ZAKARI 7 - Boy Lonana

Li laara tak ki kay ɓeŋga Yerusalem ɓeŋ kira

¹ Hu basara fiɗira vi mulna Dariyus, Yawe ɓak boyna maŋ Zakari, buu ma fiɗina hu til ma dleeŋena, til ma yam ana kisleuna.

² Bethel Saresser ŋgol asgaa suu vi mulna na u suu mamma cuk suuna tuɗ eg Yawe a heɓem hurumba.

³ A joɓ muli suu li ɓivunna hu Zira vi Yawe ma Saɓakŋa Kom Belna u suu jok vun Lonana ana, «An tii ni tiiri hu til ma vadlna doo tan ki kay tlena ko an li dla ndaɗta ay ki jew basara bolowra na su?»

⁴ Na ɗaŋŋi Yawe, ma Saɓakŋa Kom Belna, dan boy mamma ana,

⁵ «Di suuna halaŋ u muli suu li ɓivunna ana, hu li ma agi lagi laara u yoo tara hu til ma vadlna u ma kiɗisiyana ta ta basara dok kiɗisiyara na ni agi lagi laa ndaɗta ni kan ko su?

⁶ Hu li ma agi tagi may, cagi mayna, agi ti may, ci may ni magi agiɗi su?

⁷ Ni boy ma Yawe ɓakam ki fun suu basi suu jok vun Lona hu li ma Yerusalem kaki u heɓpa enna, ɦoŋzi maɗna ŋguy kaɗ lay, lii dalina u mbas mayra kaŋga ura suuna ka hurusi bolow coco lay.»

⁸ Yawe ɓak boy mamma maŋ Zakari ana,

⁹ «Yawe, ma Saɓakŋa Kom Belna, ɓak ana, Kaagi ɓak ma gasina, gegelay li ni dlara ɗegeera u oora kay wayamma.

¹⁰ Cara donora u goo ma kuyuna, sa mbay ŋgayrana u sa hawra yowosi tlegeyesiɗi, dukugi wanni sa dew lay saa a li dla co eg wayambi.»

¹¹ Na may asi tin humusi ka kay boy nammaɗi. Asi yow pel bikisi koloo, ŋgel humusi ki ka hum boy nammaɗi.

¹² Hurusi mbuɗ ki hurusi diɓilikka ko kawina na a hum haɗta u boy ma Yawe, ma Saɓakŋa Kom Belna, ɓakasina u musuk mamba ay fun suu basi suu jok vun Lonana. Yawe, ma Saɓakŋa Kom Belna, hurum mbuɗ ki yara cocoo.

¹³ Ni na may Yawe, ma Saɓakŋa Kom Belna, di ana, «An yasiya, asi humun kaɗi. Ni na may asi yan wanni an humusi kaɗi may.

¹⁴ An torosi cukusi ha ki kay suu asi ka wasiɗina halaŋ. Bulum mbassa ka ki ŋgorosi dagan gaw may. Sa ka tuɗ duk ɦoŋga na cowcow oloɗi. Furira asi li laɗ kay ndaŋgarara mbuɗ ki yoora.»