ZAKARI 8 - Boy Lonana

Yawe vi vunum a ɦal heɓpa u paɗvunna

¹ Yawe, ma Saɓakŋa Kom Belna, dan boy mamma ana,

² Yawe, ma Saɓakŋa Kom Belna, ɓak ana, hurun yowmus coco eg Siyon, hurun haɗ kaɗ cocoo.

³ Yawe ɓak ana, An hin hoŋ ay eg Siyon, kak hu ɦoŋzi ma Yerusalemma. Asi hin yi sem Yerusalem ma daŋŋa ana, ɦoŋzi ma ɗegeena, ɦinira vi Yawe, ma Saɓakŋa Kom Belna, ɦinira teteɗta.

⁴ Yawe, ma Saɓakŋa Kom Belna, ɓak ana, Suu maana, suu njufiina u boyogina, hin kak hu Yerusalem, gegelay u tokolora komu, kay basaɗasi kal ki ŋgol cocoo.

⁵ Ҥoŋzina gorra hin oy ki huwa, gor njufiina u gorɓiina hin luu huwa.

⁶ Yawe, ma Saɓakŋa Kom Belna, ɓak ana, Lini u suu hinna gol dla ndaɗta irisi loɓo ni, hu buu namma ni an tanda ndak a wi dla ndaɗta irin loɓ lay su? Yawe, ma Saɓakŋa Kom Belna, di na.

⁷ Yawe, ma Saɓakŋa Kom Belna, ɓak ana, Gasi an hin buɗ suu mansina ay ki hu li ma faɗta day ay huna lay, hu li ma faɗta ɗik huna lay.

⁸ An hin hoŋosi aya asi hin kak hu Yerusalem. Asi hin li ni suu mansina, an hin li ni Loosina may, hu ɗegeera u jivira.

⁹ Yawe, ma Saɓakŋa Kom Belna, ɓak ana, Soogi ugiya, agi suu hum boy ma suu jok vun Lona damma. Hu buu ma hin gi u zira vi Yawe kaŋga a hoŋoɗ mindana.

¹⁰ Kay ana ki jew buu namma ni suuna ka fi vaɗi, mbuurina ka li va jiviɗi lay. Kay suu tuɗ duk cowcow na, sa njun kasi a doo suu duu u asina kaɗi. Kay ana an cuk suuna halaŋ halaŋ eg tasi wa.

¹¹ Cecem wanda kay suu usi hinna an ka ko jewra na oloɗi. Yawe, ma Saɓakŋa Kom Belna, di na.

¹² Na may an hin mba heɓpa aya, gugutlura hin vuɗa, ndaŋgara hin jiv tlena, huulona hin gi mbaɗagira, an hin ɓorow tle asina ki maŋ suu usi hinna.

¹³ Ko ndaɗta na, agi li ni suu wi hawra ay duk suunana zi ma Yudana, zi ma Israelna, na may an hin suɗugi kiyo, agi hin fagi paɗvunna. Lagi ndaanaɗi, soogi ugiya.

¹⁴ Na may Yawe, ma Saɓakŋa Kom Belna, ɓak ana, ko ndaɗta na, an col a lasagiya kay ana somoyogi ɓeŋen hurunu. Yawe, ma Saɓakŋa Kom Belna, di na, an hin hin boy namma kaɗi.

¹⁵ Cecem wanda ɗaŋŋi an col a li jivira eg Yerusalem, eg ɦoŋzi ma Yudana. Lagi ndaa oloɗi.

¹⁶ Gologi gaɗta agi hin li uɗta. Agi dagi gasira ki maŋ tagiya, hu li ma kaɓakŋa wanni agi dagi ni gasira a mba heɓpa ayra.

¹⁷ Saaragi hurugi kurufu a lagi dla cora duk tagiɗi. Minigi suura bay uɗtaɗi kay tle asina halaŋ an ka minisiɗi. Yawe di na.

Buu ma li laara hin mbuɗ ki buu ma luuna

¹⁸ Yawe, ma Saɓakŋa Kom Belna, ɓakan boy mamma ana,

¹⁹ Yawe, ma Saɓakŋa Kom Belna, ɓak ana, laara laɗ hu til ma fiɗina, hu ma vadlna, hu ma kiɗisiyana, hu ma doogonara hin mbuɗ ki hu zi ma Yudana ni buu ma furira u luuna. Na may minigi gasira u heɓpa.

²⁰ Yawe, ma Saɓakŋa Kom Belna, ɓak ana, gasi, agi hin wi suuna mbay cocoo, suu ay hu ɦoŋzi ma ŋgolona.

²¹ Suu hu ɦoŋzi maa dew hin tuɗ di suu hu ɦoŋzi ma hiŋŋa ana, «Tuɗuygiya, tuɗuygi heɓeygi huu Yawe, halaygi Yawe, ma Saɓakŋa Kom Belna, an tanda tuɗ ni tuɗi lay.»

²² Suuna bolow cocoo u suu saɓakŋa hin mbay Yerusalem hal Yawe, ma Saɓakŋa Kom Belna, hin a heɓ huu Yawera may.

²³ Yawe, ma Saɓakŋa Kom Belna, ɓak ana, hu buu namma wanni suuna doogo hu njaf vun ma suuna ɓakamma hin taɓ tasi eg sa Juif maa dew vam vun baraw mamma hin di ana, «Ami min a tuɗ u agiya, kay ami hum ana Lona ka u agiya.»