Bìoball air-loidhne

Fêt 15 - Ŋwàklù Fùyèn Kàn Mù Fê (Cameron)

Ghɨt a tuma Jisòs khɨti yi yûŋtì a Jèlusalèm ghê chəhsu

¹ Ghɨt ale tî lo chwo ben yi lak yi Jùdiyà yen a Antiyòk yîmì hì yike ghɨt a bimena na, “Ghɨ ki faŋ hi fate ghàn, ki yi ghəl te sak yi Musìs chwùtè, ma Yènfù bê tè bònhè jə̀ ghàn.”

² Bôl ghê Bànabâs yîmì yi gûfnà yi bəma kə kum yiki tɨni. Ghɨ ki chwok a Bôl ghê Bànabâs nì ghɨt a bimena ale a Antiyòk na ghɨna kwok à yen a Jèlusalèm ma yê yen ghɨt a tuma nì chəhsu ma biti gha mi yîn.

³ Ghɨt a bimena fati yi gbî yîn ha ghɨna yen chinhi ghɨna a wu lûm. Ghɨna lo gbi tohna yi lak yi Fìnsiyà nì Sàmaliyà hì fôktè kwoka yênà ha ghɨt a bimena afû ni te tumu le kwuna chyəna ghɨna bimi ha Jisòs. Gha mi yîn nî ghɨt a bimena à jɨ̀m hì saŋle nâ a jûŋ.

⁴ Te ghɨna ye tana a Jèlusalèm, nôn à ghɨ̂t ghɨ bimena nì ghɨt a tuma Jisòs nì chəh se su mô afû bên hi toŋti ha ghɨna. Ghɨna fôktì ha ghɨt mɨ ghɨ̂n te Yènfù gàmte ghɨna na ghɨna ni nâbi ghə ghe ghɨna mò ma ghɨ ti nî.

⁵ Biyani ghɨt a bimena ale, a mô nòn à ghɨ̂t a Falàsî, lôtì timî jis na, “Tum we wu bime wu kəta hi fate nam wu ghɨna fê kəta hi bimî hi gbe a Musìs wu làŋ.”

⁶ Ghɨt a tuma nì chəhsu khɨti yi yûŋtì kə kum gha yîn.

⁷ À hì mô te ghɨna gùfna gha mi yîn yen tan a leŋ ale, Bità lôtì timi jis na, “Wana noma ghàn hi khə kə nâ hamok na Yènfù tî chwok mu a ghàn a fùtɨ̂n wu tuk wu shyə na mu fokti tum yì jùŋ ha tumu ma ghɨna yu ma bimi ha Bâba.

⁸ Yèn fe fu khə gha à jɨ̀m ghe ghɨ mô a ghɨta a təm chwûtì mihì na tumu làwû hi boŋa bimî wu lum na, fu ti ni Yohnà Yulena ti yen ha ghɨna kəbi te ghɨ tì bèna ha ghàhnà.

⁹ Fu ti chwùtì na hanɨ̂ŋ wijə ha ghàhnà nì ghɨna wu lum na fu ti su jîhì besu ghɨna su, beka ghɨna ti bimi ha Bâba.

¹⁰ Njwô ghə te ghàn mòmhè hi nì na təm yi Fùyènì hi yafâ kum nì gha ghe fu mô ma fu ti tunhi ha ghàn agha? Ghàn khɨŋa na jùmtìbàmsu Jisòs mu sîn beka ngəksu su dô kə ni ma be ghàhnà ghɨ shyə nì ghàhnà ndùku bu hi bèkà njwô ghə?

¹¹ Yi wi hi tè mò ni beka ghàhnà bime na Yènfù ti bônhì ghàhnà kum nì təm a jûŋà ghe Jisòs tì chwùte ha ghàhnà mô ma wù ti boŋ bônhì ghɨna kəbi yâ.”

¹² Bità jis mihì ni, ghɨta à jɨ̀m china moŋ, Bôl ghê Bànabâs fôktì kwok nì chwesu gha kanana se a Yènfù tì gàmte ne tohne a ghɨna fùtɨ̂n ha tumu.

¹³ Ghɨna jis mihì, Jêms kaha lôtì jis na, “Wana noma ghàn yuti ha mu.

¹⁴ Samùn fôktì banhi te Yènfù chwùte tôknà wuni ha tumu ashyə̂ wu lum na fu ti chwokti ghɨt a wuna a ghɨna fùtɨ̂n.

¹⁵ Gha mɨ ghɨ̂n timi ki yi ghəl te fòktì su chiksu tì nyàka a ŋwàklù Fùyèn na,

¹⁶ ‘Bâba tì jis na, “Mu bè kaha bênà a yi bàm yi gha mɨ ghɨ̂n ma mu yuŋti sah yi nda Defìt a ye yi tì jyàhe. Nâbi te yi jyahe mihe ni, mu bè nêlò ma yi kahà bê timi,

¹⁷ ma tumu bê khɨŋ à yen mu. Ghɨt mɨ ghɨ̂n mò ghɨt ghe a mu chwokte na à hi mô a ghɨt a ma.”

¹⁸ Bâba tî nî na ghɨta hi khə gha mɨ ghɨ̂n nâ wu yu dâ.’

¹⁹ “Jêms fî jis na mu kwàktè na ghàhnà wi hi tè fo ngə̂k ha tum we wu bime ha Yènfù.

²⁰ Biyani ghàhnà bɨlà nyak ha ghɨna na kə ghɨna hi yə mwə̀lû ma ghɨ fati ha mosòmù, na kə ghɨna hi chyə nì ywena makə lɨmànà a kəta wi ghɨna, na kə ghɨna hi kuta nyàm teka ghɨ se, na kə wùt ha ghɨna nyu luŋû.

²¹ A mô gha ghe Musìs tì yike ghɨ yusa yike kwoka kə ndasu chintesu sù jɨ̀m a tuk mù lak nâ wu yu dâ.”

Ghɨ tum ŋwàklù ha tumu bimenu

²² Ghɨt a tuma Jisòs nì chəhsu bakha nì nôn à ghɨ̂t à bimena à jɨ̀m ki lem na ghɨna nè chwoktelò ghɨt a bimena ale a ghɨna fùtɨ̂n ma tum ghɨna nì Bôl ghê Bànabâs a Antiyòk. Ghɨna chwok Silàs ghê Judàs we ghɨ ndùku toŋte na Bànabâs. Ghɨna ndùku mô kə nâ ghɨt a tihena atɨ̂n à ghɨt a bimena.

²³ Ghɨ tum ŋwàklù àtɨ̂n a Antiyòk ha wana ne ghe à ndùku mô a wu tûm jis na, “Ghàh ghɨt a tuma Jisòs nì chəhsu a wana ne ghana tum na ghɨ bê fo toŋtînì ha ghàn tum we ghàn bime chyə a yi lak yi Antiyòk nì yi lak yi Siliyà nì a Sìlisiyà.

²⁴ Ghàh yu na ghɨt ale a ghàh a fùtɨ̂n ti ben jis gha, ghɨ fo ngə̂k a ghàn a təm nâ haŋaŋ. Ghɨna te hì jîsà gha mɨ ghɨ̂n teka a jis ghàh.

²⁵ Ghàh ti ndokò yen na yi jwôfà lò shyəma ghàh chwokti ghɨt ale ma chinhi ma ghɨna ben ha ghàn nì Bànabâs ghe Bôl a mô à ghɨ̂t ghàh kôŋà nâ a jûŋ.

²⁶ Ghɨna mô à ghɨ̂t ma ghɨna ti fo ngɨŋsu kə hi tè fèt ha Bâba ghàhnà Jisòs Klistù.

²⁷ À ni gha ye ghàh tuma Judàs, nì Silàs nì Bànabâs, nì Bôl ha ghàn, ghɨna mô hi fòktè kwok nì gha ghe ghàh nyàka a ŋwàklù afân.

²⁸ Yohnà Yulena ti ni ghàh ti boŋ khɨti kwâktìnì na ghàh kəta wi hi tè fo a ngə̂k ha ghàn a bu kə hi jìs na kə ghàn hi nê gha ghɨn ni, na,

²⁹ ‘Kə ghàn yə mwə̀ mù yə̂mù ma ghɨ fati ha mosòmù. Kə ghàn hi nyo luŋû makə hi kut a nyâm teka ghɨ se. Kə ghàn hi chyə nì ywena makə à lɨmà a kəta wi ghàn.’ Ghàn nè hì mô kə nâ jûŋ a wu yu afa ghàn nè gha ghɨ̂n a ghàh jîsà bênà ni. Ghàn faŋ à kə a jûŋ.”

³⁰ Ghɨt ghe ghɨ tuma yâ lo chwo a Antiyòk yûŋtì ghɨt a bimena nâ à jɨ̀m taŋ ŋwàklù àtɨ̂n ha ghɨna.

³¹ Ghɨna taŋ mihì ŋwàklù atɨ̂n hì saŋle nâ jûŋ kum gha jûŋ ghe ghɨ nyaka atɨ̂n hi fo a təm a ta ha ghɨna.

³² Judàs ghê Silàs te ghɨna ndùku boŋa mô kəbi sù fòktì lyi yu dâ fôktì kwok nì tum à Fùyèn hi nì na ghɨt ghɨ̂n hi kəta təm a ta nì bimi ta.

^33-34 À hì mô te ghɨna chyəte kwoka afû a mu tuk, ghɨ kaha chinhi na ghɨna kolo kə nì yutìnì. Ghɨna kolô yen yen ghɨt ghe ghɨ tì tuma ghɨna a Jèlusalèm.

³⁵ Biyani Bôl ghê Bànabâs fî chyəti kwok a Antiyòk ghê ghɨt ale ghɨ dô kə ni, yike à ghɨ̂t fê fôktè tum yì jùŋ kum Bâba.

Bôl ghê Bànabâs jyâhì

³⁶ Tuk mùlè chyâ, Bôl jis ha Bànabâs na, “Ghàh wò kahà gbê jikti wana ne ghàhnà a tu tèk afa ghàh wò mò ma ghɨ ti fôktì tum atɨ̂n kum Bâba ma yen na bimi ghɨna ta yênà kə ashyə̂ agha.”

³⁷ Bànabâs hì khɨŋa na ghɨna ghê Jon Mâk chîntè yen amok.

³⁸ Biyani Bôl yen na yi jwòfà wi na Jon Mâk jumti ghɨna beka wù tî tet de ghɨna yi lak yi Bàmfiliyà teka ghɨna mihi fêt ye ghɨna ndùku kəta hi nì.

³⁹ Njaŋi yîmì afû metì bəma kə ni. Ghɨna jyâhì kə afû. Bànabâs lyi Jon Mâk ghê wûn lye a ngwùk daŋ yen a Sàbulùs.

⁴⁰ Bôl ki chwoka Silàs. Ghɨta jə̂m na Yènfù hi tôknà nì ghɨna, ghɨna ki lô.

⁴¹ Ghê Silàs gbi tohna yi lak yi Siliyà nì Sìlisiyà, gbê nê na ghɨta bimena ghê ghɨ mô afû hi ta yênà kə ashyə̂.

« Roimhe

Air adhart »

Lean sinn:

Ceanglaichean taic

Sanasan