik ghe khɨti kpen wu wan we, gûftì yen nì wûn wu lùk, nyamti buf ha wun na, “Wò khɨŋa hi fòktì na ghə ha mu?”

²⁰ Wù jis na, “À bè hì mô yi bîs ma ghɨt a Jûs jis ha wò na wò lyê chwô ben nì Bôl wu lùk wu saku, kama chwûtè na ghɨna khɨŋa hi tòkà bufte a gha ha wûn.

²¹ Biyani kə wò nè yute beka ghɨna chyàlò mkìk te ghɨna nè bênà ma ghɨ gbuti wûn a wu lûm, ghɨna ti yə kànû na ghɨna nè kumà wi shyə a ghɨna yi jwô a bu na ghɨna ywilô Bôl. Ghɨna gbùtè hi ywe wûn hi yu na wò nè jîsà na ghə agha.”

²² To sù sojà ghe jis ha wun na, kə wò nè mômà hi jìs ha wùt na wò ti fôktì gha yin ha mu, ki jîs na wù lo.

Ghɨ chinhi Bôl ha Gobnà Felìs

²³ To sù sojà ghɨ chik mu ghê toŋa wu tu sù sojà wunu à bà jis ha ghɨna na, “Ghàn lyi sojàsù yi ghə yì bà bakhi nì sojà sule se su nyɨŋa a tô sù nyâm msàmba, bakha nì se su nô nì woŋa yâ yi ghə yì bà ma ghàn bakti hi yèn a Sìsaliyà. Ghàn à ghɨna bakti ma ghàn nê lô a mbɨŋlu bulamòk ntuksu.

²⁴ Ghàn fo nyamsu lesu ha Bôl ma wù gbi a tô àtɨ̂n, ghàn momhi hi gbì nì wûn kə nâ a jûŋ ma ghàn yen nì wûn ha Gobnà Felìs.”

²⁵ To sù sojà ghɨ̂n nyak a gha ghɨ̂n ni a ŋwàklù fo ha ghɨna na ghɨna nê lo nì gha atɨna na,

²⁶ “À nyak mu kɨ̀lodiyàs Lìsiyà, ha wò Gobnà Felìs wù jùŋ. Mu wu toŋte bê ha wò.”

²⁷ Yi mô na ghɨt a Jûs ye kwo wùt wunâ hì khɨŋa hi ywî, mu che ben yu gha tɨni ghàh à sojà samsu bônhì wûn te mu che ywo na wù mò ni a mô wùt à Lûm.

²⁸ Mu che lyi chwo nì wûn a ghɨna wu lùk wu sakanu beka mu chehì kôŋà hi khɨli na ghɨ khɨti wûn ma wù bobhi nâ ghə agha.

²⁹ Te mu chwo yâ, ki yen na ghɨna jìsà a gha kum kə yi sak yi ghɨna teka wù bobhè jə gha ye ghɨ mô hi ywe wûn makə hi lèmà wûn a ndâ chyâk atɨ̂n.

³⁰ Ghɨ ti fôktì ha mu na ghɨ baha fate kə hi ywe wûn, mu yen na yi jwôfà kə na mu chinhi wûn ha wò kə chîn. Mu ti fî jis ha ghɨt ghe ghɨna ngane wûn, na ghɨna jûmtè ben ma fôktè kwok nì ngə̂k à ghɨna a wo ashyə̂.

³¹ Sojà su tɨnsu yu gha ye a to ghɨna ghe jìsa lyi Bôl fwu nì wûn ntuksu gbi yên nì wûn a Àntibatìlìs.

³² Tuku yû, sojà se su ndùku gbê nì wulu yen chinhi Bôl kaha kolo lò. Wù lô nì se su ndùku gbê a tô sù nyâm.

³³ Ghɨna lyi yên nì wûn a Sìsaliyà fo wun ha Gobnà, bakha nì ŋwàklù ye ghɨ che fo ha ghɨna yâ.

³⁴ Gobnà àtɨ̂n taŋ ŋwàklù àtɨ̂n buf ha Bôl na wò lo a yìni laki agha? À hì mô te wù ywo na Bôl lo a yi lak yi Sìlisiyà,

³⁵ wù jis ha wûn na, “Mu nè ywo gha ya a wu yu afa ghɨt ghe ghɨ ngane wò yâ bèna.” Wù jis yâ ki jyân na sojà su wunsu lyi Bôl ma yê lem wûn a tok afa Helòd tì ba.

« Roimhe

Air adhart »

Lean sinn:

Ceanglaichean taic

Sanasan