ZAKARI 9 - Boy Lonana

ISRAELNA U NJAF SUU HIŊŊA Suu keŋ Israelna mbuɗ ki jiviya

¹ Di boyna. Boy ma vi Yawena mbay hu mbassa Hadrakka vunum hin do hu Damas, kay ana tlesuu jivi suu hu Aramma ni vi Yawe ko njaf suu Israelna na may.

² Ko Hamat ɦoŋzi ma keŋeɗ na, Tir u Sidon li ma yalna cocona.

³ Tir min li ma ŋgolna, ndaɗ tok gursura huwa, doonora ko gugumma na, lorra ko luɓu ma hu voɗtana na.

⁴ Gola Bu Suuna hin yow tle asina kiyo. Nam hin tooɗ gulumun maɗna ha ki duk yo lumma ŋgolna. Ndaɗ taɗta may ni kura hin ŋgalaɗ kiyo.

⁵ U dlara mbuɗ mbuɗ ndaɗta Askalon hin mbuɗ ki ndaana. Gaza hin torɗi taɗ ko tiitara. Ekron hin wi ana sa njunuɗ ka oloɗi. Asi hin ci mulna ki hu Gaza, ɦoŋzi ma Askalonna sa hin ka kak hu oloɗi.

⁶ Suu usi zeɗ zeɗna hin kak hu Asdod, an hin bulum pandara vi suu Filistinnara kiyo.

⁷ An hin kuɗuɗ busuna ki funuɗu, hin paɗaɗ tlesuu njenjena ki u siiɗ may. Na ɗaŋŋi ndaɗ ni ko va ma um hinna na, hin hin ki maŋ Looygina. Nam hin fi liim duk njaf suu Yudana, Ekron hin li duk suu Jebusna ko ndaɗta na may.

⁸ An hin kakŋi eg ziinda, hin goloɗ tew tew ko suu jakka, hin hoŋ ay jak olona. Sa hin ka fi yal ma mbuɗ maŋi hu voɗta oloɗi, kay ana cecem wanda an ka goloɗ irin tinira kaɗ na ta.

Sa sunda ma lalam ma mbaa heɓpa ayna

⁹ Li furira, goora vi Siyon. Yi ha kolo u delek eŋga, goora vi Yerusalem. Gola mul makŋa ka tuɗ vo varaku. Nam ɗegee, saɓak lay, lamlam, fuli kay korra, kay goo korra.

¹⁰ Nam hin bulum pupus ma duuna ki hu Efrayim lay, hu Yerusalem lay. Nam hin kus gu mburra duuna kiyo, hin mba heɓpa ay maŋ suuna. Nam hin ti mulla fun lumma ŋgolna ta ta tew fun lum ma hiŋŋa, col fun lumma ta ta tew ha ki keŋ mbassa ma daɓ ayna.

Suu daŋgayna cukusi kiyo

¹¹ Kan an may ni, kay galamba an vaɗ u ndak hu busuɗunda, an hin cukuk suu mak suu daŋgayna ay ki hu zulla hu li ma yona ka huɗina.

¹² Tuɗugi hu liigi ma saɓakŋa daŋgay suu hurusi tinina. Karam gaw an di boy namma na. An hin ɦagi warakŋa ŋgol su olo.

¹³ An tli gu mburu manda kon wa, ni Yuda, an tiniɗ mburra huruɗ wa, ni Efrayim. An hin sook u goryogu, Siyon, ek goryoŋ Gresna, an hin vak kon ko sa duuna ko ŋgew mamba kolo kamba na.

¹⁴ Yawe hin kal ay ki kolo kasiya. Sin mbuuru mamba hin weleɗ ko welera huulonara na. Yawe Lona hin bu tokolomma. Nam hin tuɗ ha duk babaa may ma dalina.

¹⁵ Yawe, ma Saɓakŋa Kom Belna, hin njun kasiya. Gogoyra hu kawsura ci suuna, to tlena kiyo. Asi hin ci busuna hurusi ko sum veŋŋa na. Asi hin hoɓ kiyo nam suu kasi ko busuna sulul ki kaŋga hu tas ma voom ɦu a yamam eg suunana na, ko ndal mek tlena moli hu givin ma togolla na.

¹⁶ Yawe Loosina hin suɗusi ki hu buu namma, asi ɦuguni suu vi suu mamsina na. Tli tasi ko ndal gogoy mayra jivira, asi hin ɓo lina kay ndaŋga mamba.

¹⁷ Ko ndaɗta na asi hin li furira, ko ndaɗta na asi hin mbuɗ ki jiviya. Gor zoŋŋina hin li furira kay wana, gorɓiina hin li furira kay sum veŋ ma wilina.