Bìoball air-loidhne

Efisiyàns 1 - Ŋwàklù Fùyèn Kàn Mù Fê (Cameron)

¹ À nyak mu Bôl ŋwàklù yìna ha ghàn ghɨt a Fùyènà ghe a ghàn mò kə a ghàn a yi bimî ha Klistù Jisòs, chyə a Efisùs. Mu mô wùt wù tum ha Klistù Jisòs ma à chwok Fùyèn.

² Yènfù, Bè ghàhnà ghê Bâba Jisòs Klistù ti chwûtì təm a jûŋà ha ghàn, fo yutìnì ha ghàn.

Yutì ye a Yohnà Yulena fo

³ Ghàhnà kokhe Yènfù, a Bè Bâba ghàhnà Jisòs Klistù. Fu ti bonhi ghàhnà a yòhnà nâ nì mwə̀ mù jùŋ mù jɨ̀m me a mù fwo a nyə̂ tohne a Klistù.

⁴ Nâbi shyəma wù fati mbyî, ma wù ti chwokti ghàhnà tohne a Klistù, na ghàhnà bê hi mô ghɨt a yulena, kəta wi njahi a Yènfù ashyə̂.

⁵ Yènfù ndùku mô ma wù ti lem na fu bè lyê ghàhnà a wana wuna tohne a Jisòs Klistù, ma à koŋ kə wûn a wun yi saŋlî lem na yi hi mô ni.

⁶ Yi ni chwûtè na ghàhnà kəta hi tè fo yi kokhî ha Yènfù kum tôknà yi kanani ye a wù chwùte ha ghàhnà tohne a Wâ wûn wù kòŋ.

⁷ Klistù tî yun tu ghàhnà nì luŋ mù wun me a wù tì sùha te wù kpo, Yènfù ki lêhèfo besu ghàhnàsu. Yìna ni chwùtè təm a jûŋà ghe a fu kəta ha ghàhnà.

⁸ Fu ti tôknà nì ghàhnà wu lum wu kananu ni na ghàhnà hi khə gha.

⁹ Yènfù ti nî na ghàhnà khɨli gha ma fu tì lem, a hì khə kə wûn. Fu tì ni ni beka fu khə kə gha à jɨ̀m. Wù tì lem gha mɨ ghɨ̂n na ghɨ gan tohne a Klistù, ma a koŋ kə wûn na yi hi mô wu lum afân ni.

¹⁰ Yènfù ti lem na tuku bè kpenalò, ma fu chinti mwə̀ mù jɨ̀m a nyə̂ nì a chyə̂ ma wù lem kə a Klistù sah yì sak.

¹¹ Fu ti chwok ghàhnà na ghàhnà hi mô ghɨt a wuna tohne a Jisòs Klistù kə yi ghəl te fu tì bakte lema shyəma fu fati mbyî. Nâbi ghə gânà kə wu lum afa a Yènfù khɨŋa na yi gan atɨ̂n.

¹² Fu chwok ni shyəma ghàh ghe a ghɨ tì bime Klistù ashyə̂ na ghɨ hi bəmhe Yènfù kum a jyak ghe fu kəta.

¹³ Yènfù ti fyî kəbi ghàn ghɨt a Efisùs bônhì ghàn tohne a Klistù te ghàn ywo tûm yì jùŋ ye a yì mò hamok, ghàn bimî. À ndùku mô te ghàn bime, fu chwe ghàn nì Yohnà Yulena ghe a fu tì chwùne,

¹⁴ a mô a chwena hi chwùtì na tuku bè kwoka kpenalò, ma ghàhnà khɨti shyə ghe a Yènfù tì chwùne, wu lum afân, ma ghɨta hi kokhe Yènfù kum jyak a wuna.

Bôl jəm na ghɨta hi khə jyak ghe a Yènfù kəta

^15-16 A ni gha ye yi ne na mu hi fo kə yi fô yòŋnà ha Yènfù, kwâktè ghàn a mu yi jə̀m kə yû mù jɨ̀m hi yìmì te mu tì ywo bimî ye a ghàn kəta ha Bâba ghàhnà Jisòs Klistù, nì kôŋ ye a ghàn kəta ha ghɨt a Fùyènà.

¹⁷ Mu shihi jə̀m nâbi wùni yu, mu hi chyate Yènfù Bâba ghàhnà Jisòs Klistù, a mô Bì we a wù kəta jyaka na wù fo Yohnà a wuna ghe a ghɨ fo tofu fê chwûtè banhe gha a kanana wuna shyəma ghɨ ni ma ghàn hi fate khə wûn.

¹⁸ Mu jə̂mà kəbi na Yènfù ni kwâktì yani yema, ma ghàn hi khə na ghàn bè khɨtelò mwə̀ mù jùŋ me a fu bakte ha ghàn nì ghak yi yulani ye a fu lema ha ghɨt a Fùyènà,

¹⁹ jə̂mà kəbi na ghàn yen à khɨli jyak a kanana ghe a Yènfù kəta, a mô à ghɨ̂n ghe a ghɨ gâmtè ghàhnà ghɨt a bimena. A mô kəbi jyak ghe a wù tì lye

²⁰ hi nì na Klistù kahà lòti a yi kpû. Klistù lôtì ni, wù lem wûn a wun a kpen wu wo ta a nyə̂.

²¹ Wù hì mô afû chîn, saka nâ yohnù wù jɨ̀m nì jyak wù jɨ̀m, ngaŋte chyâ nâbi wùni fə̀n a mbyî chîn nì ha mbyî ye a yì bè bênà.

²² Yènfù ti fo mwə̀ mù jɨ̀m a wun a wô fî lem wûn na wù hi mô a tû a gha à jɨ̀m a ndâ Fùyèn.

²³ Ndâ Fùyèn mi yîn mô wun wu Klistù, fye jyak à jɨ̀m ha wun, a nê wun na nâbi ghə hi mô, nâbi afa.

« Roimhe

Air adhart »

Lean sinn:

Ceanglaichean taic

Sanasan