ZAKARI 5 - Boy Lonana

Dlara tak taɗ ki a karkiyara, magaara pii ko laygina nara

¹ An hoŋ irin tlira kolo na ni, an wi tlena, wi magaara pii ko laygina na.

² Sa sunda huulona dan ana, «Aŋ wi ni mege?» An hoŋom dira ana, «An wi ni magaara pii ko laygina na, fiyekeɗ meter doogo may, bubuuɗ meter vadl may.»

³ Nam hin dan ɗaŋŋi ana, «Dla cora cuk ay ki kay yam mbassa halaŋ halaŋŋi ndaɗu. Olo, hu ii koɗ maa dew di ana, suu kulla halaŋ hin casi kiyo, hu ii koɗ ma hiŋŋa di ana, suu suu tasi bay gasira hin casi ki may.»

⁴ Yawe, ma Saɓakŋa Kom Belna, di ana, An gigiɗ ɦawa a ndaɗ tew ziŋ sa kulla a sa suu tam bay gasira tew tewna, ko ndaɗ kak hu ziimu, tamma kiyo, mbalna u gogoyra.

Dlara tak taɗ ki a kiɗisiyara, va tli nek tlena

⁵ Sa sunda huulona ma ɓak u anna ɦuɗ tam ay hin dan aya, «Tli iriŋ kolo gol tlesuu mbay wanna ɗaŋ.»

⁶ An joɓom ana, «Va namma ni mege?» Nam hoŋon dira ana, «Va tli nek tlena mbay ni namu.» Nam hin di olo ana, «Ni suluk ma vi suuna hu mbassana halaŋ.»

⁷ Gola ni va na ko vun doyra yoori u tusunara na ni mal kiyo. Cara kaki kaŋga hu va ma tli nek tlena kurufuwa.

⁸ Na ɗaŋŋi nam di ana, «Ni cora.» Nam hin hoŋoɗ zuɗta ha kaŋga hu va ma tli nek tlena kurufuna, hin duguɗ vun doyra tusuna kaɗu.

⁹ An hin tli irin kolo olo ɗaŋŋi wi tlena, boyogina u tasi mba' mbaya. Semeɗna sii ki u garaŋasiya, garaŋasi ko ndal zilimma na. Asi tli va ma tli nek tlena ki kolo duk ɦoŋ ndaŋgara u huulona.

¹⁰ An joɓ sa sunda huulona ma ɓak u anna ana, «Asi tli va ma tli nek tlena tuɗummi arage?»

¹¹ Nam dan ana, «Tuɗummi hu mbassa Babilonda a min zira kamu. Asi hin ɓalaɗ uɗ kaŋga may, hin minim kolo kayam may.»