ZAKARI 6 - Boy Lonana

Dlara tak taɗ ki a kalavandira, pupusi suu fiɗina

¹ An tli irin kolo daŋgadla ni vana tak tam irinu, ni pupusna fiɗi tuɗ ay duk ɦoŋ ɦinira mba', ɦini ndaɗta ni walakka.

² Pupus ma jewna njunira kel kulumi suu tlawina, ma a mbarana kulumi mamsina waraa.

³ Ma a hindirana kulumi mamsina tasi haɓagira, ma a fiɗirana kulumina tasi ndali duk tlawra.

⁴ An hin joɓ sa sunda huulona ma ɓak u anna ana, «Tle asina ni mege, malanna?»

⁵ Sa sunda huulona dan ana, «Ni semeɗ ma keŋ lina fiɗina mbay ni namu. Nam col ay jew fok sa malaŋ ndaŋgara halaŋŋa.»

⁶ Kulumi suu pupusna njuni kelesi tasi warna tuɗ hu mbassa mbayawra. Suu tasi haɓagina tuɗ ha kay ceeresiya. Suu tasi ndalina tuɗ ni hu mbassa dalira may.

⁷ Suu tlawina tuɗ ha may, tasi ka ɦekki a ŋguy yam ndaŋgara. Na ɗaŋŋi Yawe ɦasi voɗta ana, «Tuɗugiya, ŋguyugi yam ndaŋgara.» Pupusgina hin ŋguy yam ndaŋgara may.

⁸ Nam yan dan ana, «Gola, suu tuɗ irisi mbayawna, hinin ŋgus manda ha hu mbassa mbayawra.»

Mulla vi sa jok vun Lona, Josuwe

⁹ Yawe ɓakan boy mamma ko wanda na,

¹⁰ «Vi tlesuu ugi Helday, Tobia, Yedaya, koyogina ɦasina koŋu. Aŋ taŋga tuɗ karami, tuɗ hu ziŋ Yosiyara, goŋ Sefaniyana, hu li ma asi mbay Babilon hurumma.

¹¹ Aŋ tli doonora u lor min jumba mulla, tiniɗ kay yam Josuwe, goŋ Yossadakŋa, mul ŋgol ma li ɓivunna.

¹² Aŋ hin dam ko wanda na, Yawe, ma saɓakŋa kom belna, di ana, Gola ni sa sem ana gogorguna na tlena halaŋ hin day kaŋga u semu. Nammi sa hin min ziŋ Yawera.

¹³ Sa ma min Ziŋ Yawera ni namu. Nammi sa mulla hin kak u namma, nam hin kak kay dlam mamba a ti mulla. Mul ma li ɓivunna hin kak kay dlam mamba may, asi u dlasi jak vunusi hin li ni dew kay dlara asi daɗta.

¹⁴ «Jumba mulla hin li ni a va takkina hu zira vi Yawe a li jivira maŋ Helday, Toviya u Yedaya kay jivira vi goŋ Sefaniyana.»

¹⁵ Suu ay ki keŋ day dayna hin mbay li sunda hu ziŋ Yawera. Agi hin wi ki ana, Yawe, ma Saɓakŋa Kom Belna, sunun ay egegi ni namu. Dla ndaɗta hin mba li ni agi humugi vun Yawe Loogina.