Fêt 12 - Ŋwàklù Fùyèn Kàn Mù Fê (Cameron)

Ghɨt a bimena fî yen ngə̂k nâ haŋaŋ

¹ À ndùku mô a mu tuk afû, fə̀n Helòd yîmì hi fo ngə̂k ha ghɨt a bimena ghɨ le.

² Wù tî nî sojàsù ywi Jêms wâ nè Jon nì fâ.

³ À hì mô te wù yena na ghɨt a Jûs kòŋàlò gha ye wù ne, wù nî na ghɨ boŋà kwo Bità. Gha mi yin tì gan ha Bità wu tuk afâ ghɨ ndùku yə bana chɨmlana bu atɨ̂n.

⁴ Ghɨ kwo Bità ni, fo wun ha sojàsu, sojàsu tɨnsu fa wûn, hì chînà wûn sù kìk, sù kìk, chînà ni kwunê. Helòd hì fate na ghɨ yə mihi tuk mù Daŋa chyalamù ma yi jis ma ghɨ fihè sak wûn a ghɨta ashyə̂.

⁵ Ghɨ lem Bità a ndâ à chyâk, ghɨt a bimena faŋ hì chyate ha Yènfù nì təm a ghɨna à jɨ̀m.

Anjèl à Fùyèn nî Bità fwo a ndâ chyâk

⁶ À ndùku mô ntuksu shyəma tuku yu, ma Helòd fihi Bità hi yèn nì wûn a ghɨta ashyə̂ ma sak. Bità hì mô ma wù ti nîŋì a sojàsù bà a fùtɨ̂n bwunê, ma ghɨ ti fî fa wûn nì chyaksu, sojàsu lesu mô a jwô mbàn chînà tu luk.

⁷ Kə ni, anjèl à Fùyèn fwu afû, ndâ bân. Anjèl àtɨ̂n shîkhì Bità jis na, “Nyàŋhi lòtî.” Te wù jìsa ni, chyak se su ndùku mô a Bità wu kpen yâtà kə yi yâtà.

⁸ Anjèl à Bità àtɨ̂n fî jis ha Bità na “Fati màk nju sasu, ma wò tuŋ gwu wù sasu.” À hì mô te Bità ne mihe, anjèl àtɨ̂n fî jis ha wun na “Màk waf gha ma wò jumti mu.”

⁹ Bità jûmtì wûn ghê anjèl àtɨ̂n fwu a ndâ chyâk afû. Wù ndùku fwo ni khə wi nâ gha ye anjèl à Bâba nè mò hamok, wu kwâktè kə na à chyə jem yi.

¹⁰ À hì mô te ghɨna chya luk we sojà se ndùku mô atɨ̂n, fî chya luk wu kumtenu ben tan a jwô mbàn afa yì ndùku lye yênà yi tèk, jwo mbàn yi tɨni jîmì kə a yini ngɨŋ, ghɨna chya fwu gbî kat yen tan a wu lum wu ta. Kə ni anjèl à Bâba mi ye lo de Bità.

¹¹ Kə wu yu, tof wu Bità kaha bên, wù yen na gha ye yi yê hì gânà ha yi ye hì mô kə nâ gha hamok. Wù jis na, “Mu ti khɨlî hamok chîn na Bâba ti tûm anjèl à wûn na yì bê bonhi mu, na kə Helòd ni gha ha mu. Wù tum na yì bê bonhi mu a gha afa ghɨt a Jûs ye hì kwâktè hi nì ha mu.”

¹² Bità yen mihì gha ye yi gana ha wun ni, lo yen a Mèli a ndâ, a nè Jon Mâk. À mô ni ma ghɨta ti yûŋtì dô kə ni hì jə̂mà.

¹³ Wù kûmtì jwo mbàn ye yi ndùku lye yênà a bɨn afû. Wan wù ywên wùlè we wù ndùku fêtà a bɨn afû, yet yi wuni mô Lodà, ben hi yen nâ à mò nde agha.

¹⁴ À hì mô te wù ywo khɨle jə̀ Bità, saŋle nâ jûŋ, kaha nyɨŋ yen teka wù jimi jwo mbànì, fôktì ha ghɨta na Bità mò a jwô mbàn.

¹⁵ Ghɨna jis ha wûn na, “Wò jyakalò.” Biyani wù faŋ hì jîsà kə yi jîs na yi jìsà hamok. Ghɨna fî jis kə na à wijə Bità, à nèhì mô anjèl à Fùyèn ye yì chìnà wûn.

¹⁶ A mò ni ma Bità ti faŋ hì kumtè kə yi kûmtì jwo mbàn mi yê. Ghɨna yen jîmì hì mô nì kani hi yen na à mò kə nâ Bità hamok.

¹⁷ Wù chîlì ghɨna nì wo, fati fôktè ha ghɨna te Bâba ye bena lyi fwo nì wûn a ndâ chyâk, fî jis na ghɨna fokti gha mi yîn ha Jêms nì ghɨt a bimena ghɨ le, te wù jìsa mihe ni lo yen a lùk wu lô.

¹⁸ Te tuku yula gha tɨni hì fo ngə̂k ha sojà se su ndùku chînà Bità yâ na haŋaŋ. Ghɨna hì kante a ghɨna sù ngɨŋ na a gan nâ ghə ha Bità mu wunâ agha?

¹⁹ À hì mô te Helòd khɨŋa Bità te yên, wù toŋa sojàsu tɨnsu, sak kwok nì ghɨna, chyâhì yi sâk na ghɨ ywiti ghɨna. Yi bàm atɨ̂n Helòd lo a Jùdiyà chwo hì chyəte kwok a Sìsaliyà.

Fə̀n Helòd kpû

²⁰ Helòd hì bâŋhè lâ nâ haŋaŋ ha ghɨta tèk yi Tayà nì Sidòn. Ghɨ chwokti ghɨta a tu tèk afû na ghɨna yê chyati Helòd na yutìnì hi mô beka mwə̀ mù yə̂mù ghɨna nâ mù jɨ̀m ndùku fwo kə Helòd yi lak, yen ni, yen Blastùs we wù ndùku mô a tû ha ghɨt a fetana a Helòd a tôk na wù fati gha tɨni ha ghɨna.

²¹ Tuku gha mi yîn kwok kpên, Helòd mâk dàla tù fə̀n yì wûn, ndokò wu kpòk wu tù fə̀nù, yîmì hi te jìs ha ghɨta.

²² Ghɨta hì bwate jîsà kə na, “ Wù jìsà wijə te wùt, wù jìsà kəta Fùyèn fu lefu.”

²³ Ghɨna hi baha bwate kə yi bwatî, anjèl à Bâba yìlè ni Helòd hì yafâ, ŋɨ̂ŋlùtù kut wûn wù kpû beka wù ndùku nê na ghɨta hi tuma kumtu ha yi bu ha Yènfù.

²⁴ Gha Fùyènì hì yama yênà kə ashyə̂.

²⁵ À hì mò te Bànabâs ghê Sôl mihe fêt yi ghɨna a Jèlusalèm, ghɨna kaha ben a Antiyòk ghê Jon Mâk.

« Roimhe

Air adhart »

Lean sinn:

Ceanglaichean taic

Sanasan