Bìoball air-loidhne

Fêt 22 - Ŋwàklù Fùyèn Kàn Mù Fê (Cameron)

¹ “Wana noma nì bom ghɨ̂n, ghàn yuti gha ye mu time a ghàn ashyə̂ hi jìs hi gàmtè ngɨŋ à mì.”

² À ndùku mô te ghɨna ywo te wù jìsà jîs yi Hibùlùs, ghɨna china kə ni moŋ. Bôl jis na,

³ “Mu mò ni, mô wut à Jûs, ma ghɨ tì bwɨ mu a yi tèk yi Tasùs, a yi lak yi Sìlisiyà mu ləma kwok kə nâ yi tèk afân, yen a ndâ ŋwàklù, chichà mù hì mô Gàmàliyà. Wù tî chwûtì saktu shyətu bè ghàhnà tu ha mu nâ tù jɨ̀m. Gha Fùyènì hì lûmà a mu wùn kəbi te yi lûmà a ghàn a wu wùn lân.

⁴ Mu tî nyâblì nì ghɨt a bimena ghe ghɨ jûmtè Lum wu fe wuna mu gbê atɨ̂n chin ni, mu ndùku khɨte lɨmànà nì ywena yê lêmà a ndâ chyâk ywite kə nâ ale.

⁵ Ngàŋ à ndâ Fùyèn yì ngaŋtena nâ nì chəhsu lak su làwû hi bime na mu jìsà hamok. Ghɨna tî nyak ŋwàklù sù, hi fo a jyak ha mu na mu yê fo ha wana ne yi tèk yi Dàmaskùs ma mu khɨtè ben nì ghɨt ghe ghɨ jûmtè Lum mu wûn a Jèlusalèm shyəma ghɨ fo ngə̂k ha ghɨna.”

Bôl fôktì gha ye yi gana na wù kahè hi mô wut wù bimena

⁶ À hì mô te mu gbe hì bakha yênà a Dàmaskùs, ban yile fwu a nyə̂ mwanlò, baŋ wu luk we mu ndùku mô atɨ̂n.

⁷ Mu fen a chyə̂ yu te wùt toŋte mu jîsà na, ‘Sôl, Sôl, wò chɨma wulu mu ni njwô ghə?’

⁸ Mu buf ha wun na, ‘À mò wò nde a Bâba?’ Wù fîsì na, ‘À mò mu Jisòs wù Nasalì we wò fo ngə̂k ha wûn yani.’

⁹ Ghɨt ghe ghàh à ghɨna ndùku mô amok yen yi ban yi tɨni biyani tê ywo jə̀ gha ye ghɨ jisa ha mu.

¹⁰ Mu ki buf ha wun na, ‘Mu ti nê nâ ghə chin a Bâba?’ Wù jis na, ‘Lòtî ma wò lyê yen yi lak yi Dàmaskùs ma ghɨ fokti gha ye Yènfù khɨŋa na wò ni.’

¹¹ Ban yi tɨni tî nî se ma hì fê yena wi luktu, ghɨt ghe ghàh à ghɨna ndùku mô amok khɨti mu wu kpên gûftì lyi nì mu a Dàmaskùs.

¹² Wùt lè ndùku chyə afû kokhe Fùyèn, chyə kə nâ te sak yi ghàhnà khɨŋa, nâ ghɨt a Jûs à jɨ̀m kokhe wûn, yet yi wuni mô Ànàniyàs.

¹³ Wù ben time a mu ngwùŋ jis ha mu na, ‘Wâ nôm Sôl kaha yen luktu.’ Te wù jìsa mihe ni se ma yulî kə wu yu mefû, mu ki yen wûn.

¹⁴ Wù jis ha mu na, ‘Yèn fe a be ghàhnà ndùku ngumle ti chwok wò na wò khɨli gha ye fu khɨŋa na wò ni ma wò fê yen à khɨli wùt we wùt wù fètana à wûn we wù mò chilichili a mò wûn we a wù jîsà ha wò kə nâ nì ngɨŋ à wûn,

¹⁵ beka wò bè time fôktèlò kum wûn, a gha afa wò ywo fî yen nì se ha ghɨt à jɨ̀m.

¹⁶ Nâ chîn kə chyàhi yu. Lòtî fyi mòlû ma chyati Bâba na wù lèhefo be sasu.’

Bôl fôktì te Bâba tuma wûn ha tumu

¹⁷ Mu kaha yen a Jèlusalèm lye a ndâ Fùyèn shihi jə̀m gha fwo a mu yi kə̀k te ghɨ fwu a jəm.

¹⁸ Mu yen Bâba, wù jis ha mu na, ‘Nyàŋhi lòti lô a Jèlusalèm afân beka ghɨt ghɨ̂n nè bime wi gha ye wò jîsà kum mu.’

¹⁹ Mu fîsì ha wun na, ‘Bâba, ghɨna khə kə nâ hamok na mu ha mu ngɨŋ chehì khɨte à ghɨ̂t ghe ghɨ bime ha wò a wo ndasu chintesu yê fâ ghɨna a chyâk fê samâ.

²⁰ À ndùku mô te ghɨ ywe Sìtifèn we wù ndùku fôktè kum wò, nâ mu mô afû ta kə na wù kəta hi kpû. À ndùku kine kə nâ mu nì njusu ghɨt ghe ghɨ tì ywe wûn.’

²¹ Bâba fî jis ha mu na, ‘Lô beka mu nè tumalò wò nâ hadà ha tumu.’

²² Te Bôl ndùku jîsà ni, ghɨna hì yute kə yi yutî. Wù jis ni yen tan a leŋ afân ghɨna hì bwate kə yi bwatî jîsà na ghàn ywê màka shyə mɨ ghɨ̂n! Wù kpene wi hi tè chyə̂.

²³ Ghɨna hì bwatê chwokte njusu ghɨna su lesu lâŋà kokhe a nyə̂ fê mwə̂tà wu bwû waŋa kokhe a nyə̂.

²⁴ To sù sojà ki jîs na, ghɨ lyê lyi nì Bôl atɨ̂n à mbàn, ma ghɨ sam wûn nâ a jûŋ nì wànsù shyəma wù fokti na ghɨt a Jûs jìsà gha ghɨ̂n kum wûn nì njwô ghə agha.

²⁵ À hì mô te ghɨ kwuta wûn hì khɨŋa hi sâm wù buf ha to sù sojà ghɨ le ghe ghɨ tì time kumhe a wun a ngwùŋ na, “Saki bimelò na ghɨ sam wùt à Lûm teka ghɨ yen gha ye wù bobhe agha?”

²⁶ Te to sù sojà ghe fate ywo gha mi yin ni, yen buf ha to sù sojà ghɨ chika na, “Wò khɨŋa hi mòmà ghə ni? Wùt wunâ mò ni a mô wùt à Lûm.”

²⁷ To sù sojà mu ghê ki yen Bôl jis ha wun na, “Fòkti ha mu na wò mò wùt à Lûm agha.” Bôl fîsì na mu mò kə nâ wùt à Lûm.

²⁸ To sù sojà ghê ki jîs na, yi ti ləsì ka wu dô kə ni shyəma yi hi mô wùt a Lûm biyani Bôl jis na, “Mu mò kə nâ wùt à Lûm a yi bwɨ̂.”

²⁹ Kə wu yu te wù jîsà ni, ghɨt ghe ghɨ ndùku khɨŋa hi sama wûn yîmì hi tè kòtì yi bàm, fânì kwo to sù sojà mu ghê beka wù ywo na Bôl mò wut à Lûm ma wù te kwut wûn nì chyaksu.

³⁰ Tuku yû, to sù sojà ghê jis na ghɨ de wûn, fî jis na ngàŋsu ndâ Fùyènsu chiksu nì ghɨt a sakana na ghɨ bê yuŋti beka wù ndùku khɨŋa hi yu hamok na ghɨt a Jûs ngane Bôl ha ghə agha. Ghɨna bên, ki jîs na Bôl chyâ time ashyə̂ yì chìntì afû.

« Roimhe

Air adhart »

Lean sinn:

Ceanglaichean taic

Sanasan